Milyun-milyon nga katawhan han US an naglansar han mga protesta nga gintawag nga adlaw han “No Kings” (o Waray Hadi) hadton Hunyo 14, komo pagtipa ha pasismo ngan kontra-katawhan nga mga palisiya han rehimen Trump. Inabot ha 2,000 nga protesta ha 1,500 nga syudad an iginlansar ha bug-os nga nasud.

Gintawag an protesta nga “No Kings” kontra ha pagpopostura-nga-hadi ni Trump, ngan pag-angkon han poder lahos ha pagin presidente. Panawagan liwat ini agud paiwason hiya ha iya “trono.”

Ha Los Angeles, ini nga protesta kasunod na han masobra usa kasemana nga hiluagan nga protesta kontra ha paglanat ha mga imigrante ngan pagdeploy han National Guard ngan Marines ha syudad. Kaupod ha pinartisipar ha mga protesta an Migrante LA, Anakbayan LA, Gabriela LA ngan National Alliance for Filipino Concerns. Inabot ha 330 nga imigrante ha syudad an igindetiner han ICE tikang Hunyo 6.

Kadungan han pagpartisipar han mga nasyunal demokratiko nga organisasyon ha “No Kings,” nagsab-ong an mga membro han Anakbayan Philadephia han istrimer nga mayda panawagan nga “US Out of the Philippines” ha may Vine Street, Expressway, Philadelphia.