Ha katapusan han bulan, matindog hi Ferdinand Marcos Jr ha atubangan han Kongreso agud utro nga uwaton an katawhan hiunong ha mga “nahimo” niya ha naglabay nga tulo katuig. Damo ura-ura an ginhihimo niya nga buwa kundi diri niya matatahuban an waray tubtuban nga pakuri nga nahiaaguman han katawhan ha ilarum han iya paghahadi. Waray hunong an tigda nga pagluros han lebel han kinabuhi han mayoriya han katawhan. Waray katupong an korapsyon han pamilya Marcos. Buta an iya pagsunod ha dikta han amo nga imperyalista nga US. Tikagrabe an pampulitika nga panmuypoy kontra ha katawhan nga natindog ngan naato.

Dara ni Marcos an dugang nga pag-inantos ha ordinaryo nga katawhan. Paras-anon pa gihapon han katawhan an hitaas nga presyo han bugas, nga diri matahuban han mapan-uwat nga pagparayaw ni Marcos. Kakunsabo hi Marcos han mga kompaniya ha lana ha tigda nga paghitaas han presyo han diesel ngan gasolina. Ha luyo han hiluag nga panawagan, gin-ulang han Malacañang an proposisyon nga ₱200 nga umento ha inadlaw nga suhol han mga trabahador, ngan lugod, dugang pa nga buhis an iginpasugbong ha katawhan. Wala-tuo an taranggalay ha trabaho, hiluagan an disempleyo, narunapulo kayukot an napipiritan nga magpakabuhi ha iba nga nasud, samtang gatus-gatos kayukot nga mga kablas an ginpapalayas ha ira puruy-anan, ngan waray wantas nga gin-aagawan han tuna, pangisdaan ngan mga surok han pakabuhi.

Iginpapatuman niya an mga palisiya ngan programa nga dugang nga nagpapabuy-ay ha mga langyaw nga dagko nga kapitalista, ngan mga kakunsabo nga dagko nga kumprador burgesya, agaron maytuna ngan burukrata kapitalista. Wala-tuo an pan-ngungutang ni Marcos nga diri naman napapahimulsan han katawhan, kundi nahingangadto la ha parayaw nga mga proyekto nga pan-imprastruktura nga ginkukuhaan han kikbak ni Marcos ngan mga korap niya nga upisyal. Gatus-gatos kabilyon kapisos nga kinawat nga karikuhan han mga Marcos an nahibalik ha ira kontrol, samtang gatus-gatos kabilyon kapisos an ginhahakin ha porma han Maharlika Investment Fund, confidential ngan intelligence funds ni Marcos, ngan ginmamalgastar ha sobra-sobra nga gastos ha militar, ha kahibangan han ginkikinahanglan nga mga pankatilingban nga serbisyo.

Sugad han nakalabay nga mga rehimen, ginpapaburan ni Marcos an dagko nga langyaw ngan lokal nga kapitalista agud makahakin hira hin maksimum nga ganansya. Ginraraysang ni Marcos an suhol han mga trabahador samtang gin-iibanan hin buhis an mga kapitalista. Ginlugwayan niya an langyaw nga pananag-iya ha tuna ha Pilipinas (ha tahub han balaud nga nagtutugot ha 99 katuig nga “pagplete”), ngan gintanggal an mga pankalibungan nga regulasyon agud waray ulang nga dambungon ngan rub-on an natural nga karikuhan han nasud.

Gintatagan hira ni Marcos hin armado nga proteksyon han militar ngan pulis, nga gin-gagamit ha pagpuypoy ha katawhan nga nagdedepensa ha ira tuna ngan pakabuhi. Ha kasyudaran, ginpupuntirya han mga pasista nga alipures han reaksyunaryo nga estado an mga trabahador nga nag-uunyon ngan natindog para ipakigbisog an ira mga demanda nga umento ha suhol. Gin-gagamit ni Marcos an NTF-Elcac ngan an “Anti-Terrorism Law” ha pagpuypoy ha mga katungod han mga trabahador, baga-trabahador, kabatan-unan-estudyante, parupangisda, kababayin-an ngan iba pa nga demokratiko nga sektor agud pugngan hira nga mag-organisa ngan pumartisipar ha kagiusan para ha pankatilingban nga pagbabag-o.

Ha kabaryuhan, butaray an terorismo han estado ha pag-imponer han balaud militar ha mga barangay ngan komunidad, nga ginsesering han NTF-Elcac nga nasuporta ha armado nga rebolusyunaryo nga kagiusan. Wala-tuo an ekstrahudisyal nga panmatay, panhadlok, panhalikwat ha kabablayan, iligal nga pangaresto, “pagpasurender,” waray wantas nga pagpabuto han pusil, panganyon ngan panhulog han bomba ha mga uma ngan bukid hirani ha mga komunidad. Bata man o kalagsan, waray ginpipili nga biktima an brutalidad han mga pasista nga tawuhan ni Marcos. Pinakamadarahug an panmuypoy han rehimen Marcos ha mga tay-aw nga baryo ngan sityo han mga parag-uma ngan minoriya nga katawhan, nga gin-aagawan han tuna han mga langyaw nga kompaniya ha pagmimina, mga plantasyon, proyekto nga pan-enerhiya ngan eko-turismo.

Gin-gagamit ni Marcos an islogan han “kamurayawan” agud tahuban an gerra han pagpuypoy hini ha patriyotiko ngan demokratiko nga kagiusan han katawhan Pilipino. Ini an hingyap han mga imperyalista ngan naghahadi nga klase nga “kamurayawan” nga mamingaw an mga tinalumpigos ngan tiniyupi. Diri ini an makatadungan ngan panmaihaan nga kamurayawan nga hingyap han katawhan, nga makakab-ot la pinaagi han pagbaton ha ira batakan nga mga demanda para ha libre nga distribusyon han tuna, nasyunal nga industriyalisasyon, tinuod nga katalwasan ngan demokrasya.

Ha duso han amo nga imperyalista, iginsugo ni Marcos nga papintason an gerra agud kunuhay perdihon an Bagong Hukbong Bayan. Todo-larga an pakigkonsabuhay ni Marcos ngan han AFP ha pwersa militar han US ha pagpupwesto hini han mga tropa, sarakyan ngan armas ha Pilipinas, ngan ha paglansar han susrunod nga mga pagpahiara ha gerra nga nakatarget ha China. Imbes nga tagan-dalan an murayaw nga dayalogo ha China, ginpapaso gud han rehimen Marcos an armado nga tensyon ha South China Sea.

Waray malalauman an katawhan Pilipino ha pakuri, pasista, ngan papet nga rehimen Marcos. Samtang nakalingkod hi Marcos ha Malacañang, gagamiton niya an iya poder agud dugang nga dambungon an baul-karikuhan han katawhan, pahilawigon an iya poder, ngan makig-asdangay ha iya mga karibal ha pulitika. Waray iba nga makakadtuan an katawhan kundi an tumindog ngan atuhan an rehimen US-Marcos.

Kinahanglan pahiluagon ngan padig-unon han katawhan an ira organisado nga kusog. Ha kasyudaran, kinahanglan bug-os-kusog nga butukon an mga trabahador, baga-trabahador ngan mga kabatan-unan-estudyante, komo sararigan han kusog han iba pa nga mga demokratiko nga sektor. Kinahanglan parayhakon an mga demokratiko ngan kontra-imperyalista nga panmasa nga pakigbisog ha mga pabrika, komunidad ngan mga eskoylahan.

Ha kabaryuhan, kinahanglan pakusgon ngan pahiluagon an hukbo han katawhan ngan an mga sanga ngan komite ha seksyon han Partido agud bug-os-kusog nga tukuron o utro nga tukuron an mga asosasyon han parag-uma agud magdepensa kontra ha pasismo, ngan agud ipasulong an mga pakigbisog kontra ha mga pyudal ngan bagapyudal nga paniniyupi, ngan pakusgon an guliat para ha tinuod nga reporma ha tuna. Kinahanglan parayhakon an paglansar han mga taktikal nga opensiba ngan ispesyal nga operasyon agud sirutan an pinakalunod-patay nga pasista ngan tumanon an gindedemanda nga hustisya han katawhan.

Waray iba nga kaangayan nga baton an katawhan Pilipino kundi an pagpaparayahak han kagiusan masa ngan armado nga pakig-away agud atuhan an pananalumpigos ngan panmuypoy han rehimen US-Marcos. Ha waray kasumo nga pagpupursige ha dalan han pakigbisog, segurado nga mapapagbaton hi Marcos ngan aatubangon an paghusga han bug-os nga katawhan.