Giwarawara ang mga banderang bahaghari (rainbow flag) ug taas-kamaong nagmartsa ang gatusan ka myembro sa sektor sa LGBTQ+, mga alyado, ug progresibong grupo niadtong Hunyo 26 sa Stonewall Philippines Pride March nga gihimo sa Recto Avenue, Maynila. Nakigdutdut sila sa mga pulis aron iduso ang paglunsad sa programa sa Mendiola.

Sa pagpanguna sa nasudnon-demokratikong grupo sa mga LGBTQ+ nga Bahaghari, gitukod sa mga pormasyong Pride (nga ginasaulog sa bulan sa Pride) ang Stonewall Philippines. Pormal nga gideklara sa bag-ong pederasyon ang tinuig nga pagdumala sa militanteng mga aktibidad ug martsa para sa Pride matag Hunyo.

Pagpasidungog ug paghandum ang Stonewall Philippines sa kinaunhang Pride March sa Pilipinas ug sa Asia—ang Stonewall Manila nga gisugdan niadtong Hunyo 26, 1994 sa Quezon City. Gipangulohan ang militanteng martsa ug mitsa sa daghang dekada nga pakigbisog sa LGBTQ+ ang Progressive Organization of Gays in the Philippines (ProGay), kauban ang Metropolitan Community Church (MCC).

Kauban sa panawagan batok diskriminasyon sa LGBTQ+ ug pagpanalipud sa mga katungod sa sektor, mibarog sila kaniadto batok sa paantus nga Value Added Tax (VAT), pagsaka sa presyo sa lana ug mga palaliton, ug gipadayag ang mga kontra-katawhan nga palisiya sa kanhing rehimeng US-Ramos.

Trentay uno ka tuig ang milabay, ginapanawagan karon sa sektor ang pag-aproba sa SOGIE Bill, patas nga sweldo, trabaho, tinuod nga reporma sa yuta ug nasudnong industriyalisasyon, ug independyenteng palisiyang panggawas, kagawasan para sa Palestine ug uban pang mga nasud nga gidaugdaug sa US. Gipasidunggan nila ang mga martir sa LGBTQ+ nga mga organisador ug aktibista sama nila Alex Dolorosa, Chad Booc, Ryan Hubilla, Ali Macalintal ug daghan pa.

Mosalmot sa nasudnon demokratikong rebolusyon

Nagpadayag og suporta ug pagpasidungog ang Makabayang Kilusan ng Bagong Kababaihan (Makibaka) sa sektor sa LGBTQ+ sa pagsaulog sa Pride niadtong Hunyo. Giawhag sa grupo ang sektor nga maghiusa ug direktang mosalmot sa nasudnon-demokratikong rebolusyon nga tinuod ug hingpit nga mohawan sa dalan alang sa hingpit nga kagawasan sa LGBTQ+ kauban ang katawhang dinaugdaug ug pinahimuslan.

Lambigit niini, nagpasidaan ang grupo nga magbantay batok sa pagpanabotahe ug pagpangyatak sa imperyalismo ug tanang reaksyonaryo sa pakigbisog sa LGBTQ+ ug pagsaulog sa bulan sa Pride. Sumala sa Makibaka, gigamit sa imperyalismo ang pagsaulog aron ipalayo ang LGBTQ+ sa pakigbisog batok diskriminasyon, ug nasudnong pagpangdaugdaug ug pagpahimulos.

Gipahimuslan sa dagkung korporasyon ug mga pulitiko ang pagsaulog sa Pride. Samtang ginapatuman niini ug sa imperyalistang US ang daw pyestang Pride, nagpabilin ang mga balaod ug palisiya sa ekonomiya ug pulitika nga labawng nagpasamot sa kahimtang sa LGBTQ+ nga gikan sa masang kabus sa kumunoy sa kawad-od sa panginabuhian o disenteng trabaho ug nagtukmod kanila sa mga anti-sosyal nga aktibidad aron lang mabuhi.

Usa ka porma niini mao ang “rainbow washing” o “rainbow capitalism.” Nagpasabot kini sa paggamit sa mga simbolo ug pinulungang LGBTQ+ aron makaganansay og daku ang mga korporasyon.

Nanawagan usab ang grupo nga magpabiling kritikal ang mga Pilipinong LGBTQ+ sa kulturanhong opensiba sa imperyalistang US sa panghunahuna ug pamatasan sa masa. Ginapakaylap sa imperyalismo ang burges-dekadenteng kultura sama sa sayop nga sukdanan sa katahum ug uban pang sukdanan sa pagka-LGBTQ+. Gipasiugdahan usab niini ang indibidwalismo ug hypersexuality (sobrang sekswalidad).

Atubangan sa mga paningkamot sa imperyalismo, gihagit sa Makibaka ang mga myembro sa LGBTQ+ nga subayon ang dalan sa walay pagduha-duha nga paghalad og panahon ug kinabuhi alang sa nasudnon demokratikong rebolusyon, labaw pa sa ilang kaugalingon.

Angay sundon ang ehemplo sa mga namartir nga Pulang kumander ug manggugubat sa Bagong Hukbong Bayan lakip silang Val Mante (Ka Richard), Daniel Imperial, Wanda Gumban (Ka Waquin), Kevin Castro (Ka Facio), Jo Lapira (Ka Ella), Ciela Pacaldo (Ka Alena), Jethro Isaac Ferrer (Ka Pascual), Kal Peralta (Ka Rekka), Queenie Daraman (Ka Kira), Dee Supelanas (Ka Dahlia), ug daghan pa. Ang ilang paghalad og kusog, kaalam, kaisog ug kinabuhi alang sa masa ug lain-laing natad sa rebolusyonaryong gimbuhaton angay pasidunggan.