Bistahon hi Sara Duterte. Nagprotesta ha Senado ha Pasay City an mga progresibo nga grupo hadton Hunyo 3 agud manawagan nga tikangan na an tinuyo nga gindelatar nga pagbista ha kaso nga impeachment ni Vice President Sara Duterte. Ginsukna nira an pagdelatar gamit an damo nga pasangilan han Senado agud tikangan ini. Hatdon Pebrero pa nahisubmiter han House of Representatives an mga artikulo han impeachment.

Paluyu-luyo na liwat an pagsukna ha Senado tungod ha pagtalapas hini bisan ha Konstitusyon nga 1987 tungod ha pagdelatar ha pagbista. Usa na hini an mga propesor han University of the Philippines College of Law. Samtang, nakatalaan maglansar hin hiluagan nga protesta ha Hunyo 11, adlaw han pagbista han Senado ha impeachment, an magkalain-lain nga mga grupo ha pangunguna han Taumbayan Ayaw sa Magnanakaw at Abusado Network Alliance (TAMA NA).

Ato, parupangisda. Naglansar hin fluvial parade o parada han mga baloto an Pamalakaya ngan Save Laguna Lake Movement ha Muntinlupa City hadton Mayo 31, nasyunal nga adlaw han mga parupangisda, agud ipanawagan an pagpapabasura ha mapanhibang nga Laguna Lake Roadshore Network Project ngan 2,000-kektarya nga floating solar power project ha Laguna de Bay.

Hadton Mayo 30, duruyog nga nagmartsa an pira kagatos nga parupangisda, mga tagsuporta ngan tag-undong han kalibungan tipakadto ha Mendiola ha Manila. Nanawagan hira han pagdepensa ha katungod han mga parupangisda, pagtipa ha reklamasyon, ngan pagbawi ha desisyon han Korte Suprema hiunong ha 15-kakilometro nga municipal waters.

Hustisya para kan Junver. Nagdagkot hin mga kandila an mga estudyante han University of Santo Tomas ha kampus hini ha Manila hadton Mayo 29 komo panawagan han hustisya ha pagkamatay ni Junver Toledo, 22, igkasi nira estudyante. Nahireport an pag-unay ni Toledo, usa nga estudyante ha UST College of Rehabilitation Sciences hadton Mayo 17 tungod ha presyur ha pangeskoyla.

Pagawason an mga priso pulitikal. Naglansar hin piket-protesta an Karapatan-National Capital Region ha atubangan han Quezon City Hall of Justice hadton Mayo 20. Panawagan nira nga dagmit nga pagawason ngan ibasura an mga kaso nga illegal possession of firearms and explosives kontra ha mga unyonista nga hira Mark Ryan Cruz, Romina Astudillo, ngan Jaymie Gregorio, nga kaparte han Human Rights Day 7. Nakatalaan an pagbista hiton nga adlaw kundi waray umulpot an hukom tungod kay “nagbabakasyon” kunuhay ini sanglit iginbalhin an pagbista ha Agosto.