Nagtigum sa Nairobi, Kenya sa Africa niadtong Mayo 23-24 ang 110 ka indibidwal nga mirepresentar sa 28 ka partido proletaryo-sosyalista, pormasyong anti-imperyalista, mga organisasyon sa panukiduki, ug progresibong kalihukan sa katawhan gikan sa 20 ka nasud sa lima ka kontinente alang sa usa ka teoretikanhong kumperensya. Sa pagpasiugda sa National Democratic Front of the Philippines (NDFP) ug sa Communist Party Marxist Kenya (CPMK), malampuson ang kumperensya nga nagtuki sa kumprador ug burukratang kapitalismo sa mga neokolonya.

Ang kumperensya, nga ginganlan og Internasyunal nga Teoretikanhong Kumperensya Mahitungod sa Kumprador ug Burukratang Kapitalismo sa mga Neokolonya, mao ang ika-upat sa serye sa mga kumperensyang gipasiugdahan sa NDFP nga nagtuki sa mga mahinungdanong isyu sa teorya. Kini ang unang kumperensya nga gihimo sa Africa. Gihisgutan sa kumperensya ang 21 ka artikulo nga gisulat sa mga komunista ug proletaryo-sosyalistang partido, ug mga anti-imperyalistang organisasyon nga nangulo sa malingkawasnong kalihukan sa Congo, Cyprus, Guatemala, Indonesia, Iraq, Ireland, Kenya, Kurdistan, Nepal, Pakistan, Palestine, Pilipinas, Sudan, South Sudan, Turkey, Uganda, ug Zambia.

Ang duha ka adlaw nga kumperensya nagsilbing higayon alang sa pagpresentar sa Marxista-Leninistang pagsusi sa nagtunhay nga moda sa produksyon sa lain-laing mga nasud. Partikular nga gisusi dinhi ang historikal nga paglambo sa mga neokolonyal nga katilingban ubos sa kontrol sa imperyalismo.

Gitun-an sa mga delegado sa kumperensya ang materyal nga ugat sa burukratang kapitalismo ug kapitalismong kumprador, base sa mga sinulat ni Lenin ug Mao bahin sa semikolonyal ug semipyudal nga paghari, ingonman ang mga plano ug lakang sa imperyalismong US aron mapabilin ang kontrol sa mga neokolonya.

Gisusi usab ang papel sa lain-laing hut-ong sa mga neokolonya isip lokal nga mga ahente sa pagpangawkaw sa ekonomiya, ug pagsunod sa pulitika ug militar alang sa interes sa imperyalismo. Misalmot ang mga delegado sa lalum nga diskusyon aron mapalalum ug mapalapad ang pagsabot sa mga kondisyon nga naghimugso sa mga katilingbanong istruktura sa semikolonyal ug semipyudal sa tagsa-tagsa nilang mga nasud.

Gihisgutan usab ang mga praktikal nga isyu nga may kalabutan sa rebolusyonaryong kalihukan ug pagpalambo sa mga kalihukang masa, ilabina sa konteksto sa burukratang kapitalismo. Gisusi sa mga partisipante ang mga estratehiya sa pag-organisa sa mga partikular nga hut-ong sa katilingban, sama sa semi-proletaryado, ug gi-analisa kung giunsa paghulma sa nagkagrabeng krisis sa kalibutan ug nagkalalum nga imperyalistang agresyon ang pag-uswag sa mga pwersang rebolusyonaryo, ug sa mas lapad nga kalihukang Walhon sa ilang mga nasud ug rehiyon.

Ang artikulo nga gipaambit gikan sa Pilipinas gisulat sa Komite Sentral sa Partido Komunista ng Pilipinas. Gisubay sa artikulo ang kasaysayan sa pagtumaw sa kumprador ug burukratang kapitalismo sa nasud nga resulta sa paghari sa imperyalismong US pinaagi sa mga ahente niini sa ekonomiya ug pulitika. Gipatin-aw usab niini ang papel sa kumprador ug burukratang kapitalista aron ipabilin ang semikolonyal ug semipyudal nga katilingbang Pilipino.

Sa pagtapos sa kumperensya, nagpadayag ang mga delegado og pakighiusa sa gipahigayon nga African Liberation Day niadtong Mayo 25 isip paghinumdom sa pagtukod sa Organization of African Unity, nga nahimong African Union. Gitukod ang OAU aron iasdang ang panaghiusa ug kooperasyon sa mga anti-kolonyal nga mga malingkawasnong kalihukan ug pagtunhay sa bag-ong mga independyenteng gubyerno sa 30 ka mga nasud sa Africa niadtong 1960s.

Gitan-aw nila kini nga kabahin sa komun nga pakigbisog sa mga gipanglutos nga katawhan batok sa imperyalismo ug tanang reaksyunaryo. Gipanghimatuud sa kumperensya ang pakighiusa sa mga pwersang anti-imperyalista ug proletaryo-sosyalista sa nagpadayon nga kamahinungdanon sa mga malingkawasnong kalihukan sa Africa nga kabahin sa mas halapad nga mga pakigbisog alang sa kaugalingong paghukum ug sosyalismo.