Nagpadayag og pagsupak ug kabalaka ang lain-laing grupo batok sa balaudnon sa Kongreso sa US nga magtukod og pabrika sa bala sa Subic Bay, Zambales. Matud nila, hulga ang maong plano sa nasudnong seguridad ug makadaut sa panginabuhi sa mga mangingisda sa Zambales.

Mitumaw ang planong pagtukod sa pabrika sa usa ka report sa US House Committee on Appropriations nga gipubliko niadtong Hunyo 24.

“Sa kasaysayan, dili ang kayutaan sa US ang nahimong direktang target sa mga kaaway niining nasud, kundili ang mga base militar ug mga satelayt nga base niini sa ubang lugar,” matud sa Pamalakaya.

Gimakmak usab sa Kilusang Magbubukid ng Pilipinas (KMP) ang gilunsad sa US nga Operation Lightning Strike war games niadtong Hunyo 30 sa Palayan City, Nueva Ecija ilalum sa Salaknib Phase 2. Gipabusikad sa maong war games ang duha ka High Mobility Artillery Rocket System (HIMARS) ug migamit og upat ka Apache attack helicopter.

Matud sa grupo, delikado ang maong mga war games sa mga komunidad sa mag-uuma, ilabina ang live-fire missile test. Nagtoo ang KMP nga dili kini alang sa depensa o kalinaw kundili kabahin sa pagpangandam sa US alang sa gubat.

Samtang, nagmartsa sa Sydney sa Australia ang mga Pilipino ug Australian niadtong Hunyo 22 isip pagmakmak sa gilunsad nga Pilipinas-Australia Kasangga war games. Duha ka beses kada tuig nga ginalunsad gikan 2023 ang Kasangga kung asa gawasnong nagasulod ang mga tropang Australian sa teritoryo sa Pilipinas.