Hustisya an panawagan han mga kaurupdan para ha 24-anyos nga hi Junjun Binoy nga ginpatay han mga sundalo han 94th IB ha Sityo Bugtangan, Barangay Buenavista, Himamaylan City, Negros Occidental hadton Hunyo 6. Ginpapagawas han mga sundalo nga membro hiya han Bagong Hukbong Bayan (BHB) ngan napatay ha usa nga armado nga agway.

Samtang, gintortyur ngan ginkastigo han mga sundalo an 59-anyos nga amay ni Binoy nga hi Judy, nga kaupod niya hadto.

Ha Surigao del Sur, ginpatay han elemento han special forces han militar an 25-anyos nga hi Davie Ugking ha Km 9, Barangay Diatagon, Lianga hadton Hunyo 6. Tiuli an biktima tikang ha trabaho han pagdiskitahan han militar. Gintortyur hi Ugking antes ginpatay basar ha mga luom ngan samad ha iya lawas.

Pag-aresto. Ha Agusan del Sur, siyam nga indibidwal an gin-aresto han mga pulis ngan militar samtang nabiyahe ngan ginpahunong ha usa nga tsekpoynt ha bungto han Bunawan hadton Hunyo 13 han gab-i. Gin-aresto hira Charisse Bernadine Bañez, Ronnie Igloria, Louvaine Erika Espina, Sinag Lugsi, Larry Montero, Daryl Man-Inday, Arjie Guino Dadizon, Grace Niknik Man-aning, ngan Leo Taba, kaupod an duha nga drayber. Gindakop hira ha tahap han magkalain-lain nga kaso nga kriminal ngan akusasyon nga mga kaapi han Bagong Hukbong Bayan.

Sigon ha sumat, piniritay hira nga ginpalusad ha mga sarakyan ngan ginpadapa hin duha kaoras. Kataliwan hini, iginhimo an “paghalikwat” ha ira gamit ngan sarakyan diin nakumpiska an mga armas ngan pampasabog. Ha sinunod nga adlaw, nahireport nga nawawara na hi Taba ngan an duha nga drayber han mga van nga ginsakyan nira.

Ha Bohol, gin-aresto ha diri pa klaro nga kaso an pankabug-usan nga sekretaryo han Hugpong sa mga Mag-uumang Bol-anon (HUMABOL)-KMP nga hi Joemar Pogio ha iya balay ha San Miguel hadton Hunyo 8.

Demolisyon. Ha Bukidnon, ha luyo han mahugot nga pagtipa han mga residente iginpadayon han Central Mindanao University, kabakyang an gatus-gatos nga pulis, an madarahug nga demolisyon ha bablay han mga parag-uma nga naukoy ha Barangay Dologon Maramag hadton Hunyo 16. An mga residente mga kaapi han Buffalo-Tamaraw-Limus Multipurpose Cooperative ngan Musuan Inhabitants’ Landless Farmers Association.

Gatus-gatos nga bablay an ginruba ha demolisyon, nga nagbilin ha 1,566 nga parag-uma nga waray maukyan. Lima nga residente an gin-aresto han mga pulis kahuman makimaluoy nga anihon an ira mga tanom nga humay.