Taralon si Sara Duterte. Nagprotesta sa Senado sa Pasay City ang mga progresibong grupo niadtong Hunyo 3 aron manawagan nga sugdan na ang dugay nang gilangan nga pagtaral sa kaso sa impeachment ni Vice President Sara Duterte. Gimakmak nila ang paglangan pinaagi sa daghang palusot sa Senado aron mapugngan ang pagsugod niini. Niadtong Pebrero pa gisumite sa House of Representatives ang mga artikulo sa impeachment.

Daghan na usab ang nagmakmak sa Senado tungod sa paglapas niini bisan sa 1987 Konstitusyon tungod sa paglanganlangan sa pagtaral. Lakip na dinhi ang mga propesor sa University of the Philippines College of Law. Samtang nagkatakdang maglunsad ang lain-laing grupo og lapad nga protesta sa Hunyo 11, adlaw sa pagdungog sa Senado sa impeachment, nga gipangulohan sa Taumbayan Ayaw sa Magnanakaw at Abusado Network Alliance (TAMA NA).

Sukol, mangingisda. Naglunsad og fluvial parade o parada sa mga bangka ang Pamalakaya ug Save Laguna Lake Movement sa Muntinlupa City niadtong Mayo 31, nasudnong adlaw sa mga mangingisda, aron ipanawagan ang pagbasura sa makadaut nga Laguna Lake Roadshore Network Project ug 2,000-ektaryang floating solar power project sa Laguna de Bay.

Niadtong Mayo 30, nagmartsa ang gatusan ka mga mangingisda, mga tigsuporta ug mga tigpanalipud sa kinaiyahan padulong sa Mendiola sa Manila. Nanawagan sila sa pagpanalipud sa katungod sa mga mangingisda, pagsupak sa reklamasyon, ug pagbawi sa desisyon sa Korte Suprema bahin sa 15-kilometrong municipal waters.

Hustisya para kang Junver. Nag-ogbok og mga kandila ang mga estudyante sa University of Santo Tomas sa ilang kampus sa Manila niadtong Mayo 29 isip panawagan sa hustisya sa pagkamatay ni Junver Toledo, 22. Nataho nga nagpakamatay si Toledo, usa ka estudyante sa UST College of Rehabilitation Sciences niadtong Mayo 17 tungod sa presyur sa pag-eskwela.

Buhian ang mga bilanggong pulitikal. Naglunsad og piket-protesta ang Karapatan-National Capital Region atubangan sa Quezon City Hall of Justice niadtong Mayo 20. Panawagan nila nga hinanaling buhian ug ibasura ang mga kaso sa illegal possession of firearms and explosives batok sa mga unyonista nga sila Mark Ryan Cruz, Romina Astudillo, ug Jaymie Gregorio, nga kabahin sa Human Rights Day 7. Nakatakda ang pagdungog niadtong adlawa apan wala motungha ang tigtaral tungod kay “nagbakasyon” maong giusab ang iskedyul sa pagdungog ngadto sa Agosto.