Taliwala sa walay hunong nga mga operasyong militar sukad 2024, malampusong gilunsad sa usa ka natarang gerilya sa Southern Tagalog ang usa ka kumperensya sa gimbuhatong masa ug gimbuhatong militar. Nag-unang tumong sa panagtapok sa mga yunit sa Bagong Hukbong Bayan (BHB) ang magsumada ug mag-inambitay sa mga kasinatian aron mas epektibong atubangon ang nagkagrabeng kampanya sa pagpukan sa Armed Forces of the Philippines (AFP) sa subrehiyon. Misalmot dinhi ang sagol tigulang, hamtong ug batan-ong kadre. Kapin katunga sa tumatambong mga batan-on.

Magtuon, magtul-id, moasdang

Gisugdan ang kumperensya sa pagtuon sa duha ka case study sa gimbuhatong masa. Kinutlo kini sa kasinatian sa duha ka yunit sa Hukbo sa kapin-kun-kulang usa ka tuig. Mayor nga puntong gihisgutan ang manera sa mga yunit sa gimbuhatong masa: ang pagbalanse sa gimbuhatong ekspansyon ug pagpalalum, ug ang gidugayon sa pagkampo sa mga yunit ug gidul-on niini sa mga lugar kung asa adunay konsentrasyon sa masa. Hait nga gipunting ang konserbatismo sa gimbuhatong masa ug paboritismo sa mga base nga ginatul-id karon.

Gipunting ang yaweng papel sa gimbuhatong edukasyon, propaganda, kultura ug gimbuhatong medikal sa epektibo ug nakatugkad nga gimbuhatong masa. Usa ka maayong pananglitan niini ang pagtukod og usa ka iskwad sa praymer sa usa ka lungsod nga nagatuon sa kasamtangang sitwasyon ug problema sa masa lakip na ang bahandianong rebolusyonaryong kasaysayan sa katawhan gikan sa katilingbanong pagtuki. Epektibong nagamit ang praymer aron hugpungon ang masa ug tukuron ang mga grupo ug balangay sa mga rebolusyonaryong organisasyong masa sa lungsod.

Gipunting usab ang kamahinungdanon sa pagsalmot sa Hukbo sa produksyon sa masa ug paghatag kanila og serbisyong medikal sa gimbuhatong masa. Sa mga positibo ug negatibong kasinatian nga gihikyad, mipatigbabaw ang mahukmanong papel sa hustong pagpangulo sa Partido ug ang lig-on nga panaghiusa aron mapaabante sa Hukbo ang gimbuhatong masa taliwala sa mga babag, kalisdanan ug nag-usab-usab nga sitwasyon. Human ang pagpresenta sa mga case study, girebyu ang “Mga Batakang Prinsipyo sa Gimbuhatong Masa sa Kabanikanhan.”

Sunod nga gipresenta ug gihisgutan ang mga case study sa malampuson ug pakyas nga taktikal nga opensiba lakip ang pipila ka mga depensibang panagsangka. Gihatagag duut sa mga case study ang kamahinungdanon sa gimbuhatong paniktik ug pag-organisa ug pagpalihok sa masa alang sa maong gimbuhaton.

Sama sa gimbuhatong masa, tataw sa mga case study ang importansya sa absolutong pagpangulo sa Partido sa Hukbo aron pahugton ang panaghiusa unsamang sitwasyon ang atubangon. Kung wala ang maong pagpangulo sa Partido, dili mahimo ang maayong pagpanalipod batok sa kaaway ug pagpukan niini nga maoy nag-unang tahas sa Hukbo. Human niini, gitun-an ang “Mga Hisgutanan sa Estratehiya sa Rebolusyonaryong Gubat sa China” ni Mao Zedong.

Sa uyok sa pagsumada sa mga kasinatian sa gimbuhatong masa ug militar ug pagtuon balik sa teorya mahitungod dinhi mao ang pagtumbok ug pagpalalum sa mga kadre sa ilang pagsabot sa mga batakang prinsipyo sa gerilyang pakiggubat sa yugto sa estratehikong depensiba ug sa kahimtang nga nsubling nagpakusog ang BHB gikan sa pag-atras nga resulta sa mga internal nga kahuyangan ug sa pag-atubang sa atake sa kaaway.

Naglunsad og kapehan sa pipila ka sesyon sa gabii kung asa gipaambit ang kasinatian sa pagpasampa sa kabatan-onag mag-uuma, lumad ug kabatan-onang intelektwal. Naghatag kini og mga bulawanong pagtulun-an ug inspirasyon kung paunsa palagsikon ang pagpasampa ngadto sa BHB ug kung paunsa palig-onon ug palambuon ang mga Pulang manggugubat taliwala sa bangis nga pakigsangka sa kaaway.

Aron ugaton sa ideolohiya ang mga kahuyangan ug problema, gitun-an usab ang “Espesyal nga Kurso sa Empirisismo” ug “Hinggil sa Praktika” ni Mao. Laraw niining epektibong puntingon ang empirisistang tendensya sa panghunahuna ug paglihok nga gipakita sa mga case study. Partikular nga dagway niini ang pagpakuntento sa bulag-bulag nga datos mahitungod sa kahimtang ug panginabuhian sa masa, mabaw nga pagsabot sa rebolusyonaryong kasaysayan sa mga erya ug hilaw nga paniktik. Tataw sa kasinatian sa nataran nga ang dili pagkumpleto ug kakulang sa pagtibuok sa katilingbanong pakisusi ug pagtuki sa hut-ong nagaresulta sa mga dili haum nga palisiya ug programa sa pulitika ug mga planong militar.

Human sa kumperensya, nagpaambit ang mga tumatambong sa ilang mga repleksyon. Matud kang Ka Lima, “Kinahanglang isalikway ang suhetibismo ug indibidwalismo sa matag himaymay sa atong pagkatawo, ang arogansya, ang pagkakampante sa tanang aspeto. Sayon kaayong ingnon, pero dakung hagit sa aktwal. Usbon nato ang pamaagi sa panghunahuna aron mahimong hait ang atong pagtuki sa mga butang ug mahimong tukma ang atong mga lakang sa pagsulbad sa mga problema.”

“Mosukol aron magpakusog! Magkusog samtang nagasukol!” Kini ang panawagan sa kalihukang pagtul-id sa mga rebolusyonaryo sa Southern Tagalog.

Taliwala sa pagaatubangong sitwasyong militar, taas ang diwa sa mga Pulang kumander, giya sa pulitika ug manggugubat dihang magbulag-bulag ang mga yunit alang sa mga bag-ong gimbuhatong gitakda sa kumperensya. Tin-aw ang hagit alang sa Partido ug Hukbo sa kasamtangang kritikal nga yugto sa rebolusyonaryong kalihukan: Abagahon ang nagkadaghan ug nagkadakung mga gimbuhaton ug sakripisyo nga adunay dili mapalong nga kadasig sa pag-alagad sa katawhan ug pagsalig sa kahusto ug kalampusan sa rebolusyon.