Nagtirok ha Nairobi, Kenya ha Africa hadton Mayo 23-24 an 110 nga indibidwal nga nagtataglawas ha 28 nga partido nga proletaryo-sosyalista, pormasyon nga kontra-imperyalista, organisasyon ha pangaliskay, ngan progresibo nga kagiusan han katawhan tikang ha 20 nga nasud ha lima nga kontinente para ha usa nga teoretikal nga kumperensya. Ha pangunguna han National Democratic Front of the Philippines (NDFP) ngan han Communist Party Marxist Kenya (CPMK), nagin madinaugon an kumperensya nga nagtalakay ha burukrata ngan kumprador nga kapitalismo ha mga neokolonya.

An kumperensya, nga gin-ngaranan nga Pankalibutan nga Teoretikal nga Kumperensya Hiunong ha Kumprador ngan Burukrata Kapitalismo ha mga Neokolonya, an ikaupat ha serye han mga kumperensya nga iginlansar han NDFP nga nagtalakay ha mga importante nga karukayaknon ha teorya. Ini an syahan nga kumperensya nga iginlansar ha Africa. Gintalakay ha kumperensya an 21 nga artikulo nga ginsurat han mga komunista ngan proletaryo-sosyalista nga partido, ngan mga kontra-imperyalista nga organisasyon nga namumuno ha kagiusan nga pagtatalwas ha Congo, Cyprus, Guatemala, Indonesia, Iraq, Ireland, Kenya, Kurdistan, Nepal, Pakistan, Palestine, Pilipinas, Sudan, South Sudan, Turkey, Uganda, ngan Zambia.

An duha kaadlaw nga kumperensya nagserbe nga higayon para ha pagplastar han Marxista-Leninista nga pag-analisar ha naeksister nga moda han produksyon ha magkalain-lain nga nasud. Partikular nga gin-analisar dinhi an istorikal nga pag-uswag han mga neokolonyal nga katilingban ha ilarum han kontrol han imperyalismo.

Gin-analisar han mga delegado han kumperensya an materyal nga gamot han burukrata-kapitalismo ngan kapitalismo nga kumprador, basar ha mga sinurat nira Lenin ngan Mao hiunong ha bagakolonyal ngan bagapyudal nga paghahadi, sugadman an mga larang ngan pitad han imperyalismo nga US agud mahipabilin an kon-trol ha mga neokolonya.

Gin-adman liwat an papel han magkalin-lain nga klase ha mga neokolonya komo mga lokal nga ahente han pandambong ha ekonomiya, ngan pagpapakaniyutiyo ha pulitika ngan militar ha ngaran han interes han imperyalismo. Pinartisipar an mga delegado ha hilarum nga talakayan para magpahilarum ngan makigbalyuay han pag-analisar ha mga kundisyon nga nag-anak ha mga bagakolonyal ngan bagapyudal nga pankatilingban nga istruktura ha kada ira mga nasud.

Gintalakay liwat an mga praktikal nga karukayaknon nga may kalabutan ha rebolusyunaryo nga buruhaton ngan pagpapasulong han mga kagiusan han katawhan, labina ha konteksto han burukrata-kapitalismo. Gin-analisar han mga delegado an mga estratehiya para ha pag-oorganisa han mga partikular nga klase han katilingban, sugad han bagaproletaryado, ngan gin-adman kun tiunan-o nahuhurma han natikagrabe nga pankalibutan nga krisis ngan natikahilarum nga imperyalista nga agresyon an pag-uswag han mga pwersa nga rebolusyunaryo, ngan han mas hiluag nga Wala nga kagiusan ha ira mga nasud ngan rehiyon.

An artikulo nga iginpasaro tikang ha Pilipinas ginsurat han Komite Sentral han Partido Komunista ng Pilipinas. Ginlaygay han artikulo an kasaysayan han pagbutho han kumprador ngan burukrata kapitalismo ha nasud nga resulta han paghahadi han imperyalismo nga US pinaagi han ahente hini ha ekonomiya ngan pulitika. Iginpaklaro liwat dinhi an papel han kumprador ngan burukrata kapitalista para igpabilin an bagakolonyal ngan bagapyudal nga katilingban Pilipino.

Ha paghuhuman han kumperensya, nagpahayag hin pakikig-usa an mga delegado ha iginselebrar nga African Liberation Day hadton Mayo 25 komo pagsalin-urog ha pagtukod ha Organization of African Unity, nga ha dayuday nagin African Union. Igintukod an OAU para igpasulong an pagkaurusa ngan bubligay han kontra-kolonyal nga mga kagiusan nga pagtatalwas ngan bag-o nga turok nga mga independyente nga gubyerno ha 30 nga nasud nga African hadton dekada 1960.

Ginhandum nira ini komo kaparte han komun nga pakigbisog han gintatalumpigos nga mga katawhan kontra ha imperyalismo ngan ngatanan nga reaksyon. Ginpadig-on han kumperensya an pakig-usa han mga pwersa nga kontra-imperyalista ngan proletaryo-sosyalista ha nagpapadayon nga importansya han mga kagiusan nga pagtatalwas ha Africa nga kaparte han mas hiluag nga mga pakigbisog para ha kalugaringon nga pagdedesisyon ngan sosyalismo.