Sa milabayng mga semana, nataho ang lima ka biktima sa pulitikanhong pagpatay sa mga pwersa sa estado. Gawas dinhi, aduna usay mga kaso sa pag-aresto, pagpamusil ug pagpamig-ot. Dugang kini sa patung-patong nga krimen sa rehimeng US-Marcos sa tulo ka tuig sa poder.

Sa Masbate, giratratan ug napatay sa mga pwersa sa estado ang 25-anyos nga sibilyang si Joey Oas sa Barangay San Carlos, Palanas niadtong Hunyo 29. Gipagawas siyang “misukol” ug nakuhaan og usa ka pistola, mga magasin ug bala. Giakusahan usab siyang myembro sa sparrow yunit sa Bagong Hukbong Bayan (BHB).

Sa Leyte, tinuyong gipatay sa 93rd IB ug 802nd IBde ang duha ka hors de combat nga myembro sa BHB ug usa ka medik niadtong Hunyo 18 sa Barangay Cogon, Carigara. Adunay sakit ug nagpaalim kanhi silang Juanito Selleca Jr (Ka Tibor/Ka Rey) ug Sadam Paclita (Ka Dimple) dihang giatake ug girakrakan sa mga sundalo. Gipatay kauban nila si Lino Delante (Ka Dodong), usa ka medik nga nag-atiman sa mga pasyente. Dili armado ang tulo.

Sa General Santos City, girakrakan ug napatay sa wala pa nailang mga tawo si Ali Jejhon S. Macalintal, usa ka brodkaster sa radyo, niadtong Hunyo 23 sa Barangay Lagao. Si Macalintal, usa ka transwoman, nahimong aktibong myembro sa mga progresibong grupo gikan niadtong 2002. Niadtong 2024, nagtaho si Macalintal nga ginipig-ot ug ginatiktikan siya sa mga ahente sa Task Force Gensan. Pipila ka adlaw ayha gipusil, nakadawat siya og mga hulga sa iyang kinabuhi.

Pag-aresto. Lima ka aktibistang pangkultura ang giaresto sa mga pwersa sa estado niadtong Hunyo 27 sa Barangay Pasong Buaya II, Imus, Cavite. Atol sa ilang oplan pinta, gisundan sila, gidumog, gibaharan gamit ang pusil, ayha gidala sa barangay hall. Temporaryo silang nakagawas niadtong Hulyo 1 ug nag-atubang sa mga kasong malicious mischief ug bandalismo.

Pagpamusil. Sa Negros Oriental, paturagas nga namusil ang mga “trigger happy” nga sundalo sa 62nd IB sa Sityo Putat, Barangay Humay-humay sa Guihulngan City niadtong Hunyo 23.

Sa misunod nga adlaw, pugos nga gisulo sa mga sundalo ang balay ni Bobby Gemodo sa Sityo Laos, Barangay Binobohan sa syudad aron pig-oton siya. Giadtuan usab sa mga sundalo ang balay ni Mario Noyad sa Sityo Natae, Barangay Binalbagan, Canlaon City aron hadlukon ug hulgaon siya.