Tikang han utro nga liningkod hi Donald Trump komo presidente han US hadin Enero, waray hunong an hiluagan nga pag-atake, panlanat, piniritay ngan arbitraryo nga pagpapalayas o deportasyon ha mga trabahador nga imigrante ha US. Tikang Enero tubtub Mayo inabot hin sobra 271,000 nga mga imigrante an ginpadeport han administrasyon samtang diri mamenos ha 49,184 nga imigrante an nakadetiner yana ha magkalain-lain nga pasilidad han Immigration and Customs Enforcement (ICE) ha US.

Sigon ha embahada han Pilipinas ngan basar ha mga kaso nga katin han Tanggol Migrante, gintatantiya nga diri mamenos ha 30 nga Pilipino nga imigrante an nahireport nga napadeport yana nga tuig. Diri makuha an eksakto nga ihap han nakadetiner o nadeport han ICE tungod kay waray ini igin-gagawas nga impormasyon.

Aada ha 150,000-370,000 an Pilipino nga waray dokumento o iligal nga naukoy ha US.

Sigon ha Bayan USA, diri sadang an ginhihimo nga aksyon han embahada han Pilipinas ha US ngan mga konsulado hini para ha mga Pilipino nga imigrante nga naka-priso ngan nakatalaan nga paulion. Duro an ira pagpasibaya ngan pagbalewaray ha mga Pilipino nga imigrante nga namimiling hin bulig. Bisan an ayuda nga Assistance to the Nationals Fund han embahada iginhikaw ha mga nanginginahanglan.

Atubangan han pagpasibaya han rehimen US-Marcos, padayon an pangampanya ngan pag-oorganisa han mga organisasyon ha US ha pangunguna han Tanggol Migrante, mga alyado nga organisasyon, ngan mga Pilipino ha komunidad. Naglansar hira han magkalain-lain nga aktibidad sugad han press conference, rali, pagbisita ha mga nakadetiner, pagpapadara hin surat ha mga hukmanan ngan pangalap hin donasyon para ha dagmit nga pagpapagawas ha mga igindetiner ngan pagbulig ha ira mga pamilya.

Tungod ha duruyog nga paggios han mga katawhan ha US, nahimo nira nga mapagawas hi Michelle (diri tinuod nga ngaran) hadton Abril 30 ngan hi Lewelyn Dixon hadton Mayo 29, ngaduha igindetiner ha NorthWest ICE Detention Center (NWDC) ha Tacoma, Washington.

Nakadetine pa gihapon ha presente hira Maximo Londorio, Rodante Rivera, Ligaya Jensen ngan Alma Bowman, nga mga residente han US nga pira kadekada na nga naukoy dinhi.

Nanawagan naman an mga demokratiko nga organisasyon ha US hin dagmit nga aksyon tikang ha gubyerno han Pilipinas. Sering nira, kinahanglang hini tagan hin sadang nga suporta an ngatanan nga imigrante, kaupod an naatubang ha deportasyon, trafficking (pamaligya hin tawo) o pangawat hin suhol. Nanawagan liwat hira kan Ambassador Jose Manuel Romualdez nga lumusad nala ha pwesto kun diri niya kaya papelan/igpatuman an iya trabaho nga panalipdan an mga Pilipino ha US.