Kadagiti napalabas a lawas, naimaldit ti lima a biktima ti pulitikal a pammapatay dagiti pwersa ti estado. Malaksid ditoy, adda met dagiti kaso ti panag-aresto, pammaltog ken panaglipit. Nayon dagitoy iti agtutuon a krimen ti rehimen US-Marcos iti tallo a tawen na iti poder.

Idiay Masbate, rinatrat ti bala ken napatay dagiti pwersa ti estado ti 25-anyos a sibilyan a ni Joey Oas iti Barangay San Carlos, Palanas idi Hunyo 29. Pinaruar da isuna a “limmaban” ken naalaan ti maysa a pistola, magmagasin ken bala. Pabpabasolen da isuna a kameng ti sparrow yunit ti New People’s Army (NPA).

Idiay Leyte, ingagara a pinapatay ti 93rd IB ken 802nd IBde ti dua a hors de combat a kameng ti NPA ken maysa a medik idi Hunyo 18 iti Barangay Cogon, Carigara. Masakit ken agpapaimbag idi da Juanito Selleca Jr (Ka Tibor/Ka Rey) ken Sadam Paclita (Ka Dimple) idi rauten ken pinalto-paltogan dagiti soldado. Kadwa da a pinapatay dagiti soldado ni Lino Delante (Ka Dodong), maysa a medik a mangay-aywan kadagiti pasyente. Saan nga armado ti tallo.

Idiay General Santos City, pinalto-paltogan ken napatay dagiti saan pay a mabigbig a tao ni Ali Jejhon S. Macalintal, maysa a brodkaster iti radyo, idi Hunyo 23 iti Barangay Lagao. Ni Macalintal, maysa a transwoman, ket nagbalin nga aktibo a kameng ti progresibo a grupo manipud idi 2002. Idi 2024, nag-ulat ni Macalintal a liplipiten ken sursuroten isuna dagiti ahente ti Task Force Gensan. Mano nga aldaw sakbay a pinaltogan da, nakaawat kadagiti pangta iti biag na.

Panag-aresto. Lima nga aktibista a pangkultura ti inaresto dagiti pwersa ti estado idi Hunyo 27 iti Barangay Pasong Buaya II, Imus, Cavite. Iti kapatur ti oplan pinta da, sinurot, pinalawlawan, pinangtaan usar ti paltog sakbay nga inpan isuda iti barangay hall. Temporaryo a nawayawayaan da idi Hulyo 1 ken sumangsango kadagiti kaso a malicious mischief ken bandalismo.

Pammaltog. Idiay Negros Oriental, dursok a nagputok-putok ti paltog dagiti “trigger happy” a soldado ti 62nd IB iti Sityo Putat, Barangay Humay-humay iti Guihulngan City idi Hunyo 23.

Iti sumaruno nga aldaw, pwersado a sinerrek dagiti soldado ti balay ni Bobby Gemodo iti Sityo Laos, Barangay Binobohan iti syudad tapno lipiten isuna. Napan met dagiti soldado iti balay ni Mario Noyad iti Sityo Natae, Barangay Binalbagan, Canlaon City tapno butbutngen ken pangtaan isuna.