Gipasidunggan ang Partido Komunista ng Pilipinas (PKP) si Kaubang Basavaraju (Nambala Keshava Rao), pangkinatibuk-ang kalihim sa Communist Party of India (Maoist), nga namartir uban sa 27 pa ka mga kauban niadtong Mayo 21. Gipatay sila sa mga pwersa sa estado sa India sa gitawag nga Masaker sa Gundekote, sa Abhujmad sa distrito sa Narayanpur sa Chhattisgarh, India.

Naggilak karon ang ngalan ni Kaubang Basavaraju sa han-ay sa mga imortal nga bayani sa epikong gubat sa katawhan sa India ug sa mga rebolusyonaryong pakigbisog alang sa nasudnong kagawasan ug sosyalismo sa tibuok kalibutan. Gidala niya ang sulo sa armadong pakigbisog sa India ug nagsilbing iwag sa dalan sa tibuok kalibutan nga rebolusyong proletaryo, ilabina sa mga milabayng dekada sa mga kapakyasan ug pagkapildi sa mga pwersang sosyalista sa lain-laing bahin sa kalibutan.

Kinsa si Kaubang Basavaraju?

Natawo si Kaubang Basavaraju niadtong 1955 sa usa ka pamilya sa mga mag-uuma sa komunidad sa Jiyannapetta sa distrito sa Srikakulam, Andhra Pradesh nga nahimutang sa habagatang-sidlakang bahin sa India. Nag-eskwela siya sa elementarya ug hayskul sa ilang distrito ug miadto sa syudad sa Warangal sa silingang estado sa Telangana aron mag-eskwela og engineering sa kolehiyo.

Samtang naa sa kolehiyo, nahigmata siya sa kahimtang ug pakigbisog sa katawhang Indian, hinungdan nga misalmot siya sa kalihukang estudyante. Niadtong dekada 1980, nahimong kabahin siya ug miako og yaweng katungdanan sa CPI (Marxist-Leninist) People’s War. Nahimong myembro siya sa sentral nga komite sa partido niadtong 1992.

Niadtong 2004, usa siya sa nanguna sa paghiusa sa CPI (ML) People’s War ug sa Maoist Communist Centre of India (MCCI) aron tukuron ang CPI (Maoist). Usa siya sa mga nagtukod sa People’s Liberation Guerilla Army (PLGA), ang hukbong bayan sa India, niadtong 2000. Gipangulohan niya kini sulod sa taas nga panahon ug nanguna sa daghang kalampusan sa pagtukod sa mga rebolusyonaryong base ug pagpasiugda sa mga taktikal nga opensiba batok sa mga pwersang pasista.

Nagsilbi siya isip myembro sa Komite Sentral sulod sa 33 ka tuig ug sa Politburo sulod sa 25 ka tuig. Gipangulohan niya sulod sa taas nga panahon ang Sentral nga Komisyong Militar sa CPI (Maoist). Niadtong katapusang bahin sa 2018, gipili siya sa Komite Sentral isip pangkinatibuk-ang kalihim sa CPI (Maoist) ug mipuli sa liderato ni Kaubang Ganapathy.

Panawagan alang sa hustisya

Hustisya ang nagkahiusang singgit sa katawhang Indian ug sa mga internasyunal nga partido ug organisasyon sa pagpatay kang Kaubang Basavaraju ug sa 27 pa ka mga kauban. Nataho sa Masaker sa Gundekote ang mga paglapas sa internasyunal nga balaod sa tawhanong katungod ug mga lagda sa gubat.

Sumala sa report sa Dandakaranya Special Zonal Committee sa CPI (Maoist), ang 27 ka mga kauban nga myembro sa CPI (Maoist) ug manggugubat sa PLGA napatay sa pagliyok sa libu-libong militar ug pulis sa reaksyunaryong estado sa ilang kampo. Gipadayag sa komite nga human sa mga pakig-away, nadakpan nga buhi si Kaubang Basavaraju ug tinuyong gipatay sa mga berdugong sundalo sa rehimeng Modi.

Ang brutal nga Masaker sa Gundekote kabahin sa teroristang kampanya nga Operation Kagaar. Gisugdan ang operasyon niadtong Enero 2024 diin gigamit ang libo-libong armadong pwersa sa reaksyunaryong estado, nagtukod og gatusan ka mga detatsment militar ug nagpahigayon og kampanya sa pagpamatay ug terorismo batok sa mga Adivasi, o katutubo sa India.

Karon, gipangusgan sa lain-laing demokratikong organisasyon sa India ang imbestigasyon sa Masaker sa Gundekote. Gitinguha nila nga panubagon ang rehimeng Modi ug ang mga upisyal militar niini sa grabeng mga krimen.

Samtang, gipahayag sa Komite Sentral sa PKP ang hingpit nga pagsalig sa Komite Sentral sa CPI (Maoist) nga makapili dayon sila og usa ka lider nga makapuli kang Kaubang Basavaraju aron akuon ang iyang mga responsibilidad. Sumala sa liderato, kumpiyansa sila nga pinaagi sa panaghiusa sa kaalam sa mga tigulang nga kadre ug sa kusog ug kaalam sa mga batan-ong kadre, malabwan sa CPI (Maoist) ang tanang pagsulay, magpadayon sa dalan sa rebolusyonaryong armadong pakigbisog, ug makakab-ot og daghang kalampusan sa gubat sa katawhan sa India.