Hugot nga ginapamatukan sang mga pamilya sang biktima, abogado sang tawhanon nga kinamatarung, kag progresibo nga organisasyon ang apelar para sa temporaryo nga paghilway sa anay pangulo nga si Rodrigo Duterte halin sa pagkabilanggo sa International Criminal Court (ICC) sa The Hague, The Netherlands. Siling nila, ang tikang nga ini peligro sa hustisya para sa linibo ka ginpamatay sa idalum sang “war on drugs” kag magapabaskog sa kultura sang kawad-on sang salabton sa mga krimen batuk sa katawhan.

Gindun-an sang mga biktima kag pamilya sang mga biktima nga makatalagam ang apelar tungod pwede nga gamiton ini sang kampo ni Duterte agud hadlukon ang mga nagapanawagan sang hustisya.

Nagapanawagan sila sa ICC nga indi pagpasugtan ang apelar. Siling nila, nagapabilin nga gamhanan sa pulitika ang pamilya Duterte sa Pilipinas, kag sa pagkamatuod padayon nga nagapangibabaw ang anak nga si Sara Duterte sa pihak sang kaso nga impeachment batuk sa iya.