Duha nga sibilyan ha Negros an nahireport nga namatay tungod ha pananamok han militar ha ira mga komunidad hadton Mayo. Samtang, dirudiretso an pangabuso han mga sundalo ha Albay, Masbate, Bohol ngan Metro Manila.

Ha Negros Occidental, nahireport nga namatay an ginang nga hi Lolita Reman ha Sityo Toril, Barangay Bandila, Toboso hadton Mayo 20, bunga han grabe nga kahadlok ngan ugmad ha mga operasyon han 79th IB ha lugar. Ginreyd ngan ginpanhalikwat han mga sundalo han 79th IB an balay nga pananag-iya han pamilya Mahusay diin nakadto an ginang.

Sugad liwat hini nga insidente an nahitabo ha Barangay Minapasok, Calatrava. Gin-atake han stroke an parag-uma nga hi Boyet de Asis hadton Mayo 23 tungod ha pagtarhug ha iya han pito nga sundalo han 79th IB ngan mga traydor nga hira Marlon Basalo ngan Jonel/Mike ha Sityo Kapanuya.

Hadton Mayo 31, piniritay nga ginsakob ngan ginpanhalikwat han mga sundalo han 79th IB an balay han mag-asawa nga Alejandro ngan Maricel Villamero ha Sityo Manaysay, Barangay Cambayobo, Calatrava. Ginkawat han mga sundalo an masobra ₱7,000 nga maiha na nga gintirok nga kwarta han mag-asawa.

Ha Masbate, iginpailarum ha madarahug nga interogasyon han mga sundalo han 96th MICO an 12 nga sibilyan tikang ha Uson, Masbate hadton katapusan nga semana han Mayo. Pirit hira nga ginpapaamin nga mayda hira sumpay ha BHB. Naggrabe an sakit han usa ha mga biktima kahuman han interogasyon ngan kinurian ini magyakan kahuman atakehon han sakit ha kasingkasing ngan diabetes tungod ha kahadlok ngan troma.

Ha Negros Oriental, ginkadto han mga sundalo an balay han parag-uma nga hi Alan Garde ha Barangay Sandayao, Guihulngan City hadton Mayo 15. Pirit nga ginpapaamin hi Garde nga may sumpay ngan nasuporta hiya ha BHB. Hito gihapon nga adlaw, ginsakob han mga sundalo an balay ni Rocky Fat ngan ginpanhalikwat han mga sundalo. Ginpagawas han mga sundalo nga mayda nakumpiska nga armas tikang ha iya ngan gin-atentar nga dakpon kundi nanindugan an iya pamilya kontra hini.

Tikang Mayo 3, iginpailarum han 83rd IB ha baga-balaud militar nga paghahadi an tulo nga barangay ha Caramoan, Camarines Sur. Ginharas, gintarhug ngan gintahapan an mga residente han komunidad, partikular an unom nga indibidwal, nga mga kaurupdan o tagsuporta han BHB. An pira ha mga biktima ginpipirit han militar nga igawas ngan “isurender” an ira mga asawa nga gintatahapan nga Pula nga mangaraway. Pira kabeses liwat piniritay nga ginsakob an balay han mga residente ngan iligal hira nga ginkukuhaan hin litrato han mga sundalo.

Ha Northern Samar, iginpailarum ha hamlet han AFP an mga barangay ha Catubig, Las Navas, Gamay, Mapanas ngan Palapag tikang hadton Hunyo 4. Igin-imponer ini han militar kasunod han ginsesering nga engkwentro han AFP ha BHB hiton nga adlaw ha Barangay Nagoocan, Catubig. Gindidiri nga gumawas han baryo an mga residente bisan pa kun ha kalugaringon nga uma, kasapit nga baryo, o ha bungto la hira makadto. Antes hini, samwak an panmirit han militar ha mga residente ha bungto han Palapag nga “pasurenderon” an ira mga kaurupdan nga gintatahapan nga mangaraway han BHB.

Pangaresto ngan pagsalawad hin hinimu-himo nga kaso. Gin-aresto ha kaso nga illegal possession of firearms and explosives ngan gin-akusaran nga membro han BHB hi “Ruben”, 47, trabahador ha konstruksyon ngan residente han Barangay Namantao, Daraga, Albay. Ginsikmit hiya han mga elemento han 31st IB ha iya balay hadton Mayo 23 ngan gindara ha usa nga bakante nga balay. Nagpabuto hin pusil an mga sundalo para pagawason nga nagkamayda hin engkwentro.

Ha Bohol, nagpasamwak hin buwa nga balita ngan impormasyon an CIDG hadton Mayo 23 kontra kan Carmilo Tabada, konsehal ha usa nga barangay ha bungto han Trinidad. Gin-akusaran hiya nga upisyal ha pinansya han PKP ngan ginsesering nga gin-aresto tungod ha kaso han “terrorism financing.” Iginklaro ni Tabada nga hiya mismo an dinaup ha korte ngan nagpiyansa kasumpay han kaso.