Tignay iti maika-3 tawen ni Marcos. Nagmartsa idi Hunyo 30 agturong iti Mendiola idiay Manila dagiti nailyan-demokratiko nga organisasyon tapno babalawen ken singiren ti rehimen Marcos iti okasyon ti maikatlo a tawen daytoy iti poder. Binatikos da ti panagpakaaso-aso ti rehimen iti imperyalismo a US, dagiti parigat a patakaran, pasista a panagikuspil ken dagiti inutil a patakaran. Kapada a protesta ti naisayangkat idiay Baguio City ken Iloilo City.

Piket kontra panagikkat ti SkyCable. Nagpiket ti SkyCable Supervisors, Professionals/Technical Employees Union (SSPTEU) idi Hunyo 24 iti batog ti kumpanya idiay Quezon City tapno supyaten ti panagikkat kadagiti mangmangged ti SkyCable Corporation. Saan a bumaba iti 133 kameng ti unyon ti posible a masisante, malaksid pay kadagiti mangmangged a saan a kameng ti unyon.

Panagsupyat iti demolisyon kadagiti floating house idiay Cavite. Nagprotesta dagiti mangngalap a kameng ti Pambansang Lakas ng Kilusang Mamamalakaya ng Pilipinas (Pamalakaya) iti igid-baybay ti Bacoor City idi Hunyo 24 tapno supyaten ti pangta a demolisyon kadagiti balay da a nakatakder iti baybay. Mapatta-patta a nasurok 100 a pamilya ti mapadisi iti demolisyon. Ti demolisyon ket kanaig ti plano a 420-ektarya a reklamasyon a proyekto ti Frabelle Fishing Corporation ken ti lokal a gubyerno.