Sa katapusan sa bulan, mobarog si Ferdinand Marcos Jr atubangan sa Kongreso aron subling linglahon ang katawhan mahitungod sa mga “nahimo” niya sa milabayang tulo ka tuig. Taas kaayo ang iyang giandam nga mga bakak apan dili niya matabunan ang walay katapusang kasakit nga nasinati sa katawhan ilalum sa iyang paghari. Walay hunong ang pagkahagba sa ang-ang sa panginabuhi sa mayorya sa katawhan. Walay kapares ang korapsyon sa pamilyang Marcos. Buta ang pagsunod niya sa dikta sa among imperyalistang US. Nagkagrabe ang pulitikanhong pagpanumpo batok sa katawhang nagabarog ug nagasukol.

Labaw nga pag-antus ang dala ni Marcos sa yanong katawhan. Pabug-at pa gihapon sa katawhan ang mahal nga presyo sa bugas, nga dili matabunan sa mga gimik ni Marcos. Kakunsaba si Marcos sa mga kumpanya sa lana sa pagsaka sa presyo sa diesel ug gasolina. Taliwala sa lapad nga panawagan, gibabagan sa Malacañang ang sugyot nga ₱200 dugang sa inadlawang suhulan sa mga mamumuo, ug dugang buhis na hinuon ang gipaabaga sa katawhan. Walag too ang pagpanangtang sa trabaho, malukpanon ang disempleyo, libu-libo ang napugos nga magtrabaho sa ubang nasud, samtang gatusan ka libong kabus ang gipalayas sa ilang gipuy-an, ug walay puas nga ginailugan og yuta, pangisdaan ug mga tinubdan sa panginabuhian.

Ginapatuman niya ang mga palisiya ug programa nga labaw nagpaburot sa mga langyanwng dagkung kapitalista, ug mga kakunsaba nga dakung burgesya-kumprador, agalong yutaan ug burukrata-kapitalista. Walag too ang pagpangutang ni Marcos nga wala napahimuslan sa katawhan ug napadulong lamang sa grandyusong mga proyektong pang-imprastruktura nga tinubdan sa kikbak ni Marcos ug mga korap niyang upisyal. Gatusan ka bilyong pisong kinawat nga bahandi sa mga Marcos ang nabalik sa ilang kontrol, samatang gatusan ka bilyong piso usab ang gikawkaw sa porma sa Maharlika Investment Fund, confidential ug intelligence funds ni Marcos, ug giusik-usikan sa sobra-sobrang gastos militar bugti sa gikinahanglang mga katilingbanong serbisyo.

Sama sa milabayng mga rehimen, ginapaburan ni Marcos ang dagkung langyaw ug lokal nga kapitalista aron makahakop sila og maksimum nga ganansya. Ginalansang ni Marcos ang suhulan sa mga mamumuo samtang ginakibhangan ang buwis sa mga kapitalista. Iyang gitugutan ang langyawng pagpanag-iya sa yuta sa Pilipinas (sa takuban sa balaod nga nagtugot sa 99 ka tuig nga “pag-abang”), ug gitangtang ang mga regulasyong pangkinaiyahan aron gawasnong kawkawon ug gun-ubon ang kinaiyanhong bahandi sa nasud.

Ginahatagan sila ni Marcos og armadong proteksyon sa militar ug pulis, nga ginagamit sa pagsumpo sa katawhang nanalipud sa ilang yuta ug panginabuhian. Sa kasyudaran, ginatarget sa mga pasistang gaway sa reaksyunaryong estado ang mga mamumuong naga-unyon ug nagabarog aron panalipdan ang ilang mga panawagan alang sa dugang suhulan. Ginagamit ni Marcos ang NTF-Elcac ug ang “Anti-Terrorism Law” sa pagsumpo sa mga katungod sa mga mamumuo, semi-proletaryo, kabatan-onang estudyante, mangingisda, kababayen-an ug uban pang demokratikong sektor aron pugngan silang mag-organisa ug mosalmot sa kalihukan alang sa katilingbanong kausaban.

Sa kabanikanhan, dayag ang terorismo sa estado sa pagpahamtang og balaod militar sa mga barangay ug komunidad, nga ginaingon sa NTF-Elcac nga nagasuporta sa armadong rebolusyonaryong kalihukan. Walag too ang ekstrahudisyal nga pagpamatay, pagpanghadlok, pagpangutingkay sa mga kabalayan, iligal nga pag-aresto, “pagpasurender,” paturagas nga pagpamusil, pagpanganyon ug pagpanghulog og bomba sa umahan ug kabukiran duul sa mga komunidad. Bata man o tigulang, walay ginapiling biktima ang brutalidad sa mga pasistang ginsakpan ni Marcos. Labing bangis ang pagpanumpo sa rehimeng Marcos sa mga suok nga baryo ug sityo sa mga mag-uuma ug minoryang katawhan, nga giilugan og yuta sa mga langyawng kumpanya sa mina, plantasyon, proyektong pang-enerhiya ug eko-turismo.

Ginagamit ni Marcos ang karatula sa “kalinaw” aron tabunan ang gubat sa pagpanumpo niini sa patriyotiko ug demokratikong kalihukan sa katawhang Pilipino. Kini ang laraw sa mga imperyalista ug nagharing hut-ong nga “kalinaw” nga nakabusal ang mga dinaugdaug ug pinahimuslan. Dili kini ang makatarunganon ug malahutayong kalinaw nga pangandoy sa katawhan, nga matagamtam lamang pinaagi sa pagtubag sa ilang batakang mga pangayo alang sa libreng pag-apud-apud sa yuta, nasudnong industriyalisasyon, tinuod nga kagawasan ug demokrasya.

Sa duso sa among imperyalista, gimando ni Marcos nga pakusgon ang gubat aron kuno pukanon ang Bagong Hukbong Bayan. Subsub ang pakigkuntsabo ni Marcos ug sa AFP sa pwersang militar sa US sa pagdeploy niini og mga tropa, sakyanan ug hinagibang militar sa Pilipinas, ug sa paglunsad og sunud-sunod nga mga pagbansay sa gubat nga nagatarget sa China. Imbes nga hatagag dalan ang malinawong dayalogo sa China, labing gipainit sa rehimeng Marcos ang armadong tensyon sa South China Sea.

Walay masaligan ang katawhang Pilipino sa paantus, pasista, ug papet nga rehimeng Marcos. Samtang nakapwesto si Marcos sa Malacañang, iyang gamiton ang iyang poder aron labawng kawaton ang nasudnong bahandi, palugwayon ang iyang gahum, ug makig-indigay sa iyang mga karibal sa pulitika. Walay laing kadangpan ang katawhan kundili ang mobarog ug suklan ang rehimeng US-Marcos.

Kinahanglang pakusgon ug palig-onon sa katawhan ang ilang organisadong kusog. Sa kasyudaran, kinahanglang hiusahon ang mga mamumuo, semi-proletaryo ug mga kabatan-onang estudyante, isip dugukan sa kusog sa uban pang mga demokratikong sektor. Kinahanglang palagsikon ang mga demokratiko ug anti-imperyalistang pakigbisog sa masa sa mga pabrika, komunidad ug mga eskwelahan.

Sa kabanikanhan, kinahanglang pakusgon ug palapdon ang hukbong bayan ug ang mga sanga ug komiteng seksyon sa Partido aron todong hiusahon o subling tukuron ang mga kahugpungan sa mag-uuma aron manalipud batok sa pasismo, ug aron iasdang ang mga pakigbisog batok sa mga pyudal ug semipyudal nga pagpahimulos, ug pakusgon ang singgit alang sa tinuod nga reporma sa yuta. Kinahanglang pakusgon ang paglunsad og mga taktikal nga opensiba ug espesyal nga operasyon aron silutan ang pinakalunod-patay nga pasista ug kab-oton ang gipangayong hustisya sa katawhan.

Walay laing angayang tubag ang katawhang Pilipino kundili ang pagpalagsik sa kalihukang masa ug armadong pakigbisog aron batukan ang pagpangdauggaug ug pagpanglupig sa rehimeng US-Marcos. Sa walay kakapoy nga paglahutay sa dalan sa pagsukol, siguradong mapanubag si Marcos ug atubangon ang paghukum sa tibuok katawhan.