Sukad nga subling nakalingkod si Donald Trump isip presidente sa US niadtong Enero, walay hunong ang malukpanong pag-atake, pagpanumpo, pugos ug arbitraryong pagpalayas o deportasyon sa mga mamumuong imigrante sa US. Gikan Enero hangtud Mayo, kapin 271,000 na ka mga imigrante ang gipadeport sa administrasyon samtang dili moubos sa 49,184 ang kasamtangang nakadetine sa nagkalain-laing pasilidad sa Immigration and Customs Enforcement (ICE) sa US.

Sumala sa embahada sa Pilipinas ug base sa mga kasong gihuptan sa Tanggol Migrante, gibanabana nga dili moubos sa 30 ka Pilipinong imigrante ang nareport nga napadeport karong tuiga. Dili makuha ang eksaktong ihap sa mga nakadetine o napadeport sa ICE tungod kay wala kini nagpagawas og impormasyon.

Mokabat sa 150,000 hangtud 370,000 ka Pilipino nga walay dokumento o iligal nga nagpuyo sa US.

Sumala sa Bayan USA, kulang ang gibuhat nga aksyon sa embahada sa Pilipinas sa US ug sa mga konsulado niini alang sa mga Pilipinong imigranteng nakabilanggo ug nakatakdang ipapauli. Grabe ang ilang pagpasagad ug kawalay pagtagad sa mga Pilipinong imigrante nga nanginahanglan og tabang. Bisan ang ayuda gikan sa Assistance to the Nationals Fund sa embahada gihikaw sa mga nanginahanglan.

Atubangan sa pagpasagad sa rehimeng US-Marcos, padayon ang kampanya ug pag-organisa sa mga organisasyon sa US nga gipangulohan sa Tanggol Migrante, mga alyadong grupo, ug mga Pilipino sa komunidad. Naglunsad sila og lain-laing aktibidad sama sa press conference, rali, pagbisita sa mga nakadetine, pagpanghatag og sulat sa mga korte, ug pagpangalap og donasyon alang sa hinanaling pagpagawas sa mga gidetine ug pagtabang sa ilang mga pamilya.

Tungod sa hiniusang paglihok sa mga katawhan sa US, napagawas nila si Michelle (dili tinuod nga ngalan) niadtong Abril 30 ug si Lewelyn Dixon niadtong Mayo 29, parehong gidetine sa NorthWest ICE Detention Center (NWDC) sa Tacoma, Washington.

Padayon nga nakadetine karon sila Maximo Londorio, Rodante Rivera, Ligaya Jensen, ug Alma Bowman, mga residente sa US nga dugay nang nagpuyo dinhi.

Nanawagan usab ang mga demokratikong organisasyon sa US og hinanaling aksyon gikan sa gubyerno sa Pilipinas. Matud nila, kinahanglan hatagan og igong suporta ang tanang imigrante, lakip na ang mga nag-atubang og deportasyon, trafficking, o pagpangawat sa sweldo. Nanawagan usab sila kang Ambassador Jose Manuel Romualdez nga moluwat na sa iyang posisyon kung dili niya kaya ang pagpanalipud sa mga Pilipino sa US.