Ginwagayway ang mga bandera sang bahaghari kag taas-inumol nga nagmartsa ang ginatos ka katapo sang sektor sang LGBTQ+, mga alyado kag progresibong grupo sadtong Hunyo 26 sa Stonewall Philippines Pride March nga ginhiwat sa Recto Avenue, Manila. Nakig-gitgitan sila sa mga pulis agud igiit ang paglunsar sang programa sa Mendiola.

Sa pagpanguna sang pungsodnon-demokratikong grupo sang mga LGBTQ+ nga Bahaghari, gintukod sang mga pormasyon nga Pride (ginasaulog sa bulan sang Pride) ang Stonewall Philippines. Pormal nga gindeklarar sang bag-o nga organisasyon ang tuig-tuig nga pagpamuno sang militante nga mga aktibidad kag martsa para sa Pride kada Hunyo.

Pagsaludo kag pagkabuhi ang Stonewall Philippines sa pinakauna nga Pride March sa Pilipinas kag bisan sa Asia – ang Stonewall Manila nga ginlunsar sadtong Hunyo 26, 1994 sa Quezon City. Ginpangunahan ang militante nga martsa kag mitsa sang pila ka dekada nga paghimakas sang LGBTQ+ sang Progressive Organization of Gays in the Philippines (ProGay), kabulig ang Metropolitan Community Church (MCC).

Upod sang panawagan batuk sa diskriminasyon sa LGBTQ+ kag pagtib-ong sa mga kinamatarung sang sektor, nagtindog sila sadto batuk sa paantus nga Value Added Tax (VAT), pagsaka sang presyo sang lana kag balaklon kag ginbuyagyag ang mga kontra-pumuluyo nga patakaran sang sadto rehimen US-Ramos.

Trenta’y uno ka tuig ang nagligad, ginapanawagan subong sang sektor ang pagpasar bilang layi sang SOGIE Bill, makabuhi nga sweldo, trabaho, matuod nga reporma sa duta kag pungsodnon nga industriyalisasyon, kag independyente nga patakaran pangluwas, kahilwayan para sa Palestine kag mga pungsod nga ginapigos sang US. Ginasaluduhan nila ang mga martir sa sektor sang LGBTQ+ nga nagserbe nga mga organisador kag aktibista pareho nanday Alex Dolorosa, Chad Booc, Ryan Hubilla, Ali Macalintal kag madamo pa nga iban.

Magpakigbahin sa pungsodnon demokratikong rebolusyon

Nagpahayag sang pagpakig-isa kag pagsaludo ang Makabayang Kilusan ng Bagong Kababaihan (Makibaka) sa sektor sang LGBTQ+ sa pagsaulog sang Pride sadtong Hunyo. Gina-engganyo sang grupo ang sektor nga makig-isa kag direkta nga makigbahin sa pungsodnon-demokratikong rebolusyon nga matuod kag lubos nga magahawan sang dalan para sa himpit nga kahilwayan sang LGBTQ+ kaupod ang pumuluyo nga pigos kag ginahimuslan.

Kaangot sini, nagapaandam ang grupo nga mangin mabinantayon sa pagpangsabotahe kag pagpang-into sang imperyalismo kag tanan nga reaksyon sa paghimakas sang LGBTQ+ kag pagsaulog sa bulan sang Pride. Siling sang Makibaka, ginalabugay sang imperyalismo ang pagsaulog agud ipahilayo ang LGBTQ+ sa paghimakas batuk sa diskriminasyon, kag pungsodnon nga pagpamigos kag paghimulos.

Ginahingalitan sang mga dalagko nga korporasyon kag mga pulitiko ang pagsaulog sang Pride. Samtang ginapatuman sang mga ini kag sang imperyalistang US ang daw pyesta nga Pride, padayon ang pagpabilin sang mga layi kag patakaran sa ekonomiya kag pulitika nga mas nga nagalubong sa mga LGBTQ+ halin sa masang anakbalhas kag nagatulod sa ila sa mga kontra-sosyal nga mga aktibidad agud mabuhi.

Isa ka manipestasyon sini ang “rainbow washing” ukon “rainbow capitalism.” Nagakahulugan ini sang paggamit sa mga simbolo kag lenggwahe sang sektor sang LGBTQ+ para magkita sang mas dalagko ang mga korporasyon.

Nagapanawagan man ang grupo nga mangin kritikal ang Pilipino nga mga LGBTQ+ sa pangkultura nga opensiba sang imperyalistang US sa panghuna-huna kag gawi sang masa. Ginpapalapnag sang imperyalismo ang burges-dekadente nga kultura kaangay sang sayup nga basehan sang kagayon kag iban pa nga basehan sang pagka-LGBTQ+. Unod man sini ang indibidwalismo kag hypersexuality.

Sa atubang sang mga pagtinguha nga ini sang imperyalismo, ginhangkat sang Makibaka ang mga yara sa sektor sang LGBTQ+ nga usoyon ang banas sang wala pagkangilin nga paghalad sang panahon kag kabuhi para sa pungsodnon demokratikong rebolusyon, labaw pa sa ila kaugalingon.

Dapat sundon ang halimbawa sang mga namartir nga Pulang kumander kag hangaway sang Bagong Hukbong Bayan lakip nanday Val Mante (Ka Richard), Daniel Imperial, Wanda Gumban (Ka Waquin), Kevin Castro (Ka Facio), Jo Lapira (Ka Ella), Ciela Pacaldo (Ka Alena), Jethro Isaac Ferrer (Ka Pascual), Kal Peralta (Ka Rekka), Queenie Daraman (Ka Kira), Dee Supelanas (Ka Dahlia), kag madamo pa nga iban. Dapat saluduhan ang paghalad nila sang kusog, kaalam, kaisog kag kabuhi para sa masa kag lain-lain nga patag sang rebolusyonaryong hilikuton.