Duha ka sibilyan sa Negros ang nataho nga namatay tungod sa pagpanghasi sa militar sa ilang mga komunidad niadtong Mayo. Samtang padayon ang pagpangabuso sa mga sundalo sa Albay, Masbate, Bohol ug Metro Manila.

Sa Negros Occidental, nataho nga namatay si Nay Lolita Reman sa Sityo Toril, Barangay Bandila, Toboso niadtong Mayo 20, tungod sa grabeng kahadlok ug troma sa mga operasyon sa 79th Infantry Battalion (IB) sa lugar. Gireyd ug giransak sa mga sundalo sa 79th IB ang balay sa pamilya Mahusay diin nagpuyo si Nanay.

Susama nga insidente ang nahitabo sa Barangay Minapasok, Calatrava. Na-stroke si Boyet de Asis, usa ka mag-uuma, niadtong Mayo 23 tungod sa mga hulga gikan sa pito ka sundalo sa 79th IB ug mga traydor nga sila Marlon Basalo (Elan) ug alyas Jonel/Mike sa Sityo Kapanuya.

Niadtong Mayo 31, gipugos pagsulod ug giransak sa mga sundalo sa 79th IB ang balay sa magtiayon nga si Alejandro ug Maricel Villamero sa Sityo Manaysay, Barangay Cambayobo, Calatrava. Gikawat sa mga sundalo ang kapin sa ₱7,000 nga dugay nang tinigum nga kwarta sa magtiayon.

Sa Masbate, gipailalum sa grabeng interogasyon sa mga sundalo sa 96th MICO ang 12 ka sibilyan gikan sa Uson, Masbate sa katapusang semana sa Mayo. Gipugos silang gipaangkon nga aduna silay kalambigitan sa Bagong Hukbong Bayan (BHB). Misamot ang sakit sa usa sa mga biktima human sa interogasyon ug naglisod kini og istorya tungod sa stroke ug diabetes nga resulta sa kahadlok ug troma.

Sa Negros Oriental, giadtoan sa mga sundalo ang balay sa mag-uuma nga si Alan Garde sa Barangay Sandayao, Guihulngan City niadtong Mayo 15. Gipugos si Garde nga mo-angkon nga adunay kalambigitan ug nagasuporta sa BHB. Sa samang adlaw, gisulod ug giransak sa mga sundalo ang balay ni Rocky Fat. Gipagawas sa mga sundalo nga nakakumpiska sila og armas gikan kaniya ug gisulayan siya pagdakop apan mibarog ang iyang pamilya batok niini.

Sugod Mayo 3, gipailalum sa 83rd IB sa daw balaod militar nga paghari ang tulo ka barangay sa Caramoan, Camarines Sur. Giharass, gipanghulga ug giakusahan ang mga residente, partikular ang unum ka indibidwal nga mga paryente o mga tagasuporta sa BHB. Ang uban sa mga biktima gipugos sa militar nga ipagawas ug “isurender” ang ilang mga bana nga giakusahang Pulang manggugubat. Daghang higayon nga gipugos pagsulod ang mga balay sa mga residente ug iligal nga gikuhaan og litrato sa mga sundalo.

Sa Northern Samar, gipailalum sa hamlet sa AFP ang mga barangay sa Catubig, Las Navas, Gamay, Mapanas ug Palapag sugod Hunyo 4. Gipahamtang kini human sa giingong engkwentro sa AFP ug BHB niadtong adlawa sa Barangay Nagoocan, Catubig. Gibawalan ang mga residente nga moadto bisan pa sa ilang uma, silingang baryo, o sa lungsod. Sa wala pa kini, kaylap ang pagpamugos sa militar sa mga residente sa lungsod sa Palapag nga “pasurenderon” ang ilang mga paryente nga giakusahan nga manggugubat sa BHB.

Pag-aresto ug pagsang-at og gama-gamang kaso. Gi-aresto si “Ruben,” 47 anyos, usa ka trabahante sa konstruksyon ug residente sa Barangay Namantao, Daraga, Albay, sa kasong illegal possession of firearms and explosives ug giakusahan nga myembro sa BHB. Gidagit siya sa mga elemento sa 31st IB sa iyang balay niadtong Mayo 23 ug gidala sa usa ka bakanteng balay. Nagpabuto og pusil ang mga sundalo aron ipagawas nga adunay engkwentro.

Sa Bohol, nagpakaylap og pekeng balita ug impormasyon ang CIDG niadtong Mayo 23 batok kang Carmilo Tabada, konsehal sa usa ka barangay sa Trinidad. Giakusahan siyang upisyal sa pinansya sa PKP ug giingong gi-aresto tungod sa kasong “terrorism financing.” Gipatin-aw ni Tabada nga siya mismo ang mitungha sa korte ug nagpyansa bahin sa kaso.