Milyun-milyong katawhan sa US ang naglunsad og mga protesta nga gitawag og adlaw sa “No Kings” (Walay Hari) niadtong Hunyo 14, isip pagsupak sa pasismo ug mga anti-katawhan nga palisiya sa rehimeng Trump. Mikabat sa 2,000 ka protesta sa 1,500 ka syudad ang gihimo sa tibuok nasud.

Gitawag ang protesta og “No Kings” batok sa asta ni Trump nga daw hari, ug sa pag-angkon sa gahum nga labaw pa sa pagka-presidente. Panawagan usab kini nga palagputon siya sa iyang “trono.”

Sa Los Angeles, nahitabo ang protesta human sa sobra usa ka semana nga halapad nga protesta batok sa pagpangdakop sa mga imigrante ug pagdeploy sa National Guard ug Marines sa syudad. Apil sa mga nitambong sa protesta ang Migrante LA, Anakbayan LA, Gabriela LA ug National Alliance for Filipino Concerns. Miabot og 330 ka imigrante sa syudad ang gidetine sa ICE sukad Hunyo 6.

Dungan sa pagsalmot sa mga nasudnon-demokratikong organisasyon sa “No Kings,” nagsab-it ang mga myembro sa Anakbayan Philadelphia og streamer nga adunay panawagan nga “US Out of the Philippines” sa daplin sa Vine Street, Expressway, Philadelphia.