Naangay idiay Rome, Italy idi Hunyo 27-28 ti “Pagtatanim: Sowing Seeds of Faith Solidarity for the Filipino People’s Struggle for Peace,” maysa a taripnong ti nasurok 70 a mangibagi ti nadumaduma a pammati ken dagiti grupo iti karbengan-tao manipud iti 13 a pagilyan. Naiyaramid daytoy iti sango ti madagdagus a pagkasapulan para iti panagkaykaysa iti intar ti tao’t simbaan tapno suportaran ti dangadang dagiti Pilipino para iti kapya.

Iti panangidaulo ti Council of Leaders for Peace Initiatives, insayangkat met dagiti mangibagi ti nadumaduma a grupo ken sektor ti Mindanao-wide Peace Conference idi June 24 idiay Cagayan De Oro City. Ginuyugoy da ti umili a suportaran ti saritaan iti kapya iti baet ti GRP ken NDFP, tapno sungbatan ti ramut ti armado a risiris iti pagilyan.