Nagpasidungog an Partido Komunista ng Pilipinas (PKP) kan Kasamang Basavaraju (Nambala Keshave Rao), pankabug-usan nga sekretaryo han Communist Party of India (Maoist), nga namartir kaupod an 27 nga iba pa hadton Mayo 21. Ginpatay hira han mga pwersa han estado han India nga gintawag nga Masaker ha Gundekote, ha Abhujmad ha distrito han Narayanpur ha Chhattisgarh, India.

Nagraranggat yana ang ngaran ni Kasamang Basavaruja ha ranggo han mga imortal nga bayani han epiko han gerra han katawhan ha India ngan han mga rebolusyunaryo nga pakigbisog para ha nasyunal nga katalwasan ngan sosyalismo ha bug-os nga kalibutan. Ginkatinan niya an sulo han armado nga pakig-away ha India ngan nagserbe nga lamrag ha dalan han pankalibutan nga rebolusyunaryo nga proletaryo, labina ha mga naglabay nga dekada han mga kapakyasan ngan kaperdihan han mga sosyalista nga pwersa ha magkalain-lain nga parte han kalibutan.

Hin-o hi Kasamang Basavaraju?

Igin-anak hi Kasamang Basavaraju hadton 1955 ha pamilya han mga parag-uma ha komunidad han Jiyannapetta ha distrito han Srikakulam, Andhra Pradesh nga aada ha sur-este han India. Nag-eskoyla hiya han elementarya ngan hayskul ha ira distrito ngan kinadto ha syudad han Warangal ha kasapit nga estado han Telangana agud mag-aram han inhinyeriya ha kolehiyo.

Samtang aada ha kolehiyo, napukaw hiya ha kamutangan ngan pakigbisog han katawhan Indian rason para magpartisipar hiya ha kagiusan estudyante. Hadton dekada 1980, nagin kaparte ngan pumapel hiya han yawe nga responsabilidad ha CPI (Marxist-Leninist) People’s War. Nagin kaapi hiya han komite sentral han partido hadton 1992.

Hadton 2004, kaupod hiya ha mga nanguna ha pagtitig-ob han CPI (ML) People’s War ngan han Maoist Communist Centre of India (MCCI) agud bug-uson an CPI (Maoist). Usa hiya ha mga nagtukod han hukbo han katawhan han India nga People’s Liberation Guerilla Army (PLGA) hadton 2000. Ginpamunuan niya ini ha maiha nga panahon ngan nanguna ha damo nga kadaugan ha pagbubug-os han mga rebolusyunaryo nga base ngan paglalansar hin mga taktikal nga opensiba kontra ha mga pasista nga pwersa.

Nagserbe hiya nga kaapi han Komite Sentral ha sakob han 33 katuig ngan han Politburo ha sakob han 25 katuig. Ginpamunuan niya ha maiha nga panahon an Sentral nga Komisyon Militar han CPI (Maoist). Hadton urhi nga parte han 2018, igin-eleher hiya ha Komite Sentral komo pankabug-usan nga sekretaryo han CPI (Maoist) ngan sinaliwan ha pamumuno ni Kasamang Ganapathy.

Panawagan para ha hustisya

Hustisya an nagkakaurusa nga guliat han katawhan nga Indian ngan mga internasyunal nga partido ngan organisasyon ha pagpatay kan Kasamang Basavaraju ngan 27 nga iba pa nga mga kasama. Nahirekord ha Masaker ha Gundekote an mga pagtalapas ha internasyunal nga makatawo nga balaud ngan mga pagsurundon ha gerra.

Sigon ha report han Dandakaranya Special Zonal Committee han CPI (Maoist), an 27 nga mga kasama nga kaapi han CPI (Maoist) ngan mangaraway han PLGA napatay ha pag-ensirkulo han yukut-yukot nga militar ngan pulis han reaksyunaryo nga estado ha ira kampo. Iginbuksas han komite nga kahuman han mga agway buhi nga nadakop hi Kasamang Basavaraju ngan tinuyo nga patayon han mga berdugo nga tawuhan han rehimen Modi.

An brutal nga Masaker ha Gundekote kaparte han terorista nga kampanya nga Operation Kagaar. Gintikangan an operasyon hadton Enero 2024 diin ginamit han yukut-yukot nga armado nga pwersa an reaksyunaryo nga estado, nagtindog hin gatus-gatos nga panmilitar nga detatsment ngan nagpatuman han kampanya han pagpatay ngan terorismo kontra prinsipal ha mga Adivasi, o minoriya han India.

Ha presente, ginduduso han magkalain-lain nga demokratiko nga organisasyon ha India an imbestigasyon ha Masaker ha Gundekote. Karuyag nira nga papagbatunon an rehimen Modi ngan mga panmilitar nga upisyal hini ha ura-ura kagrabe nga mga krimen.

Samtang, iginpahayag han Komite Sentral han PKP an hul-os nga pagtapod han Komite Sentral han CPI (Maoist) nga dagmit ini nga mapili han pinuno nga katupong an karit kan Kasamang Basavaraju agud akuon an ginkatinan niya nga mga responsibilidad. Sering han pamunuan, kumpyansa ini nga ha pagtitig-ob han kahibaruan han mga edaran nga kadre ngan han rayhak ngan kabaltok han mga barubata nga kadre, mauungbawan han CPI (Maoist) an ngatanan nga ayat, magpapadayon ha dalan han rebolusyunaryo nga armado nga pakig-away, ngan magkakab-ot hin dugang pa nga kadaugan ha gerra han katawhan ha India.