Dumanon iti 16 a raliyista ti napapatay ken 400 a dadduma pay ti nadundunor idi naranggas a dinuprak ti rehimen US-Ruto ti Kenya dagiti protesta ti umili idi Hunyo 25. Ti protesta ket paset ti pananglagip iti serye dagiti dadakkel a demonstrasyon a naisayangkat idi napalabas a tawen laban iti neoliberal a gakat a Finance Bill 2024, kumarkaro a kinarungsot ti pulis ken panagikuspil ti estado.

Malagip a napaatras dagiti dadakkel a tignay idi 2024 ti rehimen US-Ruto iti plano a panagipataw ti nadadagsen a buwis a diktar ti International Monetary Fund (IMF) nga ad-adda a mangparigat iti masa a Kenyan. Tapno tuso a mailusot dagiti buwis, paset-paset daytoy nga inpasa ti parlamento ti Kenya iti napalabas a tawen.

Naisayangkat dagiti tignay idiay Nairobi, Mombasa, Kisii ken dadduma pay a syudad. Awit da dagiti bandera ti Kenya ken nagpukkaw ti panawagan a “Ruto Must Go” (Palayasin si Ruto) ken “Occupy Statehouse” (Sakupen ti Statehouse wenno pagtaengan ni Ruto kas mangidaulo ti gubyerno). Awit da met kadagiti protesta dagiti ladawan dagiti pimmusay idi napalabas a tawen iti kinaranggas ti pulis laban iti demonstrasyon.

Nagiyebkas ti suporta ken pannakikaykaysa iti dangadang ti umili a Kenyan ti League of Peoples’ Struggles Africa ken West Asia Regional Committee. Inallukoy da dagiti Kenyan nga ad-adda pay nga agpursigi iti sango ti kumarkaro a panagikuspil.

“Rumbeng laeng nga agtuloy iti panag-organisa kadagiti Kenyan ken agisayangkat kadagiti aksyon masa tapno iyabante ti awag para iti nailyan a wayawaya ken demokratiko a karbengan,” pablaak ti komite. Kas iti naipamatmat ti nasaknap a demonstrasyon ti umili a Kenyan idi 2024, mamati ti ILPS a kabaelan nga iduron ti dumakdakkel a tignay ti rehimen Ruto nga isanud dagiti bulok a patakaran daytoy.