Iti tengnga ti awan-ressat nga operasyon-militar manipud 2024, balligi a naisayangkat iti maysa a larangan gerilya idiay Southern Tagalog ti maysa a kumperensya iti gawaing masa ken trabaho iti militar. Kangrunaan a panggep ti panagtitipon dagiti yunit ti New People’s Army (NPA) nga aglagom ken agbibinningay kadagiti kapadasan tapno nasaysayaat a masango ti kumarkaro a kampanya a panagrebbek ti Armed Forces of the Philippines (AFP) iti subrehiyon. Kabilang ditoy ti naglalaok a natataengan, makintengnga ken agkakabanwag a kadre. Nasurok kagudwa ti nakipaset ket agtutubo.

Agadal, agilinteg, umabante

Naluktan ti kumperensya iti panagadal iti dua a kaso a maadal iti gawaing masa. Naadaw ditoy ti kapadasan ti dua a yunit ti Hukbo iti nasurok-kumurang a makatawen. Mayor a punto a napagtalantanan ti manera dagiti yunit iti gawaing masa: ti panangbalanse iti trabaho a panagpalawa ken panagpauneg, ken ti kabayag ti panagkampo dagiti yunit ken kaasideg dagitoy kadagiti lugar a nakakonsentraan ti masa. Natadem a natudo ti konserbatismo iti gawaing masa ken paboritismo kadagiti base a mailinlinteg tatta.

Natudo ti tulbek a papel ti trabaho iti edukasyon, propaganda, kultura ken trabaho a medikal iti epektibo, nauneg ken nasaknap a gawaing masa. Maysa a nasayaat nga ehemplo daytoy ti panangbukel ti maysa nga iskwad ti praymer iti maysa a munisipalidad a mangtaltalantan iti agdama a sitwasyon ken parikut ti masa karamanen ti nabaknang a rebolusyonaryo a pakasaritaan ti munisipalidad manipud iti panagsukisok iti gimong. Epektibo a naaramat ti praymer tapno pagkaykaysaen ti masa ken itakder dagiti grupo ken balangay dagiti rebolusyonaryo nga organisasyon ti masa iti nasao nga ili.

Naipunto met ti kinapateg ti pannakipaset ti Hukbo iti produksyon ti masa ken panangipaay kadakuada ti serbisyo a medikal iti gawaing masa. Kadagiti positibo ken negatibo a kapadasan a nailanad, limmatak ti mapangngeddeng a papel ti usto a panangidaulo ti Partido ken ti natibker a panagkaykaysa tapno maiyabante ti Hukbo ti gawaing masa iti laksid dagiti tubeng, kinarigat ken agbaliw-baliw a kasasaad. Kalpasan ti panangilanad kadagiti kaso a maadal, rinebyu da ti “Dagiti Basaran Prinsipyo iti Gawaing Masa iti Kaaw-awayan.”

Sumaruno a nailanad ken napagtalantanan dagiti kaso a maadal agpada kadagiti naballigi ken napaay a taktikal nga opensiba karaman dagiti sumagmamano a depensiba a labanan. Tampok kadagiti kaso a maadal ti kinapateg ti trabaho iti paniktik ken panag-organisa ken panagpatignay iti masa para iti daytoy a trabaho.

Kas iti gawaing masa, nalatak kadagiti kaso a maadal ti pagkasapulan iti absoluto a panangidaulo ti Partido iti Hukbo tapno pairuten ti panagkaykaysa anyaman a kasasaad ti sangwen. Nu awan ti kastoy a panangidaulo ti partido, saan a maaramid ti nasayaat a panagdepensa laban iti kabusor ken panagrebbek ditoy nga isu ti kangrunaan a rebbengen ti Hukbo. Kalpasanna ket inadal da ti “Dagiti Usapin iti Estratehiya iti Rebolusyonaryo a Gubat ti China” ni Mao Zedong.

Adda iti bugas ti panaglagom kadagiti kapadasan iti gawaing masa ken militar ken panangrepaso iti teorya kanaig ditoy ti panangsippaw ken panangpauneg dagiti kadre iti pannakaawat da kadagiti basaran a prinsipyo ti pannakigubat a gerilya iti tukad ti estratehiko a depensiba ken iti kasasaad a balbaliw nga agpappapigsa ti NPA manipud iti panag-atras nga inbunga dagiti pang-uneg a pagkapuyan ken iti panangsango iti atake ti kabusor.

Nagisayangkat ti kapehan iti sumagmamano a sesyon iti rabii nu sadinno a naibingay ti kapadasan iti panagpasampa kadagiti agtutubo a mannalon, katutubo ken intelektwal. Nangted daytoy kadagiti balitok nga adal ken inspirasyon nu kasano a paregtaen ti panagpasampa iti NPA ken nu kasano a patibkeren ken palaingen dagiti Nalabbaga a mannakigubat iti tengnga ti pukpukan a pannakilaban iti kabusor.

Tapno ramuten iti ideolohiya dagiti pagkapuyan ken parikut, naadal met ti “Espesyal a Kurso iti Empirisismo” ken “Kanaig iti Praktika” ni Mao. Gagem daytoy nga epektibo a puntiryaen ti empirisista a tendensya ti panagpanpanunot ken aramid a naipakita kadagiti kaso a maadal. Partikular a rupa daytoy ti panagpakaanay iti nasina-sina a datos kanaig iti kasasaad ken pagbiagan ti masa, narabaw a panangammo iti rebolusyonaryo a pakasaritaan dagiti erya ken naata a paniktik. Nalawag iti kapadasan ti larangan a ti saan a panangkumpleto ken kinakurang iti panangbukel iti panagsukisok iti gimong ken panagamiris iti dasig ket agbungbunga kadagiti saan nga umannatop a patakaran ken programa iti pulitika ken dagiti plano a militar.

Iti panagleppas ti kumperensya, nangted dagiti kakadwa kadagiti repleksyon da. Segun ken Ka Lima, “Kasapulan nga iwaksi ti suhetibismo ken indibidwalismo iti tunggal linabag ti kinatao tayo, ti arogansya ken ti kina-kampante iti amin nga aspeto. Nalaka iti sarita, ngem karit iti aktwal. Baliwan tayo ti wagas ti panagpanpanunot tapno agbalin a nasirib ti panagamiris tayo kadagiti banag ken agbalin nga usto dagiti addang tayo iti panagrisut kadagiti parikut.”

“Lumaban tapno agpapigsa! Agpapigsa bayat a lumablaban!” Daytoy ti awag ti tignay panagilinteg kadagiti rebolusyonaryo iti Southern Tagalog.

Iti laksid ti sangwen a kasasaad militar, nangato ti pangngeddeng dagiti Nalabbaga a kumander, giya iti pulitika ken mannakigubat idi agsisina dagiti yunit para kadagiti baro a trabaho nga intuding ti kumperensya. Nalawag ti karit para iti Partido ken Hukbo iti agdama a kritikal a tukad ti rebolusyonaryo a tignay: Baklayen ti umad-ado ken dumakdakkel a trabaho ken sakripisyo nga addaan natibker a pakinakem iti panagserbi iti umili ken talek iti kinausto ken panagballigi ti rebolusyon.