Butaray nga pagtamak ha soberaniya han Pilipinas an presensya han yukut-yukot nga sundalo nga Amerikano, Australian ngan iba pa nga langyaw nga tropa ha teritoryo han nasud para ha mapansulsol ngan tinagdako nga war games. Tikang Mayo, tulo hini an dudrungan nga iginlalansar han US, usa pinaagi han kapadis hini nga hukbo han Australia. Amo ini an Kamandag (Mayo 26-Hunyo 6), Kasangga (Mayo 19-Hunyo 24) ngan Salaknib 2025 Phase 2 (Mayo 19-Hulyo 20).

Iginlansar an Kamandag ha Batanes; ha Capas, Tarlac diin ginhihimo an live-fire drills ngan ha Burgos, Ilocos Norte diin iginlansar an usa nga maritime strike operation. Mayda gihap mga aktibidad ha Palawan ngan iba pa nga parte han Luzon ngan ha Tawi-tawi ha Mindanao.

Gin-gamit han mga tropa han US ngan Pilipinas an Navy-Marine Expeditionary Ship Interdiction System (NMESIS) ngan High Mobility Artillery Rocket System o HIMARS ha Kamandag. An NMESIS usa nga sistema han misayl nga anti-ship o pampasabog han barko. Nakakarga ini ha usa nga unmanned ground vehicle (dako nga trak) nga gintatawag nga ROGUE Fires Carrier ngan may dara nga Naval Strike Missile (NSM).

Pinartisipar ha war games an 2,031 nga sundalo han US Marine Corp ngan 2,028 nga pwersa nga tikang ha Pilipinas. Mayda liwat mga tawuhan militar tikang ha South Korea, Japan ngan United Kingdom nga napartisipar ha war games. Nagseserbe naman nga mga “tag-obserbar” an mga tawuhan tikang ha France, Canada, Bahrain, Australia, Indonesia, Thailand ngan Netherlands.

Gin-abrihan an Kasangga ha kampo han 4th ID ha Cagayan de Oro City ngan ginhimo ha Camo Kibaritan, Kalilangan, Bukidnon. Diri mamenos ha 90 nga sundalo tikang ha Australian Army ngan 140 nga sundalo han Philippine Army an pinartisipar ha war games. Mag-iiha tubtub Hunyo 24 an Kasangga.

Samtang, an Salaknib han US ngan Pilipinas iginlalansar yana ha Northern Luzon.

Iginlalansar ha nasud ini nga mga war games agud pahugton han US an kontrol hini ha AFP, sigon ha Partido Komunista ng Pilipinas (PKP).

“Natipa an katawhan Pilipino hini nga mga war games. Dugang ha gindadara hini nga peligro ha mga Pilipino, peste pa ini ha residente nga nahihikawan han pakabuhi agud tagan-lugway an mga pagpapahiara,” sigon kan Marco Valbuena, puno nga upisyal ha impormasyon han PKP.

An tinagdamo nga suso nga war games ngan an pagpakaniyutiyo han AFP ngan han rehimen Marcos an rason kun kay ano iginkokonsidera han damo nga nasud ha Asia an Pilipinas komo proxy han US, sigon pa ha PKP. Diri buta an mga kaaramyaw nga nasud ha Asia ha pagin sunud-sunuran ni Marcos ngan mga heneral hini ha direksyon ngan plano han US.