Hustisya ang panawagan sang mga himata sang 24-anyos nga si Junjun Binoy nga ginpatay sang mga soldado sang 94th IB sa Sityo Bugtangan, Barangay Buenavista, Himamaylan City, Negros Occidental sadtong Hunyo 6. Ginpaguwa sang mga soldado nga myembro siya sang Bagong Hukbong Bayan (BHB) kag napatay sa isa ka armado nga inaway.

Samtang, gintortyur kag ginkastigo sang mga soldado ang 59-anyos nga amay ni Binoy nga si Judy, nga kaupod niya sadto.

Sa Surigao del Sur, ginpatay sang elemento sang special forces sang militar ang 25-anyos nga si Davie Ugking sa Km 9, Barangay Diatagon, Lianga sadtong Hunyo 6. Nagapauli na ang biktima halin sa trabaho sang gindiskitahan sang militar. Gintortyur si Ugking antes ginpatay base sa mga lagob kag pilas sa iya lawas.

Pag-aresto. Sa Agusan del Sur, siyam ka indibidwal ang gin-aresto sang mga pulis kag militar samtang nagabyahe kag ginpadulog sa isa ka tsekpoynt sa banwa sang Bunawan sadtong Hunyo 13 sang gab-i. Ang mga gin-aresto amo sanday Charisse Bernadine Bañez, Ronnie Igloria, Louvaine Erika Espina, Sinag Lugsi, Larry Montero, Daryl Man-Inday, Arjie Guino Dadizon, Grace Niknik Man-aning, kag Leo Taba, kaupod ang duha ka drayber. Gindakop sila sa pagpato-pato sang lain-lain nga kaso kriminal kag pasibangod nga mga katapo sang Bagong Hukbong Bayan.

Suno sa report, pilit sila nga ginpapanaug sa mga salakyan kag ginpahapa sang duha ka oras. Pagkatapos sini, ginpatigayon ang “pagpangbaluskay” sa ila mga gamit kag salakyan kon diin nakumpiskar ang mga armas kag palupok. Sa sunod nga adlaw, nareport nga nadula si Taba kag ang duha ka drayber sang mga van nga ginsakyan nila.

Sa Bohol, gin-aresto sa indi pa maathag nga kaso ang sekretaryo heneral sang Hugpong sa mga Mag-uumang Bol-anon (HUMABOL)-KMP nga si Joemar Pogio sa iya balay sa San Miguel sadtong Hunyo 8.

Demolisyon. Sa Bukidnon, sa pihak sang hugot nga pagpamatok sang mga residente ginpadayon sang Central Mindanao University, kabulig ang ginatos ka pulis, ang mapintas nga demolisyon sa mga balay sang mga mangunguma nga nagapuyo sa Barangay Dologon Maramag sadtong Hunyo 16. Ang mga residente mga katapo sang Buffalo-Tamaraw-Limus Multipurpose Cooperative kag Musuan Inhabitants’ Landless Farmers Association.

Ginatos ka mga balay ang ginpangguba sa demolisyon, nagbilin sa 1,566 ka mga mangunguma nga wala sa mapuy-an. Lima ka residente ang gin-aresto sang mga pulis pagkatapos nga magpangabay nga anihon ang ila mga tanum nga humay.