Kaupod an ngatanan nga pwersa ngan katawhan ha bug-os nga kalibutan nga nag-uundong ha kamurayawan, narespeto ha paglulugaring han mga nasud ngan ha internasyunal nga balaud, kinahanglan manindugan an katawhan Pilipino kontra ha waray probokasyon (waray pag-unggit) nga terorista nga pag-atake han Zionista nga estado han Israel, kakunsabo an imperyalismo nga US, kontra ha nasud Iran ngan ha katawhan hini. Ini nga masobra usa kasemana na nga waray wantas nga pag-atake, gamit an mga jetfighter, misayl ngan drone, butaray nga nagtatamas-tamas ha soberaniya han Iran ngan nagsusungo han mas hiluagan nga gerra.

Gamit an mga armas nga ginhahatag han US, ginpupuntirya han Israel an mga pasilidad para ha nukleyar nga enerhiya, repineriya (pagproseso) han lana, mga lugar nga pan-industriya, mga pasilidad ha pangaliskay, bisan an mga bilding han sibilyan. Gintatarget hini an yawe nga mga upisyal militar ngan nangunguna nga mga siyentista han Iran. Ha sakob hin usa kasemana, diri mamenos ha 630 an ginpatay han Israel ha mga pag-atake, kaupod an haros 270 nga sibilyan.

Diri makarukarawat an pagrarason han Zionista nga Israel ha panmomba hini ha Iran, nga tuyo kunuhay nga pugngan an pagkakamayda hini hin mga nukleyar nga armas. An sugad hini nga pangatadungan han Israel, nga ginsusuportahan ni President Trump han US, mahugot nga ginpahimuwaan han International Atomic Energy Agency han United Nations nga nagsering nga waray ebidensya nga may programa an Iran agud maghimo hin mga armas nukleyar, kahuman ini mag-inspeksyon ha mga pan-nukleyar nga pasilidad.

An Israel an pinakadako nga nukleyar nga hulga ha Middle East, tungod kay mayda ini sumobra-kumulang 100 nga armas nukleyar (nuclear warheads) ngan may kapas nga maghimo pa hin 300. Waray ini katungod nga ulangon an Iran, usa nga independyente nga nasud, nga magpauswag han kalugaringon nga nukleyar nga kapas, para man ha enerhiya o para ha militar. Ha pag-atake han Israel ha Iran, gindiskaril hini an paningkamot han Iran nga utro nga buhion an Joint Comprehensive Plan of Action, tratado kontra ha pagpasamwak han mga armas nukleyar, nga iginbasura han US hadton 2018.

Estratehiko nga katuyuanan han pag-atake han Israel ha Iran an ig-imponer an hegemoniya han imperyalismo nga US ha Middle East ngan kontrolon an hiluag nga rekurso nga lana han rehiyon. Tuyo hini nga sirutan an Iran ha pagtindog hini para ha iya soberaniya ngan hadlukon an iba nga nasud ha rehiyon agud yumukbo ha poder han US ngan Israel.

Makangaralas an mga pag-atake han Israel ha Iran, labina nga kadungan hini nagpapadayon pa an haros duha katuig na hini nga pannomba ngan pagsakop ha Gaza Strip, katunaan han mga Palestino. Haros 60,000 nga Palestino na an ginpatay ha henosidyo han Zionista nga estado han Israel. Kahuman hul-os nga rumkon an Gaza, igin-imponer yana han Israel an usa nga grabe nga krisis ha gutom ngan sakit ha pagdiri hini nga makasulod an ngatanan nga makatawo nga ayuda, pagkontrol ha panhatag han pagkaon, ngan haros adlaw-adlaw nga waray wantas nga panmusil ha mga nakapila nga naghuhulat han ayuda.

Amkon an suporta han US ha pagruba ha Gaza, nagkusog an kaburut-on han Zionista nga estado han Israel, nga pahiluagon an gerra nga agresyon ha bug-os nga rehiyon han Middle East. Ha naglabay nga mga bulan, gin-atake hini an Lebanon ngan Syria. Ginkontrol han mga mapanakop nga pwersa han Israel an Golan Heights ngan iba pa nga estratehiko nga parte han Syria, kahuman makigbuligay ha US ngan ha mga armado nga grupo didto agud pabagsakon an gubyerno ni Bashir al-Assad. Dirudiretso liwat an panmomba ha Yemen, kabakyang an US.

Kinahanglan suportahan han mga demokratiko nga pwersa ha kalibutan an Iran ha pagdepensa hini han kalugaringon kontra ha ag- resyon ngan pangatake han US-Israel. Milyun-milyon nga mga Iranian an nagtitirok ha Tehran ngan iba pa nga syudad ha Iran agud igpakita an ira pagkaurusa ngan kaisog nga atuhan an paglasurbo han Israel. Hul-os an katungod han Iran nga bulsan an Israel ngan depensahan an soberaniya hini. Ha mga naglabay nga adlaw, nagpalupad ini han kalugaringon hini nga mga misayl. Damo hini, kalakip an mga hypersonic missile, pakyas nga pugngan han depensa han Israel. Atubangan han natikadako nga destroso ha Israel, hinay-hinay nga napupukaw an katawhan han Israel nga magyakan ngan manindugan kontra ha terorismo han Zionista nga estado.

Ura-ura nga nahimumulag yana an Israel ngan US ha internasyunal nga komunidad han mga nasud. Tikang Europe tubtub Asia, nagkakaurusa an panawagan ha Israel nga paundangon na an pag-atake ha Iran. Atubangan han hiluagan nga internasyunal ngan lokal nga pagtipa, naatras-abante yana hi Trump ha gin-eerestoryahan nga plano niya nga direkta nga sumakob ha gerra ngan maghulog han 30,000-kalibra nga bomba ha Iran.

Kinahanglan dugang nga pahiluagon ngan pakusgon an panawagan han mga demokratiko nga pwersa ha kalibutan agud tapuson han US ngan Israel an panmomba ha Iran. Kadungan hini, kinahanglan dugang nga pakusgon an panawagan nga suportahan an katawhan nga Palestino, ngan palayason an mga pwersa han Zionista nga estado han Israel tikang ha Gaza, agud tagan lugway an mga Palestino nga utro nga tukuron an ira mga urukyan ngan kinabuhi. Kinahanglan pakusgon an panawagan ha katawhan han Israel nga manindugan kontra ha pasista nga rehimen Netanyahu ngan ig-insister an dagmit nga pagtapos ha mga gerra nga agresyon hini.

An gerra nga agresyon kontra ha Iran pangilal-an han natikahilarum nga krisis han imperyalismo, ngan usa nga mayor nga duso han imperyalista nga US ilarum ni Trump nga utro nga bahinon an mga karikuhan han kalibutan, pabor ha iya interes. Tikang Europe, tipakadto ha Middle East ngan Asia, nagin mas agresibo an US ha pagbubuhos hin dako nga panmilitar nga rekurso, ngan paglalansar hin mga proxy war kontra ha mga nasud nga naulang ha pag-iimponer hini han hegemoniya ha bug-os nga kalibutan.

Kinahanglan magkaurusa an katawhan Pilipino ngan suportahan an katawhan han Iran ha pag-ato ha imperyalista nga gerra. Kadungan hini, kinahanglan gumios an katawhan Pilipino kontra ha paggamit han imperyalismo nga US ha nasud komo lansaran han gerra. Kinahanglan gumios an mga trabahador ngan parag-uma, ngan tukuron an hilapad nga nagkakaurusa nga prente agud atuhan an mga gerra nga agresyon han US ngan pangandam hini han gerra.

Kinahanglan padayon nga pakusgon an Bagong Hukbong Bayan ngan an armado nga pakig-away ha bug-os nga nasud. An gerra han katawhan ngan rebolusyunaryo nga kagiusan an pinakamakusog nga armas han katawhan Pilipino agud atuhan an niyutiyo nga rehimen Marcos, pugngan an larang hini nga danason an nasud ha gerra nga ginpapabuto han imperyalista nga agaron, ngan ipakigbisog an tinuod nga katalwasan han nasud.