Padayon nga natikahilarum ngan natikagrabe an pag-inantos han katawhan Pilipino tungod ha mga programa ngan palisiya han rehimen Marcos nga kontra-kablas, kontra-katawhan ngan pabor ha dagko nga langyaw nga kapitalista ngan mga lokal nira nga ahente, mga agaron maytuna ngan burukrata kapitalista.

Nagpapatakas an pamilya nga Marcos, mga kroni ngan alipures ha pondo ngan pribilehiyo han gubyerno, samtang naluludlod an kinabuhi han mayoriya han mga Pilipino. Patal-ha-pagtrabaho an mga trabahador ngan masa nga anakbalhas. Kulang gud an suhol ngan sweldo atubangan han padayon nga tigda nga paghitaas han presyo ngan mga surukton. Milyun-milyon an waray trabaho. Gutiayay an ginkikita nga nalabay la ha kamot han masa nga kablas. Natikadamo an napipiritan ha kontra-sosyal nga binuhatan para la mayda maipakaon ha ira mga anak.

Nangangalas gud an katawhan ha rehimen Marcos ha kawaray pagpaid hini ha masa nga ludlod ha kakablasan, ngan ha pagpapagrabe hini han krisis ha pakabuhi ngan pagkukuri han katawhan. Nagpapakabungol hi Marcos ha hiluag nga panawagan han katawhan. Ginbabale-waray niya an guliat han hiluag nga masa para ha makaburuhi nga suhol ngan sweldo, trabaho, tinuod nga reporma ha tuna, katungod ha katubigan, pagpapadako han badyet para ha libre nga pankatilingban nga serbisyo ngan para pahiluagon an lokal nga produksyon, ngan iba pa nga kadagmitan nga demanda.

Lugod, libang hi Marcos ha mga pakita-ha-tawo nga pasalida nga waray dara nga kalungganayan ha katawhan, sugad han dako nga drama han pagbalasa ha gabinete (nga tutulo man la an ginsaliwnan), pagpaparayaw ha ₱20 kada kilo nga bugas (nga labot ha pipira la an nagpulos, kadali la), libre nga sakay ha LRT (nga upat kaadlaw la) ngan kun anu-ano pa nga buaw nga gimik (pang-engganyar). Agud uwaton an katawhan, nagpapagawas hi Marcos ngan mga upisyal niya han mga estadistika agud tahuban an padayon nga paggrabe han krisis ha ekonomiya, paghitaas ha presyo han mga papliton, ngan dugang nga pagkaludlod ha kakablasan han milyun-milyon nga Pilipino.

Hul-os an pagtamas-tamas han rehimen Marcos ha katungod ngan pakabuhi han masa nga anakbalhas. Agud kayeron an mga langyaw nga kapitalista nga mamuruhunan, ginraraysang ni Marcos an suhol han mga trabahador agud singabuton an ira barato nga kusog-pagtrabaho. Ha kabaryuhan, gin-gagamit ni Marcos an pasista nga militar agud ighagudalan an hiluagan nga panlulupot han tuna para ha mga plantasyon ngan operasyon nga pagmimina, nga nagpapalayas ha gatus-gatos kayukot nga parag-uma ngan mga nasyunal nga minoriya nga katawhan ha ira tuna. Gin-aagawan hin pakabuhi an parupangisda, mga drayber han dyip, ngan iba pa nga gudti nga nagpapakabuhi. Ha ngaran han pagtitipid, plano ni Marcos nga ibanan an empleyado han gubyerno nga dugang nga magpaparaot ha pampubliko nga serbisyo.

Pakuri na ha katawhan, padayon pa nga iginbubutang ni Marcos ha kadelikaduhan an katalwasan han nasud, tungod ha buta niya nga pag-alagad ha mga dikta han iya imperyalista nga amo nga US. Nagpapagamit hi Marcos ha Indo-Pacific Strategy han US agud palibutan ngan pugngan an pagkusog han China. Nagtitikadamo na an mga base militar ngan pasilidad han US ha Pilipinas agud mag-istasyon han yukut-yukot nga tropa nga Amerikano ha magkalain-lain nga parte han nasud. Iginpapadanas ni Marcos an Pilipinas ha gerra nga karuyag tikangan han US, ha waray hunong nga paglansar han mga pagpapahiara ngan pangandam ha gerra, ngan pag-iistak han nagtitikadamo nga magbakod nga higamit ha gerra han US nga iginpupuntirya ha karibal hini nga China.

Tungod ha pagpapakuri ngan pagtatraydor ha nasud, dugang nga nahihimulag an naghahadi nga rehimen ha katawhan Pilipino. Iginbabandera ni Marcos an Memorandum Circular No 83 agud bug-os-nga-kabangis nga isabrag an pasista nga ngirhat agud puypuyon an pag-ato han katawhan. Kundi diri mapupugngan ni Marcos an pagpasulong han militante nga kagiusan masa tungod kay aada ha luyo hini an damo kaupay katawhan nga determinado nga tapuson an kagutom ngan pagpuypoy.

Ginkokonsolida ni Marcos an iya poder ha pagtudlok han masobra 200 nga heneral ha AFP ngan pagtudlok han mga bag-o nga tawuhan ha mga kompaniya nga katin han gubyerno, samtang ginbabay-og ini han pampulitika nga krisis atubangan han nagpapadayon ngan nagtitikagrabe nga sumpakiay han mga nagriribalay nga barkadahan.

Ha hingyap nga magpabilin ha poder an ira pamilya, karuyag ni Marcos nga hul-os nga rumkon an mga Duterte agud ulangon an larang han iya karibal nga makabalik ha poder ha 2028. Kundi baga gin-uuyagan niya an katawhan ha pag-inatras-abante han iya mga alipures ha Senado ha pagbista han kaso nga impeachment kontra kan Vice President Sara Duterte, paabat han pag-aaregluhay han mga dunot nga reaksyunaryo nga barkadahan. Madagmit nga nalarab an kalayo han kangalas han katawhan ha mga larang nga pugngan an pagbista ngan pabatunon hi Sara Duterte ha pagmalgastar han kwarta han katawhan ngan iba pa nga magbug-at nga sala ha katawhan.

Waray igdudurot nga kalungganayan an burukrata kapitalista, pasista ngan niyutiyo nga rehimen Marcos ha kinabuhi han katawhan Pilipino. Ha butnga han nagtitikatarum nga krisis, waray iba nga mapagpipilian an masa nga nagkukuri ngan tinalumpigos kundi an makigbisog. Iginduduso han sitwasyon an mga trabahador, parag-uma, baga-proletaryado ngan iba pa nga tinalumpigos nga klase ngan sektor nga magkaurusa agud ipakigbisog an ira mga pakabuhi ngan mga demokratiko nga katungod, ngan ipokus an ira kangalas ngan protesta ha rehimen Marcos, ha imperyalismo nga US ngan mga pasista nga kaway hini.

Ha mga pabrika, eskoylahan, ha mga komunidad, ha magkalain-lain nga bungto ngan prubinsya, tudlukon an kadagmitan nga mga problema ngan panawagan han masa. Ha basaranan hini, bug-uson an solido nga kusog han masa ha porma han mga unyon ngan mga asosasyon, ngan isahon an ira kapukawan. Magmartsa o magrali agud igpakita an hiluagan nira nga pagkaurusa ngan paaningalon an ira guliat. Pakusgon o tukuron an mga sanga han Partido ngan mga sikreto nga rebolusyunaryo nga organisasyon masa agud magserbe nga puthaw nga butagtok han hiluag nga masa. Giyahan hira ha ira mga pakigbisog ngan isahon ini ha pag-ato ha naghahadi nga rehimen Marcos.

Kinahanglan magpursige ha pagpapakusog ngan pagpapahiluag han Bagong Hukbong Bayan komo hinganiban han katawhan agud hul-os nga tapuson an sistema nga nagtatalumpigos ngan naniniyupi ha ira. Rekruton an pinakadamo nga trabahador, parag-uma, baga-proletaryado, parupangisda, mga petiburges nga intelektwal agud magserbe nga mga Pula nga mangaraway ngan mga kumander han Bagong Hukbong Bayan.

Atubangan han todo nga kamadarahug ngan brutalidad han naghahadi nga rehimen, madig-on an panindugan han BHB nga ipakig-away an kaupayan ngan katungod han katawhan, ngan an ira makatadungan ngan panmaihaan nga ungara ngan interes. Diri mauuwat ni Marcos an mga rebolusyunaryo nga pwersa bisan pa magsul-ot han maskara nga “kamurayawan” agud itago an pasista nga tango. Mahugot nga kakatinan han mga Pula nga mangaraway an ira mga armas. Andam hira nga umato para ha katawhan tubtub nga mayda dugo nga ig-aawas. Determinado hira nga ipasulong an gerra han katawhan tubtub ha kadaugan.