Nagiyebkas ti panagsupyat ken panagdanag ti nadumaduma a grupo laban iti gakat iti Kongreso ti US nga agitakder ti pabrika ti bala iti Subic Bay, Zambales. Kunada, daytoy a plano ket pangta iti nailyan a seguridad ken makaapektar iti pagbiagan dagiti mangngalap iti Zambales.

Rimwar ti plano a panagitakder ti pabrika iti maysa nga ulat ti US House Committee on Appropriations a naisapubliko idi Hunyo 24.

“Iti pakasaritaan, saan a ti daga ti US ti target dagiti kabusor daytoy a pagilyan, nu di ket dagiti base militar ken dagiti satelayt a base daytoy iti sabali a lugar,” kuna ti Pamalakaya.

Binabalaw met ti Kilusang Magbubukid ng Pilipinas (KMP) ti insayangkat ti US nga Operation Lightning Strike war games idi Hunyo 30 idiay Palayan City, Nueva Ecija iti sidong ti Salaknib Phase 2. Pinabettak da iti daytoy a war games ti dua a High Mobility Artillery Rocket System (HIMARS) ken nagusar da ti uppat nga Apache attack helicopter.

Kuna ti grupo, napeggad dagitoy a war games kadagiti komunidad ti mannalon, nangrunan dagiti live-fire missile test. Mamati ti KMP a daytoy ket saan a para iti depensa wenno kapya nu di ket paset ti panagsagana ti US para iti gera.

Kabayatanna, nagmartsa idiay Sydney, Australia dagiti Pilipino ken Australian idi Hunyo 22 kas panangbatikos iti naisayangkat a Pilipinas-Australia Kasangga war games. Dua a daras kada tawen a naisayangkat manipud 2023 ti Kasangga nu sadinno a nawaya a makaserserrek dagiti tropa nga Australian iti teritoryo ti Pilipinas.