Iginpapalaypakay an mga balangaw nga bandera ngan taas-kamao nga nagmartsa an gatus-gatos nga membro han sektor han LGBTQ+, mga alyado ngan progresibo nga grupo hadton Hunyo 26 ha Stonewall Philippines Pride March nga ginhimo ha Recto Avenue, Manila. Nakiggitgitay hira ha mga pulis agud ig-insister an paglalansar han programa ha Mendiola.

Ha pangunguna han nasyunal-demokratiko nga grupo han mga LGBTQ+ nga Bahaghari, ginbug-os han mga pormasyon nga Pride (nagsasalin-urog ha bulan han Pride) an Stonewall Philippines. Pormal nga igindeklara han bag-o nga asosasyon an tinuig nga pamumuno ha militante nga mga aktibidad ngan martsa para ha Pride kada Hunyo.

Pagsaludo ngan pagsakinabuhi an Stonewall Philippines ha pinakasyahan nga Pride March ha Pilipinas ngan bisan ha Asia—an Stonewall Manila nga iginlansar hadton Hunyo 26, 1994 ha Quezon City. Ginpangunahan an militante nga martsa ngan mitsa han pira kadekada nga pakigbisog han LGBTQ+ han Progressive Organization of Gays in the Philippines (ProGay), kabakyang an Metropolitan Community Church (MCC).

Kadungan han panawagan kontra ha diskriminasyon ha LGBTQ+ ngan pag-undong ha mga katungod han sektor, tumindog hira hadto kontra ha pakuri nga Value Added Tax (VAT), paghitaas han presyo han lana ngan papliton ngan iginbuksas an mga kontra-katawhan nga palisiya han hadto rehimen US-Ramos.

Trenta y uno katuig an nakalabay, iginpapanawagan yana han sektor an pagsasabalaud ha SOGIE Bill, makaburuhi nga suhol, trabaho, tinuod nga reporma ha tuna ngan nasyunal nga industriyalisasyon, ngan naglulugaring nga pan-gawas nga palisiya, katalwasan para ha Palestine ngan mga nasud nga gintatalumpigos han US. Ginpasidunggan nira an mga martir han sektor han LGBTQ+ nga nagserbe nga mga organisador ngan aktibista sugad kanda Alex Dolorosa, Chad Booc, Ryan Hubilla, Ali Macalintal ngan damo pa nga iba.

Pumartisipar ha nasyunal demokratiko nga rebolusyon

Nagpahayag han pakig-usa ngan pagpasidungog an Makabayang Kilusan ng Bagong Kababaihan (Makibaka) ha sektor han LGBTQ+ ha pagsalin-urog han Pride hadton Hunyo. Gin-aghat han grupo an sektor nga makig-urusa ngan direkta nga pumartisipar ha nasyunal-demokratiko nga rebolusyon nga tinuod ngan diretso nga maghahawan han dalan para ha hul-os nga pagtalwas han LGBTQ+ kaupod an katawhan nga tinalumpigos ngan tiniyupi.

Kasumpay hini, nagpahimatngon an grupo nga magin mabinantayon ha pananabotahe ngan panguwat han imperyalismo ngan ngatanan nga reaksyon ha pakigbisog han LGBTQ+ ngan pagsalin-urog ha bulan han ng Pride. Sigon ha Makibaka, ginpapatarapsaw han imperyalismo an pagsalin-urog agud ipahirayo an LGBTQ+ ha pakigbisog kontra ha diskriminasyon, ngan nasyunal nga pananalumpigos ngan paniniyupi.

Ginsisingabot han dagko nga korporasyon ngan mga pulitiko an pagsalin-urog ha Pride. Samtang iginpapatuman hini ngan han imperyalista nga US an baga-patron nga Pride, padayon an pagpapabilin han mga balaud ngan palisiya ha ekonomiya ngan pulitika nga dugang nga naglulubong ha mga LGBTQ+ tikang ha masa nga anakbalhas ha ruyonduyon han kawaray trabaho o disente nga trabaho ngan nagduduso ha ira ha mga kontra-sosyal nga mga aktibidad agud mabuhi.

Usa nga ladawan hini an “rainbow washing” o “rainbow capitalism.” Nangangahulugan ini han paggamit ha mga simbolo ngan pulong han sektor han LGBTQ+ agud kumita hin mas dako an mga korporasyon.

Nanawagan gihap an grupo nga magin kritikal an Pilipino nga mga LGBTQ+ ha pankultura nga opensiba han imperyalista nga US ha hunahuna ngan higwaos han masa. Iginpapasamwak han imperyalismo an burges-dekadente nga kultura sugad han sayop nga suklanan han kamahusay ngan iba pa nga suklanan han pagin LGBTQ+. Iginpapalandaw gihap hini an indibidwalismo ngan hypersexuality (sobra nga pagpatakas ha sekswal nga aktibidad).

Atubangan hini nga mga larang han imperyalismo, gin-ayat han Makibaka an mga aada ha sektor han LGBTQ+ nga hasugon an dalan han waray pagruruha-duha nga paghahalad han panahon ngan kinabuhi para ha nasyunal demokratiko nga rebolusyon, lahos ha ira mga kalugaringon.

Kinahanglan subaron an pananglitan han mga namartir nga Pula nga kumander ngan mangaraway han Bagong Hukbong Bayan kaupod hira Val Mante (Ka Richard), Daniel Imperial, Wanda Gumban (Ka Waquin), Kevin Castro (Ka Facio), Jo Lapira (Ka Ella), Ciela Pacaldo (Ka Alena), Jethro Isaac Ferrer (Ka Pascual), Kal Peralta (Ka Rekka), Queenie Daraman (Ka Kira), Dee Supelanas (Ka Dahlia), ngan damo nga iba pa. Kinahanglan pasidunggan an paghahalad nira han kusog, kabaltok, kaisog ngan kinabuhi para ha masa ngan magkalain-lain nga nataran han rebolusyunaryo nga buruhaton.