Gipahigayon sa Rome, Italy niadtong Hunyo 27-28 ang “Pagtatanim: Sowing Seeds of Faith Solidarity for the Filipino People’s Struggle for Peace,” usa ka panagtapok sa kapin 70 ka representante sa lain-laing tinuuhan ug mga grupo sa tawhanong katungod gikan sa 13 ka mga nasud. Gipahigayon kini atubangan sa hinanaling panginahanglan alang sa panaghiusa sa han-ay sa tawong simbahan aron suportahan ang pakigbisog sa mga Pilipino alang sa kalinaw.

Nagtapok usab ang mga representante sa lain-laing grupo ug sektor sa gipahigayon nga Mindanao-wide Peace Conference niadtong Hunyo 24 sa Cagayan De Oro City sa pagpanguna sa Council of Leaders for Peace Initiatives. Panawagan nila nga suportahan ang panaghisgot kalinaw tali sa GRP ug NDFP nga mosulbad sa mga ugat sa armadong pakigbisog sa nasud.