Hublag sa ika-3 ka tuig ni Marcos. Nagmartsa sadtong Hunyo 30 padulong sa Mendiola sa Manila ang mga pungsodnon-demokratiko nga organisasyon agud batikuson kag sukton ang rehimen Marcos sa okasyon sang ikatatlo ka tuig sini sa poder. Ginbatikos nila ang pagpaido-ido sang rehimen sa imperyalismong US, paantus nga mga patakaran, pasistang pangpangsumpo kag inutil nga mga patakaran. May amo man nga protesta nga ginlunsar sa Baguio City kag Iloilo City.

Piket kontra kakasanay sa SkyCable. Nagpiket ang SkyCable Supervisors, Professionals/Technical Employees Union (SSPTEU) sadtong Hunyo 24 sa atubang sang kumpaniya sa Quezon City para pamatukan ang kakasanay sa SkyCable Corporation. Indi magnubo sa 133 myembro sang unyon ang posible nga kakason, magluwas pa sa mga mamumugon nga indi katapo sang unyon.

Pagpamatuk sa demolisyon sa mga floating house sa Cavite. Nagprotesta ang mga mangingisda nga katapo sang Pambansang Lakas ng Kilusang Mamamalakaya ng Pilipinas (Pamalakaya) sa baybay sang Bacoor City sadtong Huyo 24 agud punggan ang peligro nga demolisyon sa ila mga balay nga nagatindog sa dagat. Ginabana-bana nga kapin sa 100 ka pamilya ang mapalayas sa demolisyon. Ang demolisyon kaangot sa plano nga 420-ektarya nga reklamasyon nga proyekto sang Frabelle Fishing Corporation kag sang lokal nga gobyerno.