Iwagwagayway dagiti bulalayaw a bandera ken nakatag-ay ti gemgem a nagmartsa ti ginasut a kameng ti sektor ti LGBTQ+, dagiti alyado ken progresibo a grupo idi Hunyo 26 iti Stonewall Philippines Pride March a naisayangkat idiay Recto Avenue, Manila. Nakidinnuron da kadagiti pulis tapno ipaganetget ti panagisayangkat ti programa iti Mendiola.

Iti panangiyuna ti nailyan-demokratiko a grupo dagiti LGBTQ+ a Bahaghari, binukel dagiti pormasyon a Pride (agramrambak iti bulan ti Pride) ti Stonewall Philippines. Pormal nga indeklara ti baro a timpuyog ti tinawen a panangidaulo kadagiti militante nga aktibidad ken martsa para iti Pride tunggal Hunyo.

Padpadayawan ken isabsabiag ti Stonewall Philippines ti patawid ti kaunaan a Pride March iti Pilipinas ken uray iti Asia—ti Stonewall Manila a naisayangkat idi Hunyo 26, 1994 idiay Quezon City. Inyuna ti Progressive Organization of Gays in the Philippines (ProGay), kabadang ti Metropolitan Community Church (MCC) ti militante a martsa ken nagbalin daytoy a mitsa ti mano a dekada ti dangadang ti LGBTQ+.

Kagiddan ti panawagan laban iti diskriminasyon iti LGBTQ+ ken panangitandudo kadagiti karbengan ti sektor, timmakder da idi laban iti parigat a Value Added Tax (VAT), panagngato ti presyo ti langis ken gagatangen ken inbunannag da dagiti kontra-umili a patakaran iti rehimen US-Ramos.

Tallo pulo ket maysa a tawenen ti napalabas, iyaw-awag tatta ti sektor ti panangpasinged kas linteg iti SOGIE Bill, makabiag a sweldo, trabaho, pudno a reporma iti daga ken nailyan nga industriyalisasyon ken independyente a patakaran a pangruar, wayawaya ti Palestine ken dagiti pagilyan nga idadanes ti US. Pinadayawan da dagiti martir ti sektor ti LGBTQ+ a nagserbi nga organisador ken aktibista kas kada Alex Dolorosa, Chad Booc, Ryan Hubilla, Ali Macalintal ken adu pay.

Makipaset iti nailyan demokratiko a rebolusyon

Nagiyebkas ti pannakikaykaysa ken pammadayaw ti Makabayang Kilusan ng Bagong Kababaihan (Makibaka) iti sektor ti LGBTQ+ iti panagrambak iti Pride idi Hunyo. Inallukoy ti grupo ti sektor a makikaykaysa ken direkta a makipaset iti nailyan-demokratiko a rebolusyon a pudno ken aglayon a mangusat iti dana para iti naan-anay a pannakawayawaya ti LGBTQ+ kadwa ti umili a maidadanes ken magungundawayan.

Kanaig daytoy, nagballaag ti grupo nga agbalin a managbantay iti panagsabotahe ken panangallilaw ti imperyalismo ken amin a reaksyon iti dangadang ti LGBTQ+ ken panagrambak iti bulan ti Pride. Kuna ti Makibaka, balballikogen ti imperyalismo ti panagrambak tapno iyadayo ti LGBTQ+ iti dangadang laban iti diskriminasyon, nailyan a panangidadanes ken panaggundaway.

Gungundawayan ti dadakkel a korporasyon ken dagiti pulitiko ti panagrambak iti Pride. Bayat nga ipatpatungpal dagitoy ken ti imperyalista a US ti arig na a pyesta a Pride, agtultuloy ti panangpatalinaed kadagiti linteg ken patakaran iti ekonomya ken pulitika nga ad-adda a mangikalkali kadagiti masa nga anakling-et nga LGBTQ+ iti gayong-gayong ti kinaawan panggedan wenno disente a trabaho a mangidurduron kadakuada kadagiti anti-sosyal nga aktibidad tapno agbiag.

Maysa a manipestasyon daytoy ti “rainbow washing” wenno “rainbow capitalism.” Kaipapanan daytoy ti panangaramat kadagiti simbolo ken lenggwahe ti sektor ti LGBTQ+ tapno agganansya dagiti dakdakkel a korporasyon.

Immawag met ti grupo nga agbalin a kritikal dagiti Pilipino nga LGBTQ+ iti pangkultura nga opensiba ti imperyalista a US iti kapanunotan ken ugali ti masa. Ipaspasaknap ti imperyalismo ti burges-dekadente a kultura kas ti kamali a pagrukodan ti kinapintas ken dadduma pay a pagrukodan ti kina-LGBTQ+. Palpalataken met daytoy ti indibidwalismo ken hypersexuality.

Iti sango dagitoy a gandat ti imperyalismo, kinarit ti Makibaka dagiti kabilang iti sektor ti LGBTQ+ a dalyasaten ti dana ti naimpusoan a panangidaton ti panawen ken biag para iti nailyan-demokratiko a rebolusyon, labes iti bagbagi da.

Rumbeng a pagtuladan dagiti namartir a Nalabbaga a kumander ken mannakigubat ti New People’s Army kas kada Val Mante (Ka Richard), Daniel Imperial, Wanda Gumban (Ka Waquin), Kevin Castro (Ka Facio), Jo Lapira (Ka Ella), Ciela Pacaldo (Ka Alena), Jethro Isaac Ferrer (Ka Pascual), Kal Peralta (Ka Rekka), Queenie Daraman (Ka Kira), Dee Supelanas (Ka Dahlia) ken adu pay. Nasken a padayawan ti panangidaton da ti pigsa, laing, kinatured ken biag para iti masa ken nadumaduma a tay-ak ti rebolusyonaryo a trabaho.