Gipirmahan niadtong Hunyo 26 sa rehimeng Marcos ug sa US Trade and Development Agency (USTDA) ang kasabutan alang sa pautang nga $3.8 milyon gikan sa gubyerno sa US para sa paunang panukiduki ug pagtuon sa proyektong Subic-Clark-Manila-Batangas (SCMB) Railway. Tumong sa proyekto nga magtukod og sistema sa riles para sa transportasyon sa mga pamatigayon aron kibhangan kuno ang paghuot sa dungguanan sa Maynila.

Sa gilay-ong 250 kilometro, pagakonektahon sa SCMB Railway ang Subic ug Clark, moagi sa National Capital Region hangtud sa pantalan sa Batangas. Sumala sa plano sa USTDA, magsugod ang konstruksyon sa bahin sa Subic-Clark sa 2027-2028, ug sa bahin sa Clark-Manila-Batangas sa 2028-2029. Target nga magsugod ang operasyon sa riles sa sayong bahin sa 2030. Gibanabana nga moabot sa $3.2 bilyon ang kantidad sa tibuok proyekto.

Una nga gitanyag sa rehimeng Duterte ang proyekto sa riles sa tunga-tunga sa Subic ug Clark ngadto sa gubyerno sa China niadtong 2016. Nagsaad ang China nga pondohan kini sa 2018 apan gibawi ang suporta niadtong 2022. Sa paglingkod ni Marcos sa gahum, gibanhaw ug gipalapad kini hangtud Batangas sa duso sa US.

Gipailalum ang maong proyekto sa gitawag og Luzon Economic Corridor (LEC), usa ka trilateral nga programa tali sa US, Pilipinas, ug Japan nga nagtinguhang padalion ang pagbubu sa kapital, personahe, ug kagamitan pinaagi sa mga proyekto sa imprastruktura sama sa renewable energy, pantalan, airport, tulay, ug kalsada. Ang LEC mao ang unang proyekto sa Partnership for Global Infrastructure and Investment sa US ug yaweng estratehiya niini sa Indo-Pacific batok sa China, ilabina sa Belt and Road Initiative niini.

Gawas sa SCMB Railway, gipailalum usab sa LEC ang 27 ka lain pang proyekto sa imprastruktura sama sa pagpalapad sa Clark International Airport, Bataan-Cavite Interlink Bridge, Subic Bay (Redondo-Ilanin) Bridge, Central Luzon Link Expressway, North Luzon East Expressway, Laguna Lakeshore Road Network Development, Kalaanan Irrigation Project, North-South Commuter Railway, New Clark City Extension Railway, ug Southern Batangas Airport.

Ang SCMB Railway ug uban pang imprastruktura pagatukuron alang sa mga langyawng kumpanya, sama sa mga kumpanyang Amerikano sa manupaktura ug baterya nga gustong makapahimulos sa abundang rekurso sa nickel, cobalt, copper, ug bauxite sa Pilipinas.

Target sa US, uban ang Japan ug mga nasud sa NATO, nga mamuhunan og hangtud $100 bilyong kapital sa sunod 10 ka tuig. Kadaghanan niini nga pondo anaa sa porma sa utang ug pribadong kapital nga luwas sa buhis ug walay direktang kalambigitan sa lokal nga ekonomiya.

Kauban sa ekonomikanhong tumong niini, ang SCMB Railway ug uban pang proyekto sa ilalum sa LEC adunay klarong militar ug geopolitikal nga katuyoan. Pagakonektahon sa SCMB Railway ug sa network sa mga tulay ug kalsada ang dagkung “EDCA site” o mga base militar sa US sa Luzon, ug padalion ang pagtransport sa mga armas, tawo, ug mga sakyanan sa militar. Padalion usab niini ang transportasyong militar sa ubang bahin sa Luzon. Samtang ang pagpalapad sa airport sa Clark magsilbi sa mga eroplanong iggugubat sa US, nga karon adunay dagkung hangar ug parking area sa kasikbit nga Basa International Airport.

Mas klaro ang militar nga katuyoan sa LEC sa bag-ong anunsyo sa Kongreso sa US nga planong pagtukod og pabrika sa bala sulod sa Subic. Sa wala pa kini, nangabang na ang US ug dakung bodega sa Subic aron ipahimutang ang gamit militar nga giingong kabahin sa preparasyon sa mga kalamidad.

Gawas sa Pilipinas, ang LEC kabahin sa mas lapad nga estratehiya sa US aron pugngan ang nagkakusog nga impluwensya sa China sa Southeast Asia. Bisan og dominante pa gihapon ang pamuhunan sa US sa rehiyon, daghang mga nasud ang mas nagapabor sa pamuhunan sa China alang sa dagkung proyekto sa imprastruktura, manupaktura, ug mina, ug busa wala sila nagsira ang heyopulitikal nga mga katuyoan niini. Dili sama sa Pilipinas, ang mga nasud sa ASEAN naglikay nga mosulod sa eksklusibong alyansa militar sa US.