Maabot ha 16 nga raliyista an napatay ngan 400 nga iba an nasamaran han madarahug nga ginbungkag han rehimen US-Ruto han Kenya an mga protesta han katawhan hadton Hunyo 25. Kaparte an protesta han pagsalin-urog ha serye han higante nga mga demonstrasyon nga iginlansar hadton nakalabay nga tuig kontra ha neoliberal nga proposisyon nga Finance Bill 2024, nagtitikagrabe nga pandarahug han pulis ngan panmuypoy han estado.

Mahinunumduman nga napaatras han higante nga mga paggios hadton 2024 an rehimen US-Ruto ha larang nga pag-imponer han magbug-at nga buhis nga dikta han International Monetary Fund (IMF) nga dugang nga nagpapakuri ha masa nga Kenyan. Agud tuso nga ilusot an mga buhis, paruparte ini nga iginpasa han parlamento han Kenya ha nakalabay nga tuig.

Iginlansar an mga paggios ha Nairobi, Mombasa, Kisii, ngan iba pa nga syudad. Dara-dara nira an bandera han Kenya ngan ginuliat han panawagan nga “Ruto Must Go” (Palayason hi Ruto) ngan “Occupy Statehouse” (Sakupon an Statehouse o urukyan ni Ruto komo pinuno han gubyerno). Dara gihap nira ha mga protesta an mga ladawan han mga namatay hadton nakalabay nga tuig ha pandarahug han pulis kontra ha demonstrasyon.

Nagpahayag han suporta ngan pakig-usa ha pakigbisog han masa nga Kenyan an International League of Peoples’ Struggles Africa ngan West Asia Regional Committee. Gin-aghat nira an mga Kenyan nga dugang pa nga magpursige atubangan han nagtitikagrabe nga panmuypoy.

“Tukma la nga magpadayon ha pag-oorganisa ha mga Kenyan ngan maglansar han mga panmasa nga aksyon agud ipasulong an panawagan para ha nasyunal nga katalwasan ngan demokratiko nga katungod,” pahayag han komite. Sugad ha iginpakita han hiluagan nga demonstrasyon han katawhan Kenyan hadton 2024, natuod an ILPS nga maaakos nga iduso han tikadako nga paggios an rehimen Ruto nga ig-atras an mga dunot hini nga palisiya.