Ha syahan nga 24 kaoras han madugo nga kampanya nga Operation Gideon’s Chariots han US ngan Israel, 144 nga Palestino an napatay dayon ha mga bomba ngan pangatake han tropa hini ha Gaza. Ha sumunod nga mga adlaw, susrunod nga gin-atake han mga pwersa nga Israeli an mga bakwitan ngan nasasalin nga mga ospital ngan eskoylahan agud tabrugon an mga Palestino ngadto ha mga prisuhan nga igin-andam para ha ira. Gatus-gatos ha mga napatay mga bata.

An Operation Gideon’s Chariot, nga gintikangan hadton Mayo 18, an makamaratay nga hampak han Israel ngan US ha yana an 18-kabulan na nga henosidyo ngan 77-katuig nga brutal nga okupasyon hini ha mga teritoryo han Palestine. Katuyuanan hini nga direkta nga sakupon an bug-os nga Gaza ngan prisuhon an aada ha 1.5 kamilyon nga Palestino ha “sentro han ebakwasyon” ha sur nga dapit han engklabo (nakakordon nga teritoryo).

Tikang Oktubre 2023, inabot na ha 63,000 nga Palestino an direkta nga ginpatay ngan 118,300 an nasamaran han panmomba ngan pangatake han Israel. Haros katunga han mga biktima mga bata ngan kababayin-an. Gintatantiya nga gatus-gatos kayukot pa an namatay tungod ha kagutom, sakit ngan kakulang han medikal nga pasilidad. Damo liwat an natagbunan na la han binagsak nga mga bilding ngan balay, nga waray na makit-an o naukab tungod ha waray wantas nga pangatake han Israel.

Paggamit ha pagkaon ngan ayuda komo armas ngan negosyo

Inabot na ha lebel-han-kalamidad an kagutom ha Gaza labina tikang Marso kun kan-o absoluto nga igindiri han Israel an pagsulod han ngatanan nga klase han ayuda. Hadton Mayo, iginhatag hini an responsabilidad ha pagdistribwer han pagkaon ha Gaza Humanitarian Foundation (GHF), usa nga pribado nga kompaniya nga magkabakyang nga igintukod han US ngan Israel agud “perdihon” an Hamas.

Mahugot nga ginsukna han United Nations an paggamit han Israel ha GHF, nga sering hini sukwahi ha angay pagin nyutral, imparsyal ngan independyente han makatawo nga buruhaton. Ginkundenar han UN ngan han damo nga nasud ngan internasyunal nga institusyon, an paggamit han Israel ngan US han ayuda ngan pagkaon komo armas kontra ha mga sibilyan.

Labot ha GHF, ginpasulod liwat han Israel an iba nga pribado nga kompaniya nga Amerikano agud umakto nga “panseguridad nga pwersa” ha mga sentro han distribusyon hini. Kalakip dinhi an Safe Reach Solutions, UG Solutions ngan S.R.S Security Firm, nga ngatanan pananag-iya han mga hadto anay heneral han US Army ngan Central Intelligence Agency. An pagpili hini nga mga kompaniya ginhimo han pinakahitaas nga upisyal han Israel, kabakyang ang US, hin diri gin-aagi bisan ha kada tagsa nira nga parlamento ngan kongreso.

Dirudiretso nga pankalibutan nga mga protesta

Milyun-milyon nga katawhan ha bug-os nga kalibutan an nagkaurusa nga nagprotesta kontra ha panibag-o nga hugna han henosidyo ha Gaza. Panawagan nira an dagmit ngan permanente nga ukoy-bubto ha Gaza ngan pag-undang han brutal nga pangangatake ngan panomba han Zionista nga Israel. Igintuman an mga protesta ha paghandum ha ika-77 nga anibersaryo han Nakba o Ang Sakuna, an syahan nga higayon nga madarahug nga ginpalayas han mga Zionista an mga Palestino tikang ha ira mga tuna agud tukuron an estado han Israel.

Gatus-gatos nga mga paggios an ginhimo ha mga syudad ha Middle East, Europe, Asia, Africa ngan magin ha sakob mismo han US. Damo nga kabatan-unan nga estudyante han US an maisugon nga naglansar han mga protesta ngan diskusyon ha mga unibersidad ha butnga han grabe nga pan-gigipit ha ira.

Ha Pilipinas, nakig-usa an Moro-Christian Peoples Alliance (MCPA) ha pankalibutan nga panawagan han dagmit ngan permanente nga ukoy-bubto ha Gaza.

Sigon kan Amirah Lidasan, pankabug-usan nga sekretaryo han MCPA, “tikang han nautod an ukoy-bubto, an Zionista nga Israel ngan an numero uno hini nga tagapondo waray iginpakita nga kaluoy ha mga kabugtuan nga Palestino.”

Nananawagan hiya ha internasyunal nga komunidad nga padayon nga aghaton an ira mga lider nga maghimo hin aksyon kontra ha waray hunong nga pangatake han Israel. “An katalwasan han usa katalwasan han ngatanan, labina yana ha atubangan han grabe nga pagtalapas ha tawhanon nga katungod, kinahanglan diri kita humunong tubtub nga diri natatalwas an Palestine,” sering niya.

Hadton Marso 23, naghimo an grupo hin porum ngan martsa ha University of the Philippines-Diliman. Nakatuman ini ha ika-8 nga anibersaryo han pag-imponer ni Rodrigo Duterte han balaud militar ha Mindanao ngan pagrumok ha Marawi City, an nag-uusahan nga Islam nga syudad ha nasud, hadton 2017.