Agdadata a panangrabngis iti soberanya ti Pilipinas ti presensya ti rinibo a soldado nga Amerikano, Australian ken dadduma pay a gangannaet a tropa iti teritoryo ti pagilyan para iti managprobokar ken dadakkel a war games. Manipud Mayo, tallo ditoy ti aggigiddan nga isaysayangkat ti US, maysa iti kabinnulig daytoy a hukbo ti Australia. Dagitoy ket ti Kamandag (Mayo 26-Hunyo 6), Kasangga (Mayo 19-Hunyo 24) ken Salaknib 2025 Phase 2 (Mayo 19-Hulyo 20).

Naisayangkat ti Kamandag idiay Batanes; idiay Capas, Tarlac nu sadinno a naiyaramid dagiti live-fire drills ken idiay Burgos, Ilocos Norte nu sadinno a naisayangkat ti maysa a maritime strike operation. Adda met dagiti aktibidad idiay Palawan ken dadduma pay a paset ti Luzon ken iti Tawi-tawi idiay Mindanao.

Inaramat dagiti tropa ti US ken Pilipinas ti Navy-Marine Expeditionary Ship Interdiction System (NMESIS) ken High Mobility Artillery Rocket System wenno HIMARS iti Kamandag. Ti NMESIS ket maysa a sistema ti misayl nga anti-ship wenno pangpabettak ti barko. Makarkarga daytoy iti maysa nga unmanned ground vehicle (dakkel a trak) a maaw-awagan a ROGUE Fires Carrier ken addaan karga a Naval Strike Missile (NSM).

Karaman iti war games ti 2,031 soldado ti US Marine Corp ken 2,028 pwersa manipud iti Pilipinas. Adda met dagiti tauhan a militar manipud iti South Korea, Japan ken United Kingdom a makipaspaset iti war games. Agserserbi met a “para paliiw” dagiti tauhan manipud France, Canada, Bahrain, Australia, Indonesia, Thailand ken Netherlands.

Ti Kasangga ket naluktan iti kampo ti 4th ID idiay Cagayan de Oro City ken naisayangkat iti Camp Kibaritan, Kalilangan, Bukidnon.

Kabayatanna, ti Salaknib ti US ken Pilipinas ket madama a maisaysayangkat iti Northern Luzon.

Dagitoy a war games ket maisaysayangkat iti pagilyan tapno irutan ti US ti kontrol daytoy iti AFP, segun iti Communist Party of the Philippines (CPP).

“Supsupyaten ti umili a Pilipino dagitoy a war games. Malaksid iti ituntunda daytoy a peligro kadagiti Pilipino, didigra pay kadagiti residente a mapapaidaman ti pagbiagan tapno wayaan dagiti panagsanay,” segun ken Marco Valbuena, pangulo nga upisyal iti impormasyon ti CPP.

Ti adu ken nasesedsed a war games ken ti panagpakpakaaso-aso ti AFP ken ti rehimen Marcos ti makagapu nu apay nga ibilbilang ti adu a pagilyan iti Asia ti Pilipinas kas proxy wenno mangibagi iti US, segun pay iti CPP. Saan a bulsek dagiti kabangibang a pagilyan iti Asia iti kina-paspasurot ni Marcos ken dagiti heneral daytoy iti direksyon ken plano ti US.