Padayon nga nagkalalum ug nagkagrabe ang pag-antus sa katawhang Pilipino tungod sa mga programa ug palisiya sa rehimeng Marcos nga kontra-kabus, kontra-katawhan ug pabor sa dagkung langyawng kapitalista ug mga lokal nilang ahente, mga agalong yutaan ug burukrata-kapitalista.

Nagpakatagbaw ang pamilyang Marcos, mga kroni ug alipures sa pondo ug pribilehiyo sa gubyerno, samtang mius-us ang panginabuhi sa mayorya ng mga Pilipino. Daw kabaw sa grabeng pagpaningkamot ang mga mamumuo ug masang anakpawis. Kulang kaayo ang sahulan ug sweldo atubangan sa padayon nga pagsaka sa presyo ug singil sa serbisyo. Milyun-milyon ang walay trabaho. Mumho ang kita ug moagi lamang sa palad sa masang nag-antus. Nagkadaghan ang napugos maghimo og iligal aron lamang adunay mapakaon sa ilang mga anak.

Hilabihan ang kasilag sa katawhan sa rehimeng Marcos sa kawalay pagtagad niini sa masang nag-ilaid sa kalisud, ug sa pagpasamot niini sa krisis sa panginabuhian ug pag-antus sa katawhan. Nagpabungulbungol si Marcos sa lapad nga mga panawagan sa katawhan. Ginabalewala niya ang singgit sa lapad nga masa alang sa makabuhing suhulan ug sweldo, trabaho, tinuod nga reporma sa yuta, katungod sa katubigan, pagpadaku sa badyet alang sa libreng katilingbanong serbisyo ug aron palapdon ang lokal nga produksyon, ug uban pang hinanaling pangayo.

Hinunua, nagpuliki si Marcos sa mga gimik nga walay kapuslanan sa katawhan, sama sa dakung drama sa pagbalasa sa gabinete (nga tulo lang ang gipulihan), pagpanghinambog sa ₱20 kada kilo sa bugas (gawas nga pipila lamang ang nakabenepisyo, kadyot ra pud kaayo), libreng sakay sa LRT (nga upat ka adlaw lang) ug bisan unsa pang haw-ang nga mga pakulo. Aron linglahon ang katawhan, nagpagula si Marcos ug mga upisyal niya og mga estadistika aron tabunan ang padayon nga paggrabe sa krisis sa ekonomiya, pagtaas sa presyo sa mga palaliton, ug labawng pag-antus sa milyun-milyong Pilipino sa kalisud.

Grabe ang pagyatak sa rehimeng Marcos sa katungod ug panginabuhi sa masang anakpawis. Aron agnihon ang mga langyawng kapitalistang tigpamuhunan, ginalansang ni Marcos ang suhulan sa mga mamumuo aron pahimuslan ang ilang baratong kusog-pamuo. Sa kabanikanhan, ginagamit ni Marcos ang pasistang militar aron hatagag-dalan ang malukpanong pagpangawkaw sa yuta alang sa mga plantasyon ug minahan, nga nagpalayas sa gatusan ka libong mag-uuma ug mga minoryang katawhan sa ilang yuta. Ginailugan og panginabuhian ang mangingisda, mga drayber sa dyip, ug uban pang mga kabus nga nanginabuhi. Sa ngalan sa pagdaginot, plano ni Marcos nga kibhangan ang empleyado sa gubyerno nga labawng magpagrabe sa pangpublikong serbisyo.

Paantus na gani sa katawhan, padaton pang ginabutang ni Marcos sa alaot ang siguridad sa nasud, tungod sa buta niyang pagsunudsunod sa mga dikta sa iyang amo nga imperyalistang US. Nagpagamit si Marcos sa Indo-Pacific Strategy sa US aron liyukan ug pugngan ang pagkusog sa China. Nagkadaghan ang mga base militar ug pasilidad sa US sa Pilipinas aron magbubo og libuan ka tropang Amerikano sa lain-laing bahin sa nasud. Ginaguyod ni Marcos ang Pilipinas sa gubat nga gustong paulbuhon sa US, sa walay gintang nga paglunsad og mga pagbansay ug pagpangandam og gubat, ug paghan-ok sa nagkadaghang kusog nga himang iggugubat sa US nga gination ngadto sa karibal niining China.

Tungod sa pagpaantus ug pagluib sa katawhan, labaw nga nahimulag ang nagharing rehimen sa katawhang Pilipino. Giwarawara ni Marcos ang Memorandum Circular No 83 aron hingpit nga isabwag ang pasistang kabangis aron sumpuon ang pagsukol sa katawhan. Apan dili mapugngan ni Marcos ang pag-abante sa militanteng kalihukang masa tungod kay anaa sa likod niini ang katawhang determinadong tapuson ang kagutom ug kaulipnan.

Ginakonsolida ni Marcos ang iyang poder sa pagtuboy sa kapin 200 ka heneral sa AFP ug pagtudlo sa mga bag-ong upisyal sa mga kumpanyang gunit sa gubyerno, samtang ginayugyog kini sa pulitikanhong krisis atubangan sa nagpadayon ug nagkagrabeng bangi sa mga magkaaway nga paksyon.

Sa tinguhang ipabilin sa poder ang ilang pamilya, gusto ni Marcos nga hingpit nga pukanon ang mga Duterte aron pugngan ang plano sa iyang karibal nga makabalik sa poder sa 2028. Apan daw giduladulaan niya ang katawhan sa paghatag-bawi sa iyang mga alipures sa Senado sa pagtaral sa kasong impeachment batok kang Vice President Sara Duterte, timaan sa pakig-areglohay sa mga dunot nga reaksyunaryong paksyon. Paspas nga mikuyanap ang kalayo sa kasuko sa katawhan sa mga pagsulay nga pugngan ang pagtaral ug pagpanubag kang Sara Duterte sa pagwaldaw sa kwarta sa katawhan ug uban pang bug-at nga salaod.

Walay ihatag nga alibyu ang burukrata-kapitalista, pasista ug papet nga rehimeng Marcos sa kinabuhi sa katawhang Pilipino. Taliwala sa nagkagrabeng krisis, walay laing kapilian ang masang kabus ug pinihig kundili ang makigbisog. Ginatukmod sa sitwasyon ang mga mamumuo, mag-uuma, semi-proletaryado ug uban pang nilupigang hut-ong ug sektor nga maghugpong aron panalipdan ang ilang mga panginabuhian ug mga demokratikong katungod, ug ipunting ang ilang kasilag ug protesta sa rehimeng Marcos, sa imperyalismong US ug mga pasistang gaway niini.

Sa mga pabrika, eskwelahan, sa mga baryo, sa lain-laing lungsod ug prubinsya, ilhon ang hinanaling mga problema ug panawagan sa masa. Tukuron dinhi ang solidong kusog sa masa sa porma sa mga unyon ug mga kahugpungan, ug ipataas ang ilang kahimatngon. Magmartsa o magrali aron ipakita ang lapad nilang panaghiusa ug palanugon ang ilang mga singgit. Pakusgon o tukuron ang mga sanga sa Partido ug mga tago nga rebolusyonaryong organisasyong masa aron magsilbing puthaw nga dugukan sa lapad nga masa. Giyahan sila sa ilang mga pakigbisog ug ipataas kini sa pagbatok sa nagharing rehimeng Marcos.

Kinahanglang manglimbasog sa pagpakusog ug pagpalapad sa Bagong Hukbong Bayan (BHB) isip armas sa katawhan aron hingpit nga tapuson ang sistemang nangdaugdaug ug nagpahimulos kanila. Rekruton ang pinakadaghang mamumuo, mag-uuma, semi-proletaryado, mangingisda, mga petiburges nga intelektwal aron magsilbing mga Pulang manggugubat ug mga kumander sa Bagong Hukbong Bayan.

Atubangan sa todong kabangis ug brutalidad sa nagharing rehimen, lig-on ang baruganan sa BHB nga depensahan ang kaayuhan ug katungod sa masa, ug ang ilang makatarunganon ug malungtarong pangayo ug interes. Wala nalingla ni Marcos ang mga rebolusyonaryong pwersa bisan og magsuot kini og maskarang “kalinaw” aron itago ang pasistang bangkil. Hugot nga huptan sa mga Pulang manggugubat ang ilang mga armas. Andam silang mosukol alang sa katawhan hangtud sa ulahing gutlo sa ilang kinabuhi. Determinado silang iasdang ang gubat sa katawhan hangtud sa kadaugan.