Kaupod sa tanan nga pwersa kag pumuluyo sa bug-os nga kalibutan nga nagatib-ong sa kalinong, nagatahod sa independensya sang mga pungsod kag sa internasyunal nga layi, dapat manindugan ang pumuluyong Pilipino batuk sa wala sang probokasyon nga teroristang pagsalakay sang Zionistang estado sang Israel, kahimbon ang imperyalismong US,batuk sa pungsod Iran kag sa pumuluyo sini. Ang masobra isa ka semana na nga patarasak nga pag-atake sini, gamit ang mga jetfighter, misayl kag drone, lubos nga nagatapak sa sobereniya sang Iran kag nagagatong sang mas lapnagon nga gyera.

Gamit ang mga hinganiban nga ginhatag sang US, ginapuntirya sang Israel ang mga pasilidad para sa enerhiyang nukleyar, repineriya sang lana, mga lugar nga pang-industriya, mga pasilidad sa pagpanalawsaw, bisan ang mga bilding nga sibilyan. Ginapuntirya sini ang mga yabe nga mga opisyal militar kag nagapanguna nga mga syentista sang Iran. Sa sulod sang isa ka semana, indi magnubo sa 630 ang ginpatay sang Israel sa mga pag-atake, lakip ang halos 270 ka sibilyan.

Indi mabaton ang rason sang Zionistang Israel sa pagpangbomba sini sa Iran, nga katuyuan kuno nga punggan ang pag-angkon sini sang mga armas nukleyar. Ang amo sini nga pagrason sang Israel, nga ginasulsolan ni President Trump sang US, hugot nga ginapanginwala sang International Atomic Energy Agency sang United Nations nga nagsiling nga wala sang pamatuod nga may programa ang Iran para magtuga sang armas nukleyar, pagkatapos ini mag-inspeksyon sa mga pasilidad pang-nukleyar.

Ang Israel ang pinakadako nga peligro nukleyar sa Middle East, tungod may yara ini kapin 100 ka armas nukleyar (nuclear warheads) kag may ikasarang nga maghimo sang 300 pa. Wala ini sang kinamatarung nga punggan ang Iran, isa ka independyente nga pungsod, nga magpauswag sang kaugalingon nga ikasarang nukleyar, para man sa enerhiya ukon para sa militar. Sa pag-atake sang Israel sa Iran, gindiskaril sini ang pagtinguha sang Iran nga liwat buhion ang Joint Comprehensive Plan of Action, tratado kontra sa paglapnag sang mga armas nukleyar, nga ginbasura sang US sadtong 2018.

Estratehiko nga katuyuan sang pag-atake sang Isreal sa Iran ang ipatuman ang hegemoniya sang imperyalismong US sa Middle East kag kontrolon ang malapad nga rekurso sang lana sa rehiyon. Plano sini nga silutan ang Iran sa pagtindog sini para sa iya sobereniya kag kugmaton ang iban nga pungsod sa rehiyon agud magduko sa gahum sang US kag Israel.

Makangilil-ad ang mga pag-atake sang Israel sa Iran, ilabina kadungan sini ang nagapadayon pa nga halos duha na ka tuig sini nga pagpangbomba kag pagpangsakop sa Gaza Strip, kadutaan sang mga Palestino. Halos 60,000 ka Palestino na ang ginpatay sa henosidyo sang Zionistang estado sang Israel. Pagkatapos lubos nga dugmukon ang Gaza, ginpatuman subong sang Israel ang isa ka grabe nga krisis sa gutom kag balatian sa pagdumili sini nga makasulod ang tanan nga ayuda nga makatawo, pagkontrol sa pagpanagtag sang pagkaon, kag halos adlaw-adlaw nga patarasak nga pagpaniro sa mga nakapila nga nagahulat sang ayuda.

Upod ang suporta sang US sa pagwasak sa Gaza, nagbaskog ang balatyagon sang Zionistang estado sang Israel, nga palaparon ang gyerang agresyon sa bug-os nga rehiyon sang Middle East. Sang nagligad nga mga binulan, gin-atake sini ang Lebanon kag Syria. Ginkontrol sang mga manugsakop nga pwersa sang Israel ang Golan Heights kag iban pa nga estratehikong bahin sang Syria, pagkatapos nga makigbuligay sa US kag sa mga armadong grupo diri agud ibagsak ang gobyerno ni Bashir al-Assad. Tayuyon man ang pagpangbomba sa Yemen, kabulig ang US.

Dapat suportahan sang mga demokratikong pwersa sa kalibutan ang Iran sa pagpangapin sini sang kaugalingon batuk sa agresyon kag pagpangsalakay sang US-Israel. Minilyon ka mga Iranian ang nagtililipon sa Tehran kag iban pa nga syudad sa Iran agud ipakita ang ila paghiliusa kag kaisog nga pakigbatuan ang pagpangsalakay sang Israel. Lubos ang kinamatarung sang Iran nga balusan ang Israel kag pangapinan ang sobereniya sini. Sa mga nagligad nga adlaw, nagpalupad ini sang kugalingon sini nga mga misayl. Madamo sa mga ini, lakip ang mga hypersonic missile napaslawan nga punggan sang depensa sang Israel. Sa atubang sang nagadako nga kahalitan sa Israel, amat-amat nga nagakapukaw ang pumuluyo sang Israel nga maghambal kag manindugan batuk sa terorismo sang Zionistang estado.

Labi subong nga nagakaligwin ang Israel kag US sa internasyunal nga komunidad sang mga pungsod. Halin Europe tubtob Asia, nagahiliusa ang panawagan sa Israel nga untaton na ang pag-atake sa Iran. Sa atubang sa lapnagon nga internasyunal kag lokal nga pagpamatuk, nagaatras-abante subong si Trump sa gina-estoryahan nga plano niya nga direkta nga magsulod sa gyera kag maghulog sang 30,000-libras nga bomba sa Iran.

Dapat mas pa nga palaparon kag pabaskugon ang panawagan sang mga demokratikong pwersa sa kalibutan nga tapuson sang US kag Israel ang pagpangbomba sa Iran. Kadungan sini, dapat mas nga pabaskugon ang panawagan nga suportahan ang pumuluyong Palestino, kag palayason ang mga pwersa sang Zionistang estado sang Israel halin sa Gaza, agud hatagan sang ligwa ang mga Palestino nga liwat patindugon ang ila mga puluy-an kag kabuhi. Dapat pabaskugon sang mga pumuluyo sang Israel ang panawagan nga manindugan batuk sa pasistang rehimen Netanyahu kag igiit ang gilayon nga pagtapos sa mga gyerang agresyon sini.

Ang gyerang agresyon batuk sa Iran tanda sang nagadalum nga krisis sang imperyalismo, kag isa ka mayor nga duso sang imperyalismong US sa idalum ni Trump nga liwat tungaon ang mga manggad sang kalibutan, pabor sa iya interes. Halin Europe, padulong sa Middle East kag Asya mas nga nangin agresibo ang US sa pagbubo sang dako nga rekurso pangmilitar, kag paglunsar sang mga proxy war batuk sa mga pungsod nga nagapugong sa pagpatuman sini sang hegemoniya sa bug-os nga kalibutan.

Dapat maghiliusa ang pumuluyong Pilipino kag suportahan ang pumuluyo sang Iran sa pagpamatuk sa imperyalistang gyera. Kadungan sini, dapat maghulag ang pumuluyong Pilipino batuk sa paggamit sang imperyalismong US sa pungsod bilang lunsaran sang gyera. Dapat maghulag ang mamumugon kag mangunguma, kag tukuron ang malapad nga nagahiliugyon nga prente agud pamatukan ang mga gyerang agresyon sang US kag paghanda sini sa gyera.

Dapat padayon nga pabaskugon ang Bagong Hukbong Bayan kag ang armadong paghimakas sa bug-os nga pungsod. Ang inaway banwa kag ang rebolusyonaryong kahublagan ang pinakamabaskog nga hinganiban sang pumuluyong Pilipino agud pakig-awayan ang papet nga rehimen Marcos, punggan ang padihot sini nga guyuron ang pungsod sa inaway nga ginapalupok sang amo sini nga imperyalista, kag ipakig-away ang matuod nga kahilwayan sang pungsod.