Iti umuna nga oras ti nadara a kampanya nga Operation Gideon’s Chariots ti US ken Israel, 144 Palestino ti dagus a napatay kadagiti bomba ken panag-atake ti tropa daytoy iti Gaza. Kadagiti sumaruno nga aldaw, agsasaruno nga inatake dagiti pwersa ti Israeli dagiti pagbakwitan ken nabatbati nga ospital ken pagadalan tapno abugen dagiti Palestino agturong kadagiti pagbaludan a naisagana para kadakuada. Ginasut kadagiti napatay ket ubbing.

Ti Operation Gideon’s Chariot, a narugyan idi Mayo 18, ti pamatay nga atake ti Israel ken US iti 18-bulanen a henosidyo ken 77-tawen a brutal nga okupasyon daytoy kadagiti teritoryo ti Palestine. Panggep daytoy a direkta a sakupen ti intero a Gaza ken ibalud ti agarup 1.5 milyon a Palestino iti “sentro ti ebakwasyon” iti abagatan a paset ti enklabo.

Manipud Oktubre 2023, dumanonen iti 63,000 Palestino ti direkta a pinatay ken 118,300 ti nasugatan ti panagbomba ken panagraut ti Israel. Dandani kagudwa dagiti biktima ket ubbing ken babbai. Mapatta-patta a ginasut a ribo pay ti natay gapu iti bisin, sakit ken kinakurang ti pasilidad medikal. Adu met ti nagabburan laengen kadagiti narba a pasdek ken balbalay, a saan a nakita wenno nakali gapu iti awan-sarday a panagraut ti Israel.

Panagaramat iti taraon ken ayuda kas armas ken negosyo

Dumanonen iti tukad-didigra ti panagbisin idiay Gaza nangruna manipud Marso nu kaano nga absoluto nga inparit ti Israel ti panagserrek ti amin a klase ti ayuda. Idi Mayo, inted daytoy ti responsibilidad ti panangiwaras ti taraon iti Gaza Humanitarian Foundation (GHF), maysa a pribado a kumpanya, nga agkadwa nga intakder ti US ken Israel tapno “abaken” ti Hamas.

Nainget a binabalaw ti United Nations ti panagaramat ti Israel iti GHF, a kuna daytoy ket kaniwas iti maiparbeng a kina-nyutral ken kina-independyente ti makatao nga aramid. Kinundenar ti UN ti adu a pagilyan ken internasyunal nga institusyon, ti panagaramat ti Israel ken US ti ayuda ken taraon kas armas laban kadagiti sibilyan.

Malaksid iti GHF, inserrek met ti Israel ti maysa a pribado a kumpanya nga Amerikano tapno umakto kas “pwersa a pangseguridad” kadagiti sentro ti distribusyon daytoy. Kabilang ditoy ti Safe Reach Solutions, UG Solutions ken S.R.S. Security Firm, nga amin ket tagikua dagiti dati a heneral ti US Army ken Central Intelligence Agency. Ti panagpili kadagitoy a kumpanya ket inaramid dagiti kangatuan nga upisyal ti Israel, kabinnadang ti US, a saan a maidaldalan kadagiti parlamento ken kongreso da.

Tuluy-tuloy a sangalubongan a protesta

Minilyon nga umili iti sangalubongan ti nagkaykaysa a nagprotesta laban iti baro a dalluyon ti henosidyo idiay Gaza. Panawagan da ti madagdagus ken permanente a panagsardeng ti putukan iti Gaza ken panagsardeng ti brutal a panag-atake ken panagbomba ti Zionista nga Israel. Naigiddan dagiti protesta iti pananglagip iti maika-77 anibersaryo ti Nakba wenno Ti Didigra, ti umuna a gundaway a naranggas a pinadsi dagiti Zionista dagiti Palestino manipud kadagiti daga da tapno itakder ti estado ti Israel.

Ginasut a tignay ti naiyaramid kadagiti syudad iti Middle East, Europe, Asia, Africa ken uray iti uneg ti US. Adu a kabataan estudyante iti US ti natured a nangisayangkat kadagiti protesta ken diskusyon kadagiti unibersidad iti tengnga ti nairteng a pananglipit kadakuada.

Iti Pilipinas, nakikaykaysa ti Moro-Chiristian Peoples Alliance (MCPA) iti sangalubongan a panawagan ti madagdagus ken permanente a panagsardeng ti putukan idiay Gaza.

Segun ken Amirah Lidasan, kabuklan a kalihim ti MCPA, “manipud idi naputed ti panagsardeng ti putukan, ti Zionista nga Israel ken ti numero uno daytoy a taga pondo ket awan ti inpakita da nga asi kadagiti kakabsat a Palestino.”

Immawag isuna iti internasyunal a komunidad nga ituloy nga allukoyen dagiti lider da nga agaramid ti aksyon laban iti awan-ressat a panag-atake ti Israel. “Ti pannakawayawaya ti maysa ket pannakawayawaya ti amin, nangruna tatta iti sango ti nakaro a panaglabsing iti karbengan-tao, saan tayo a rumbeng nga agsardeng agingga a saan a nakaruk-at ti Palestine,” kunana.

Idi Mayo 23, nagiyaramid ti grupo ti porum ken martsa iti University of the Philippines-Diliman. Naigiddan daytoy iti maika-8 nga anibersaryo ti panangipataw ni Rodrigo Duterte ti linteg militar ti Mindanao ken panangrebbek iti Marawi City, ti agmaymaysa a syudad nga Islam iti pagilyan, idi 2017.