Dayag nga pagyatak sa soberanya sa Pilipinas ang presensya sa liboan ka sundalong Amerikano, Australian ug uban pang langyawng tropa sa teritoryo sa nasud alang sa mga mahagiton ug dagkung war games. Sukad Mayo, tulo dinhi ang dungan nga gipahigayon sa US, ang usa gilunsad sa hukbo sa Australia. Kini mao ang Kamandag (Mayo 26-Hunyo 6), Kasangga (Mayo 19-Hunyo 24) ug Salaknib 2025 Phase 2 (Mayo 19-Hulyo 20).

Gipahigayon ang Kamandag sa Batanes; sa Capas, Tarlac diin gihimo ang live-fire drills; ug sa Burgos, Ilocos Norte diin gipahigayon ang usa ka maritime strike operation. Aduna usab mga aktibidad sa Palawan ug sa ubang bahin sa Luzon ug sa Tawi-tawi sa Mindanao.

Gigamit sa mga tropa sa US ug Pilipinas ang Navy-Marine Expeditionary Ship Interdiction System (NMESIS) ug High Mobility Artillery Rocket System o HIMARS sa Kamandag. Ang NMESIS usa ka sistema sa missile nga anti-ship o pangpabusikad sa barko. Gikarga kini sa usa ka unmanned ground vehicle (dakung trak) nga gitawag og ROGUE Fires Carrier ug adunay dala nga Naval Strike Missile (NSM).

Lakip sa war games ang 2,031 ka sundalo sa US Marine Corps ug 2,028 ka pwersa gikan sa Pilipinas. Aduna usab mga sundalo gikan sa South Korea, Japan ug United Kingdom nga nag-apil sa war games. Ang mga tropa gikan sa France, Canada, Bahrain, Australia, Indonesia, Thailand ug Netherlands nagsilbing mga “obserber.”

Ang Kasangga gisugdan sa kampo sa 4th ID sa Cagayan de Oro City ug gihimo sa Camp Kibaritan, Kalilangan, Bukidnon. Dili moubos sa 90 ka sundalo gikan sa Australian Army ug 140 ka sundalo sa Philippine Army ang apil sa war games. Magpadayon kini hangtud Hunyo 24.

Samtang ang Salaknib sa US ug Pilipinas kasamtangang gipahigayon sa Northern Luzon.

Kini nga mga war games gipahigayon sa nasud aron mapalig-on sa US ang kontrol niini sa AFP, sumala sa Partido Komunista ng Pilipinas (PKP).

“Supak ang katawhang Pilipino sa maong mga war games. Dugang sa dala niining peligro sa mga Pilipino, dangan pa kini sa mga residente nga nahikawan sa ilang panginabuhi aron hatagan og dalan ang mga pagbansay,” matud pa ni Marco Valbuena, nangulong upisyal sa impormasyon sa PKP.

Ang dinaghan ug subsub nga war games ug ang pagpakaitoy sa AFP ug sa rehimen ni Marcos mao ang hinungdan nganong giila sa daghang nasud sa Asia ang Pilipinas isip proxy sa US, dugang pa sa PKP. Dili buta ang mga kasikbit nga nasud sa Asia sa pagsunud-sunod ni Marcos ug sa iyang mga heneral sa direksyon ug plano sa US.