Mokabat sa 16 ka raliyista ang napatay ug 400 ang nasamdan dihang bangis nga gibungkag sa rehimeng US-Ruto sa Kenya ang mga protesta sa katawhan niadtong Hunyo 25. Ang protesta kabahin sa pagdumdum sa serye sa higanteng mga demonstrasyon nga gilunsad niadtong miaging tuig batok sa neoliberal nga balaodnong Finance Bill 2024, nagkagrabeng kabangis sa pulis ug pagpanumpo sa estado.

Kahinumduman nga napaatras sa higanteng mga protesta niadtong 2024 ang rehimeng US-Ruto sa planong pagpahamtang og bug-at nga buhis nga dikta sa International Monetary Fund (IMF) na labawng magpaantus sa masang Kenyan. Aron maluibong ilusot ang mga buhis, parte-parte kining gisumite sa parlamento sa Kenya sa milabayng tuig.

Gilunsad ang mga protesta sa Nairobi, Mombasa, Kisii, ug uban pang syudad. Dala nila ang bandera sa Kenya ug misinggit og “Ruto Must Go” (Palayason si Ruto) ug “Occupy Statehouse” (Sakupon ang Statehouse o puy-anan ni Ruto isip nangulo sa gubyerno). Dala usab nila sa mga protesta ang mga litrato sa mga napatay niadtong miaging tuig sa kabangis sa pulis batok sa demonstrasyon.

Nagpadayag og suporta ug pakighiusa sa pakigbisog sa masang Kenyan ang International League of Peoples’ Struggles Africa ug West Asia Regional Committee. Giawhag nila ang mga Kenyan nga labaw pang magpursigi atubangan sa nagkagrabeng pagpanumpo.

“Husti lamang nga magpadayon sa pag-organisa sa mga Kenyan ug maglunsad og mga aksyong masa aron iasdang ang panawagan alang sa nasudnong kagawasan ug demokratikong katungod,” pamahayag sa komite. Sama sa gipakita sa malukpanong demonstrasyon sa katawhang Kenyan niadtong 2024, nagtoo ang ILPS nga kayang iduso sa nagkadakung protesta ang rehimeng Ruto nga iatras ang mga dunot niining palisiya.