Ha nakalabay nga mga semana, nahilista an lima nga biktima han pampulitika nga panmatay han mga pwersa han estado. Labot dinhi, mayda gihap mga kaso han pag-aresto, panmusil ngan pan-gigipit. Dugang ini ha luun-luon nga krimen han rehimen US-Marcos ha tulo katuig ha poder.

Ha Masbate, gin-istraping ngan napatay han mga pwersa han estado an 25-anyos nga sibilyan nga hi Joey Oas ha Barangay San Carlos, Palanas hadton Hunyo 29. Ginpagawas hiya nga “inato” ngan nakuhaan han usa nga pistola, mga magasin ngan bala. Gin-akusahan gihap hiya nga membro han sparrow yunit han Bagong Hukbong Bayan (BHB).

Ha Leyte, tuyo nga ginpatay han 93rd IB ngan 802nd IBde an duha nga hors de combat nga membro han BHB ngan usa nga medik hadton Hunyo 18 ha Barangay Cogon, Carigara. Mayda sakit ngan nagpapahuwas hadto hira Juanito Selleca Jr (Ka Tibor/Ka Rey) ngan Sadam Paclita (Ka Dimple) han salakayon ngan panmusilon han mga sundalo. Kaupod nira nga ginpatay hi Lino Delante (Ka Dodong), usa nga medik nga nag-aataman ha mga pasyente. Diri armado an tulo.

Ha General Santos City, ginpanmusil ngan napatay han diri pa nakikilala nga mga tawo hi Ali Jejhon S. Macalintal, usa nga brodkaster ha radyo, hadton Hunyo 23 ha Barangay Lagao. Hi Macalintal, usa nga transwoman, nagin aktibo nga kaapi han mga progresibo nga grupo tikang hadton 2002. Hadton 2024, nagreport hi Macalintal nga gin-gigipit ngan ginmomonitor hiya han mga ahente han Task Force Gensan. Pira kaadlaw antes pusilon, nakakarawat hiya han mga tarhug ha iya kinabuhi.

Pag-aresto. Lima nga pankultura nga aktibista an gin-aresto han mga pwersa han estado hadton Hunyo 27 ha Barangay Pasong Buaya II, Imus, Cavite. Ha butnga han ira oplan pinta, ginsundan hira, ginpalibutan, gintarhug gamit an pusil, antes gindara ha barangay hall. Temporaryo hira nga nakagawas hadton Hulyo 1 ngan naatubang ha mga kaso nga malicious mischief ngan bandalismo.

Panmusil. Ha Negros Oriental, waray wantas nga nagpabuto han pusil an mga “trigger happy” nga sundalo han 62nd IB ha Sityo Putat, Barangay Humay-humay ha Guihulngan City hadton Hunyo 23.

Ha sinunod nga adlaw, piniritay nga ginsulod han mga sundalo an balay ni Bobby Gemodo ha Sityo Laos, Barangay Binobohan ha syudad agud gipiton hiya. Ginkadto gihap han mga sundalo an balay ni Mario Noyad ha Sityo Natae, Barangay Binalbagan, Canlaon City agud hadlukon ngan tarhugon hiya.