Duyog sa tanang pwersa ug katawhan sa tibuok kalibutan nga nanalipud sa kalinaw, nagatahod sa kaugalingnan sa mga nasud ug sa internasyunal nga balaod, kinahanglang mobarog ang katawhang Pilipino batok sa walay probokasyon nga teroristang pag-atake sa Zionistang estado sa Israel, kakunsaba ang imperyalismong US, batok sa Iran ug sa katawhan niini. Ang kapin usa ka semana na nga walay puas nga pag-atake, gamit ang mga jetfighter, misayl ug drone, direktang nagayatak sa soberanya sa Iran ug nagsugnod sa mas lapad nga gubat.

Gamit ang mga armas nga gihatag sa US, gitarget sa Israel ang mga pasilidad alang sa enerhiyang nukleyar, repineriya sa lana, mga lugar nga pang-industriya, mga pasilidad sa panukiduki, bisan ang mga biilding pangsibilyan. Ginatakget niini ang yaweng mga upisyal militar ug nangulong mga syentista sa Iran. Sulod sa usa ka semana, dili moubos sa 630 ang gipatay sa Israel sa mga pag-atake, lakip ang halos 270 ka sibilyan.

Dili makatarunganon ang rason sa Zionistang Israel sa pagpamomba niini sa Iran, nga kuno nagtinguha nga babagan ang pagbaton niini og mga armas nukleyar. Ang pangatarungan sa Israel, nga gisuportahan ni President Trump sa US, hugot nga gipanghimakak sa International Atomic Energy Agency sa United Nations nga nag-ingong walay ebidensya nga adunay programa ang Iran aron maghimo og mga armas nukleyar, human kini mag-inspeksyon sa mga pasilidad pangnukleyar.

Ang Israel ang pinakadakung hulga nukleyar sa Middle East, tungod kay aduna kini kapin kun kulang 100 ka armas nukleyar (nuclear warheads) ug adunay kapasidad nga maghimo og 300 pa. Wala kini katungod nga babagan ang Iran, usa ka independyenteng nasud, nga magpalambo og kaugalingong kapasidad nukleyar, para man sa enerhiya o para sa militar. Sa pag-atake sa Israel sa Iran, gidiskaril niini ang paningkamot sa Iran nga subling buhion ang Joint Comprehensive Plan of Action, tratado kontra sa pagkaylap sa mga armas nukleyar, nga gibasura sa US niadtong 2018.

Estratehikong tumong sa pag-atake sa Israel sa Iran nga ipahamtang ang hegemonya sa imperyalismong US sa Middle East ug kontrolon ang lapad nga rekursong lana sa rehiyon. Laraw niining silutan ang Iran sa pagbarog niini alang sa iyang soberanya ug hadlukon ang ubang nasud sa rehiyon aron mohukbo sa gahum sa US ug Israel.

Talamayon ang mga pag-atake sa Israel sa Iran, ilabina nga nagpadayon pa ang halos duha ka tuig na niining pagpamomba ug pagpanakop sa Gaza Strip, kayutaan sa mga Palestino. Halos 60,000 ka Palestino na ang gipatay sa henosidyo sa Zionistang estado sa Israel. Human hingpit nga gipulbos ang Gaza, gipahamtang karon sa Israel ang usa ka grabeng krisis sa pagkaon ug panglawas sa pagbawal niining makasulod ang tanang makitawhanong ayuda, pagkontrol sa pag-apud-apud sa pagkaon, ug halos adlaw-adlaw nga paturagas nga pagpamomba sa mga nakalinya nga nagpaabot og ayuda.

Pinaagi sa suporta sa US sa pagpulbos sa Gaza, nahimong mas agresibo ang Zionistang estado sa Israel, nga palapdon ang gubat agresyon sa tibuok rehiyon sa Middle East. Sa milabayng mga bulan, giatake niini ang Lebanon ug Syria. Gikontrol sa mga mananakop nga pwersa sa Israel ang Golan Heights ug uban pang estratehikong lugar sa Syria, human makigtinabangay sa US ug sa mga armadong grupo didto aron palagputon ang gubyerno ni Bashir al-Assad. Padayon usab ang pagbomba sa Yemen, kaabag ang US.

Kinahanglang suportahan sa mga demokratikong pwersa sa kalibutan ang Iran sa pagpanalipud niini sa kaugalingon batok sa agresyon ug atake sa US-Israel. Milyun-milyong mga Iranian ang nagtapok sa Tehran ug uban pang syudad sa Iran aron ipakita ang ilang panaghiusa ug kaisog nga suklan ang pagpangatake sa Israel. Naa sa Iran ang tanang katungod nga panimaslan ang Israel ug panalipdan ang soberanya niini. Sa mga milabayng adlaw, nagpalupad kini og kaugalingon niining mga misayl. Daghan dinhi, lakip ang mga hypersonic missile, ang pakyas nga pugngan sa depensa sa Israel. Atubangan sa nagkadakung kadaut sa Israel, hinay-hinay nga napukaw ang katawhan sa Israel nga motingog ug mobarog batok sa terorismo sa Zionistang estado.

Labaw karon nga nahimulag ang Israel ug US sa internasyunal nga komunidad sa mga nasud. Gikan Europe hangtud Asia, hiniusa ang panawagan sa Israel nga ihunong na ang pag-atake sa Iran. Atubangan sa malukpanong internasyunal ug lokal nga pagbabag, nagduhaduha karon si Trump sa gikahisgutang plano niya nga direktang moapil sa gubat ug maghulog og 30,000-librang bomba sa Iran.

Kinahanglang dugang pang palapdon ug pakusgon ang panawagan sa mga demokratikong pwersa sa kalibutan aron tapuson sa US ug Israel ang pagpamomba sa Iran. Dungan niini, kinahanglang dugang pakusgon ang panawagan nga suportahan ang katawhang Palestino, ug palayason ang mga pwersa sa Zionistang estado sa Israel gikan sa Gaza, aron hatagag dalan ang mga Palestino nga subling ibarog ang ilang mga panimalay ug kinabuhi. Kinahanglang pakusgon ang panawagan sa katawhan sa Israel nga mobarog batok sa pasistang rehimeng Netanyahu ug iduso ang hinanali nga pagtapos sa mga gubat agresyon niini.

Ang gubat agresyon batok sa Iran timaan sa nagkalalum nga krisis sa imperyalismo, ug usa ka mayor nga lakang sa imperyalistang US sa ilalum ni Trump nga subling bahinbahinon ang mga bahandi sa kalibutan, pabor sa iyang interes. Gikan Europe, ngadto sa Middle East ug Asia, nahimong mas agresibo ang US sa pagbubu og dagkung rekursong pangmilitar, ug pagpahigayon og mga proxy war batok sa mga nasud nga nagababag sa pagpahamtang niini og hegemonya sa tibuok kalibutan.

Kinahanglang maghiusa ang katawhang Pilipino ug suportahan ang katawhan sa Iran sa pagsukol sa imperyalistang gubat. Dungan niini, kinahanglang molihok ang katawhang Pilipino batok sa paggamit sa imperyalismong US sa nasud isip panggubatan. Kinahanglang molihok ang mga mamumuo ug mag-uuma, ug tukuron ang lapad nga nagkahiusang prente aron suklan ang mga gubat agresyon sa US ug pagpangandam niini og gubat.

Kinahanglang padayon nga pakusgon ang Bagong Hukbong Bayan ug ang armadong pakigbisog sa tibuok nasud. Ang gubat sa katawhan ug rebolusyonaryong kalihukan ang pinakakusog nga hinagiban sa katawhang Pilipino aron suklan ang papet nga rehimeng Marcos, pugngan ang pakana niining amungon ang nasud sa gubat nga ginahulhog sa amo niining imperyalista, ug ipakigbisog ang tinuod nga kagawasan sa nasud.