Hugot nga gisupak sa mga pamilya sa mga biktima, mga abugado sa tawhanong katungod, ug mga progresibong organisasyon ang apela alang sa temporaryong pagpagawas sa kanhi presidente nga si Rodrigo Duterte gikan sa detensyon sa International Criminal Court (ICC) sa The Hague, The Netherlands. Matud nila, kini nga lakang hulga sa hustisya alang sa liboang gipatay ilalum sa “war on drugs” ug mopagrabe sa kultura sa kawalay pagpanubag sa mga krimen batok sa katawhan.

Gipanghingusog sa mga biktima ug ilang pamilya nga delikado ang maong apela tungod kay mahimo kining gamiton sa kampo ni Duterte aron hadlukon ang mga nanawagan og hustisya.

Giawhag nila ang ICC nga dili paboran ang maong apela. Matud nila, nagpabiling gamhanan ang pamilyang Duterte sa pulitika sa Pilipinas, ug sa tinuod, padayon ang impluwensya sa anak nga si Sara Duterte taliwala sa kasong impeachment batok kaniya.