Ha butnga han waray lat-ang nga mga operasyon militar tikang 2024, madinaugon nga iginlansar ha usa nga prente gerilya ha Southern Tagalog an usa nga kumperensya ha buruhaton masa ngan buruhaton militar. Prinsipal nga katuyuanan han katitirok han mga yunit han Bagong Hukbong Bayan (BHB) an magsuma ngan magsarusaruay han mga eksperyensya agud mas maupay nga maatubang an natikagrabe nga kampanya nga panrumok han Armed Forces of the Philippines (AFP) ha subrehiyon. Pinartisipar hini an magkasalado nga kalagsan, namumutngaan ngan barubata nga kadre. Lahos katunga han pinartisipar kabatan-unan.

Mag-aram, magtul-id, magpasulong

Gin-abrihan an kumperensya han pag-aram ha duha nga case study ha buruhaton masa. Ginkuha ini ha eksperyensya han duha nga yunit han Hukbo ha sumobra-kumulang usa katuig. Mayor nga punto nga ginhisgutan an manera han mga yunit ha buruhaton masa: an pagbalanse ha buruhaton ekspansyon ngan konsolidasyon, ngan an kaihaon han pagbase han mga yunit ngan distansya hini ha mga lugar diin may konsentrasyon han masa. Matarum nga gintudlok an konserbatismo ha buruhaton masa ngan pagkamayda paborito ha mga base nga igintutul-id yana.

Gintudlok an yawe nga papel han buruhaton edukasyon, propaganda, kultura ngan buruhaton medikal ha epektibo ngan natuhop nga buruhaton masa. Usa nga maupay nga pananglitan hini an pagbug-os han usa nga iskwad hin praymer ha usa nga bungto nga naghuhulagway ha presente nga sitwasyon ngan problema han masa hasta na an rikohanon nga rebolusyunaryo nga kasaysayan han bungto tikang ha pankatilingban nga imbestigasyon. Epektibo nga nagamit an praymer agud butukon an masa ngan tukuron an mga grupo ngan tsapter han mga rebolusyunaryo nga organisasyon masa ha nasering nga bungto.

Iginpunto liwat an importansya han pagpartisipar han Hukbo ha produksyon han masa ngan paghatag ha ira han panmedikal nga serbisyo ha buruhaton masa. Ha mga positibo ngan negatibo nga eksperyensya nga iginsering, linandaw an mapagdesisyon nga papel han tukma nga pamumuno han Partido ngan an madig-on nga pagkakaurusa agud mahiabante han Hukbo an buruhaton masa ha luyo han mga buko, kakurian ngan pabarubag-o nga sitwasyon. Kahuman han paghisgot ha mga case study, ginrebyu an “Mga Batakan nga Prinsipyo ha Buruhaton Masa ha Kabaryuhan.”

Sunod nga iginpresentar ngan ginhisgutan an mga case study ngaduha han madinaugon ngan pakyas nga taktikal nga opensiba hasta an pira nga mga depensiba nga agway. Ginpalandaw ha mga case study an importansya han buruhaton paniktik ngan pag-oorganisa ngan pagpapagios ha masa para hini nga buruhaton.

Sugad ha buruhaton masa, landaw ha mga case study an panginahanglan ha absoluto nga pamumuno han Partido ha Hukbo agud pahugton ang pagkaurusa anuman nga sitwasyon an atubangon. Kun waray an sugad nga pamumuno han Partido, diri mahihimo an maupay nga pagdepensa kontra ha kaaway ngan pagrumok dinhi nga amo an prinsipal nga buruhaton han Hukbo. Kahuman gin-adman an “Mga Karukayaknon ha Estratehiya ha Rebolusyunaryo nga Gerra han China” ni Mao Zedong.

Ha rubas han pagsuma han mga eksperyensya ha buruhaton masa ngan militar ngan pagrebyu ha teorya hiunong hini amo an pagkatin ngan pagpahilarum han mga kadre ha ira pagsantop ha mga batakan nga prinsipyo han ginerilya nga pakiggerra ha balitang han estratehiko nga depensiba ngan ha kamutangan nga utro nga nagpapanibag-o nga kusog an BHB tikang ha pag-atras nga iginbunga han mga pansakob nga kaluyahan ngan ha pag-atubang ha atake han kaaway.

Naglansar hin kapehan ha pira nga sesyon ha gab-i diin iginpasaro an eksperyensya ha pagpapapultaym han kabatan-unan nga parag-uma, nasyunal nga minoriya ngan kabatan-unan-nga-intelektwal. Naghatag ini hin mga bulawan nga leksyon ngan inspirasyon kun tiunan-o parayhakon an pagpapaapi ha BHB ngan kun tiunan-o padig-unon ngan pauswagon an mga Pula nga mangaraway ha butnga han gitgitay nga pakig-asdangay ha kaaway.

Agud gamuton ha ideolohiya an mga kaluyahan ngan problema, gin-adman liwat an “Ispesyal nga Kurso ha Empirisismo” ngan “Hiunong ha Praktika” ni Mao. Gintumuyo hini nga epektibo nga puntiryahon an empirisista nga tendensiya han panhunahuna ngan pagtrabaho nga iginpakita ha mga case study. Partikular nga nawong hini an kakuntento ha burublag nga datos hiunong ha kamutangan ngan pakabuhi han masa, hamabaw nga pag-aram ha rebolusyunaryo nga kasaysayan han mga erya ngan hilaw nga paniktik. Klaro ha eksperyensya han prente nga an diri pagkumpleto ngan kakulangan ha pagbubug-os han pankatilingban nga imbestigasyon ngan pag-analisar ha klase (SICA) nagbubunga ha mga diri haum nga palisiya ngan programa ha pulitika ngan mga panmilitar nga plano.

Ha paghuman han kumperensya, gin-aruan an mga pinartisipar han ira mga repleksyon. Sigon kan Ka Lima, “Kinahanglan igsalikway an suhetibismo ngan indibidwalismo ha kada hibla han aton pagkatawo, an arogansya, an pagigin kampante ha ngatanan nga aspeto. Masayon gud la ha yakan, kundi ayat gud ha aktwal. Bag-uhon naton an pamaagi han pagpinsar agud magin baltok an aton pag-analisar ha mga butang ngan magin eksakto an mga pitad naton ha pagsolbar ha mga problema.”

“Umato agud magpakusog! Magpakusog samtang naato!” Ini an panawagan han kagiusan nga pagtutul-id ha mga rebolusyunaryo ha Southern Tagalog.

Ha luyo han aatubangon nga sitwasyon militar, hitaas an diwa han mga Pula nga kumander, giya pampulitika ngan mangaraway han magburublag an mga yunit para ha mga panibag-o nga buruhaton nga igintalaan han kumperensya. Klaro an ayat para ha Partido ngan Hukbo ha presente nga kritikal nga takna han rebolusyunaryo nga kagiusan: Sugbungon an tikadamo ngan tikadako nga mga buruhaton ngan sakripisyo hin may diri nagpapapas nga diwa han pagseserbe ha katawhan ngan pagtapod ha katukmaan ngan pagdadaug han rebolusyon.