Sa unang 24 ka oras sa madugong kampanya nga Operation Gideon’s Chariots sa US ug Israel, 144 ka Palestino ang dihadihang napatay sa mga pagpamomba ug atake sa ilang mga tropa sa Gaza. Sa sunod nga mga adlaw, sunod-sunod nga giatake sa pwersang Israeli ang mga bakwitanan ug nabilin nga mga ospital ug eskwelahan aron pugson ang mga Palestino nga moadto sa mga prisohan nga giandam para nila. Gatusan sa mga napatay, mga bata.

Ang Operation Gideon’s Chariots, nga gisugdan niadtong Mayo 18, mao ang ulahing hampak sa Israel ug US karon sa 18-ka-bulan nga henosidyo ug 77-ka-tuig nga brutal nga okupasyon sa mga teritoryo sa Palestine. Tumong niini nga direktang sakupon ang tibuok Gaza ug prisohon ang halos 1.5 milyong Palestino sa “sentro sa ebakwasyon” sa habagatang bahin sa engklabo.

Sukad Oktubre 2023, mikabat na sa 63,000 ka Palestino ang direktang gipatay ug 118,300 ang nasamdan tungod sa pagpamomba ug atake sa Israel. Halos katunga sa mga biktima mga bata ug kababayen-an. Gibanabana nga gatusan ka libo pa ang namatay tungod sa kagutom, sakit, ug kakulang sa medikal nga pasilidad. Daghan usab ang natabunan sa mga naguba nga mga bilding ug balay, nga wala na makita o nakalot tungod sa walay hunong nga atake sa Israel.

Paggamit sa pagkaon ug ayuda isip armas ug negosyo

Nakaabot na sa ang-ang katalagman ang kagutom sa Gaza ilabina sukad Marso diin hingpit nga gipugngan sa Israel ang pagsulod sa tanang klase sa ayuda. Niadtong Mayo, gihatag niini ang responsibilidad sa pag-apud-apud sa pagkaon sa Gaza Humanitarian Foundation (GHF), usa ka pribadong kumpanya nga gimugna sa US ug Israel aron “pukanon” ang Hamas.

Hugot nga gimakmak sa United Nations ang paggamit sa Israel sa GHF, nga matud niini supak sa unta pagka neutral, patas ug independyente sa mga makitawhanong gimbuhaton. Gikundena sa UN ug daghang nasud ug internasyunal nga institusyon ang paggamit sa Israel ug US sa ayuda ug pagkaon isip armas batok sa mga sibilyan.

Gawas sa GHF, gipasulod usab sa Israel ang ubang pribadong kumpanyang Amerikano aron molihok isip “pwersang pangseguridad” sa mga sentro sa distribusyon niini. Apil niini ang Safe Reach Solutions, UG Solutions ug S.R.S. Security Firm, nga tanan pagpanag-iya sa mga kanhi heneral sa US Army ug Central Intelligence Agency. Ang pagpili sa mga kumpanya gihimo sa labing taas nga upisyal sa Israel, kauban ang US, nga wala na gipaagi sa ilang tagsa-tagsa ka parlamento ug kongreso.

Padayon nga internasyunal nga mga protesta

Milyun-milyong katawhan sa tibuok kalibutan ang hiniusang nagprotesta batok sa bag-ong hugna sa henosidyo sa Gaza. Panawagan nila ang hinanali ug permanenteng hunong-buto sa Gaza ug pagtapos sa brutal nga pag-atake ug pagpamomba sa Zionistang Israel. Gipahigayon ang mga protesta isip paghinumdum sa ika-77 ka anibersaryo sa Nakba o Ang Dakung Katalagman, ang unang bangis nga pagpalayas sa mga Zionista sa mga Palestino gikan sa ilang mga yuta aron tukuron sa estado sa Israel.

Gatusan ka mga protesta ang gihimo sa mga syudad sa Middle East, Europe, Asia, Africa ug bisan sulod sa US. Daghang kabatan-onang estudyante sa US ang nangahas sa paglunsad og mga protesta ug diskusyon sa mga unibersidad bisan pa sa grabeng pagpanglutos kanila.

Sa Pilipinas, nakighiusa ang Moro-Christian Peoples Alliance (MCPA) sa kalibutanong panawagan alang sa hinanali ug permanenteng hunong-buto sa Gaza.

Matud ni Amirah Lidasan, kinatibuk-ang kalihim sa MCPA, “sukad nga naputol ang hunong-buto, ang Zionistang Israel ug ang numero uno nga tigpundo niini wala magpakita og kaluoy sa mga igsoong Palestino.”

Nanawagan siya sa internasyunal nga komunidad nga ipadayon ang pagpangumbinsi sa ilang mga lider nga buhaton ang aksyon batok sa walay hunong nga pag-atake sa Israel. “Ang kagawasan sa usa mao ang kagawasan sa tanan, ilabina karon nga nag-atubang ta sa grabeng paglapas sa tawhanong katungod, dili kita dapat mohunong hangtud nga dili makab-ot ang kagawasan sa Palestine,” matud niya.

Niadtong Mayo 23, nagpahigayon ang grupo og forum ug martsa sa University of the Philippines-Diliman. Giatol kini sa ika-8 ka anibersaryo sa pagpahamtang ni Rodrigo Duterte sa balaod militar sa Mindanao ug pagpulbos sa Marawi City, ang nag-inusarang syudad nga Islam sa nasud, niadtong 2017.