Paggios ha ika-3 katuig ni Marcos. Nagmartsa hadton Hunyo 30 tipakadto ha Mendiola ha Manila an mga nasyunal-demokratiko nga organisasyon agud suknaon ngan sukton an rehimen Marcos ha okasyon han ikatulo katuig hini ha poder. Ginsukna nira an pagpapakaniyutiyo han rehimen ha imperyalismo nga US, pakuri nga mga palisiya, pasista nga panmuypoy ngan waray pulos nga mga palisiya. Kapareho nga protesta an iginlansar ha Baguio City ngan Iloilo City.

Piket kontra taranggalay ha SkyCable. Nagpiket an SkyCable Supervisors, Professionals/Technical Employees Union (SSPTEU) hadton Hunyo 24 ha atubangan han kompaniya ha Quezon City agud tipahan an taranggalay ha SkyCable Corporation. Diri mamenos ha 133 nga membro han unyon an posible nga patalsikon ha trabaho, labot pa ha mga trabahador nga diri kaapi ng unyon.

Pagtipa ha demolisyon ha mga floating house ha Cavite. Nagprotesta an mga parupangisda nga kaapi han Pambansang Lakas ng Kilusang Mamamalakaya ng Pilipinas (Pamalakaya) ha baybayon han Bacoor City hadton Hunyo 24 agud tipahan an hulga nga demolisyon ha ira mga balay nga nakatindog ha dagat. Gintatantiya nga masobra 100 kapamilya an mapapalayas ha demolisyon. An demolisyon kasumpay han plano nga 420-kaektarya nga reklamasyon nga proyekto han Frabelle Fishing Corporation ngan han lokal nga gubyerno.